سولتۇستىك قازاقستان وبلىسىندا ۇلى دالا ۇلدارىنىڭ مەرەيتويلارىن مەرەكەلەۋ باستالدى

پەتروپاۆل. قازاقپارات - سولتۇستىك قازاقستان وبلىسىندا ۇلى دالا ۇلدارى شىعىس ويشىلى ءال- فارابيدىڭ، ۇلى اقىن اباي قۇنانباي ۇلىنىڭ، جازۋشى ءسابيت مۇقانوۆتىڭ مەرەيتويلارىن جانە ورتا عاسىر مەملەكەتى التىن وردانىڭ مەرەيتويىن مەرەكەلەۋ رەسمي تۇردە باستاۋ الدى، دەپ حابارلايدى قازاقپارات ءتىلشىسى.

سالتاناتتى ءىس- شارا س. مۇقانوۆ اتىنداعى وبلىستىق عىلىمي- امبەباپ كىتاپحاناسىندا «ۇلى دالانىڭ ۇلى تۇلعالارى» سۇحبات الاڭىنان باستالدى. وعان تانىمال ابايتانۋشىلار جانە ءال- فارابيدىڭ عىلىمي مۇراسىنىڭ زەرتتەۋشىلەرى قاتىستى.

وبلىس اكىمىنىڭ ورىنباسارى رۋسلان الىشيەۆ ءوزىنىڭ العى سوزىندە مەرەيتويلىق داتالاردى مەرەكەلەۋ اياسىندا ءىس- شارالار تۇجىرىمداماسى ازىرلەنگەنىن ايتتى. وڭىرلىك جوسپار بويىنشا وبلىستىق دەڭگەيدەگى 83 جانە اۋداندىق دەڭگەيدەگى 250 دەن استام ءار ءتۇرلى فورماتتاعى جانە قوعامدىق ماڭىزدى شارالار وتپەك.

«ولار قوعامدىق پارىزعا، بەلسەندى ازاماتتىق ۇستانىمعا، پاتريوتيزمگە قۇرمەتپەن قاراۋدى قالىپتاستىرۋعا باعىتتالعان. ويتكەنى، جاس ۇرپاقتى ەل تاعدىرى ءۇشىن جاۋاپكەرشىلىككە ۇيرەتۋ ماڭىزدى مىندەتتەردىڭ ءبىرى. بيىلعى جىل ءبىز ءۇشىن، وتانىمىز ءۇشىن، جالپى حالقىمىزدىڭ كونسوليداسياسى جىلى بولۋى كەرەك» ، - دەدى رۋسلان الىشيەۆ.

اسا ماڭىزدى شارالار قاتارىنا قازاق جانە ورىس دراما تەاترلارىنىڭ ارنايى قويىلىمدارى، رەسەيدە «اباي جولىمەن» اتتى وبلىستىڭ مادەنيەت كۇندەرى، رەسپۋبليكالىق اقىندار ايتىسى، «ءال- فارابي جانە ابايدىڭ مۇراسى. ءبىلىمدى ىزگىلەندىرۋ» حالىقارالىق فورۋمى، «ءال- فارابي رۋحانياتى» اتتى وقۋشىلاردىڭ حالىقارالىق ءتۋرنيرى جانە ت. ب. ەنگەن.

س ق و ىشكى ساياسات باسقارماسىنىڭ مالىمەتىنشە، وبلىستىق كىتاپحانادا Open spase فورماتىندا ابايدىڭ مۇراسىن زەرتتەۋ ورتالىعى اشىلدى. اۋدان ورتالىقتارىنىڭ جانە بولاشاعى زور اۋىل مەكتەپتەرىندە اباي ورتالىقتارى اشىلعان. ءال- فارابيدىڭ يدەيالارى نەگىزىندە «مەكتەپ - ىزگىلىك قالاسى رەتىندە» جوباسى ەنگىزىلىپ جاتىر.

م. قوزىبايەۆ اتىنداعى سولتۇستىك قازاقستان ۋنيۆەرسيتەتى نەگىزىندە اباي تانۋ عىلىمي- تانىمدىق ورتالىعى قۇرىلىپ، ءتىل جانە ادەبيەت ينستيتۋتىنا ابايدىڭ اتىن بەرۋ تۋرالى شەشىم قابىلداندى.

وبلىس ورتالىعىنىڭ ايالدامالارىندا ابايدىڭ شىعارمالارىنا سىلتەمەلەرى بەرىلگەن QR- كودتار ورناتىلعان. اباي جانە ءال- فارابيدىڭ ەسىمدەرى بەرىلگەن كوشەلەردى اباتتاندىرۋ، سونداي- اق عيماراتتاردىڭ قاسبەتىنە ۇلى ويشىلداردىڭ ۇلاعاتتى سوزدەرىن جازۋ جانە ولاردىڭ پورترەتتەرىن سالۋ بويىنشا «ستريت- ارت» اكسيالارىن وتكىزۋ قاراستىرىلعان.