قوردايداعى وقيعا: پرەزيدەنت ءبىرقاتار لاۋازىمدى تۇلعانى قىزمەتىنەن بوساتۋدى تاپسىردى
«ق ر پرەزيدەنتى قاسىم-جومارت توقايەۆ جامبىل وبلىسىنىڭ اكىمى ا. مىرزاحمەتوۆكە جامبىل وبلىسى، قورداي اۋدانىندا كىسى ولىمىنە، تۇرعىن ۇيلەردىڭ قيراپ، ازاماتتاردىڭ دۇنيە-مۇلىكتەرىنىڭ بۇلىنۋىنە اكەپ سوقتىرعان وقيعاعا بايلانىستى وبلىس اكىمىنىڭ الەۋمەتتىك ماسەلەلەر جونىندەگى ورىنباسارى س. قۇرمانبەكوۆانى جانە قورداي اۋدانىنىڭ اكىمى ب. بايتولەنى جۇمىستارىنا سالعىرت قاراعانى ءۇشىن قىزمەتىنەن بوساتۋدى تاپسىردى.
سونىمەن قاتار مەملەكەت باسشىسى ق ر ىشكى ىستەر ءمينيسترى ە. تۇرعىمبايەۆقا جامبىل وبلىسى پوليتسيا دەپارتامەنتىنىڭ باستىعى ا. ورازاليەۆتى جانە قورداي اۋداندىق پوليتسيا ءبولىمىنىڭ باستىعى ا. ايقىمبەكوۆتى قىزمەتىنەن الۋدى تاپسىردى»، - دەلىنگەن اقوردا سايتىندا.
ەسكە سالايىق، 7 - اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى. ق ر پرەزيدەنتى قاسىم-جومارت توقايەۆ بۇزاقىلىق سيپاتتاعى جاپپاي توبەلەستى ارانداتۋشىلار ءوز پايداسىنا قولدانباق بولعانىن مالىمدەدى.
سونداي اق ۆيتسە-پرەمەر بەردىبەك ساپاربايەۆتىڭ توراعالىعىمەن ۇكىمەتتىك كوميسسيا قۇرىلاتىنىن، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارى ۇيىمداستىرىلاتىنىن، قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىنىن ءمالىم ەتتى. باس پروكۋراتۋراعا، ۇلتتىق قاۋىپسىزدىك كوميتەتىنە ءتيىستى تاپسىرما بەرىلدى.
تارتىپسىزدىكتەر كەيىن قورداي، اۋقاتتى، سورتوبە ەلدى مەكەندەرىندە دە بولعان.
8 - اقپان كۇنى ىشكى ىستەر ءمينيسترى ەرلان تۇرعىمبايەۆ پەن اقپارات جانە قوعامدىق دامۋ ءمينيسترى داۋرەن ابايەۆ وقيعاعا قاتىستى ەلورداداعى ورتالىق كوممۋنيكاتسيالار قىزمەتىندە باسپا ءسوز ءماسليحاتىن وتكىزدى. ءمالىم ەتىلگەندەي، جانجالعا باسقا اۋىلداردان كەلگەن 300 دەن استام ادام قوسىلعان. ەكى جاق ءبىر-بىرىنە تاس لاقتىرىپ، تاياقپەن ۇرىپ، قارۋ قولدانعان. وقيعا ورنىندا 8 ادام، اۋرۋحانادا 2 ادام كوز جۇمدى. 9 - اقپان ساعات 11.00 دەگى مالىمەت بويىنشا، مەديتسينالىق كومەككە 165 ادام جۇگىنگەن. تۇرعىلىقتى جەرى بويىنشا مەديتسينالىق ۇيىمدارعا - 140 ادام، قىرعىزستانداعى مەديتسينالىق ۇيىمعا - 25 ادام جەتكىزىلدى. «قازاقستانداعى اۋرۋحاناعا جاتقىزىلعانداردىڭ ىشىندە تۇراقتى اۋىر جاعدايدا 30 ادام، ال اسا اۋىر جاعدايدا 8 ادام بار. قايتىس بولعانداردىڭ سانى - 10. وقيعا ورنىندا 8، ال تاعى 2 ادام مەديتسينالىق مەكەمەدە قايتىس بولدى. قازىرگى تاڭدا ءالى 8 ادام جانساقتاۋ بولىمىندە جاتىر»، - دەدى ءلاززات اقتايەۆا.
جانجالدارعا قاتىسى بار دەگەن كۇدىكپەن 47 ادام ۇستالىپ، پوليتسيا بولىمىنە جەتكىزىلدى. ولاردان ەكى اڭشى قارۋى تاركىلەندى. كەيىن ولاردىڭ 44 ءى بوساتىلدى.
ق ر قىلمىستىق كودەكسىنىڭ 272-بابى (جاپپاي تارتىپسىزدىكتى ۇيىمداستىرۋ جانە سوعان قاتىسۋ) جانە 99-بابى (كىسى ءولتىرۋ) بويىنشا سوتقا دەيىنگى تەرگەۋ امالدارى جۇرگىزىلۋدە.
قورداي اۋدانىندا توتەنشە جاعداي جاريالاندى. بەردىبەك ساپاربايەۆ باسشىلىق ەتكەن ۇكىمەتتىك كوميسسيا اۋدان تۇرعىندارىمەن كەزدەستى، قورداي اۋدانىندا تۇنگى قاۋىپسىزدىكتىڭ قامتاماسىز ەتىلۋىن تەكسەردى، ەتنو-مادەني بىرلەستىك باسشىلارىمەن جۇزدەستى، قازا تاپقانداردىڭ ۇيىنە بارىپ، كوڭىل ايتتى. زاقىمدالعان نىسانداردى قالپىنا كەلتىرۋ جۇمىستارى باستالدى.
ق ر ءى ءى م مالىمەتىنشە، قوردايداعى جاپپاي تارتىپسىزدىك كورشىلەس ەكى اۋىل تۇرعىندارى اراسىندا باستالعان.
«ءاۋ باستا، ياعني 5- اقپاندا ەكى اۋىلدىڭ تۇرعىندارى ۇستاسىپ قالعان. تۇرمىستىق قاقتىعىسقا قاتىسقانداردىڭ ءبىرى قازىر ۇستالىپ، قالعاندارى اۋداننان شىقپايتىنى جونىندە قولحاتپەن بوساتىلدى. اۋىر جۇك كولىگى ۇيدەن شىعىپ كەلە جاتقان كەزدە جولدا كەلە جاتقان اۆتوكولىكپەن جولعا تالاسىپ قالعان. كولىكتەردە ءۇش-ءۇش ادامنان بولعان. اقىرى ءوزارا جانجال سوڭى توبەلەسكە ۇلاسىپ كەتكەن»، - دەدى ءى ءى م ورىنباسارى الەكسەي كالايچيدي و ك ق- دا.
سونداي-اق ول جول ۇستىندە توبەلەسكەن التى كىسىنىڭ اراسىندا ەگدە جاستاعى ادامنىڭ بولعانىن راستادى. «ول توبەلەس كەزىندە زارداپ شەككەن... جالپى قازىر ءبىز بارلىق تاراعان اقپاراتقا تالداۋ جۇرگىزىپ وتىرمىز. ول جەردە جۇزگە تارتا ادام بولعان. ولاردىڭ ءارقايسىسىنىڭ سول جەرگە كەلۋ ءموتيۆىن زەرتتەپ جاتىرمىز»، - دەدى ول.
