قازاقستاندا ساياسي پارتيا قۇرۋ جانە تىركەۋ جەڭىلدەتىلەدى
بۇل تۋرالى بۇگىن ق ر ادىلەت مينيسترلىگى زاڭناما دەپارتامەنتىنىڭ ديرەكتورى ولجاس دانابەكوۆ ايتتى، دەپ حابارلايدى قازاقپارات ءتىلشىسى.
«بۇل - مەملەكەت باسشىسىنىڭ تاپسىرماسى. ساياسي پارتيالاردى قۇرۋ ءۇشىن تىركەۋ كەدەرگىسىن 40 مىڭنان 20 مىڭ ادامعا دەيىن تومەندەتۋ ماسەلەسىن «ساياسي پارتيالار تۋرالى» زاڭىنا ءتيىستى وزگەرىستەر ەنگىزۋ ارقىلى جۇزەگە اسىرۋ ۇسىنىلادى. بۇل رەتتە، ساياسي پارتيالاردى قۇرۋ ءۇشىن قازىرگى تىركەۋ كەدەرگىلەرى 10 جىلدان استام ۋاقىت ساقتالىپ وتىر جانە پرەزيدەنت اتاپ وتكەندەي، ول وتكەن كەزەڭنىڭ تالاپتارىنا سايكەس كەلەدى»، - دەدى ولجاس دانابەكوۆ ق ر ادىلەت مينيسترلىگى قوعامدىق كەڭەسىنىڭ وتىرىسىندا.
بۇل ورايدا، دەپارتامەنت باسشىسى حالىقارالىق تاجىريبە قوسىمشا زەرتتەلىپ، ءار مەملەكەتتە ساياسي پارتيالاردى تىركەۋ ءۇشىن ادام سانىندا ەلەۋلى ايىرماشىلىقتار بار ەكەندىگى بايقالعانىن ايتتى.
«بۇل جاعداي مەملەكەتتىڭ ساياسي جانە اكىمشىلىك قۇرىلىمى بويىنشا، سونداي-اق حالىق سانى بويىنشا ەرەكشەلەنەدى. وسىعان بايلانىستى پرەزيدەنتتىڭ ۇسىنىپ وتىرعان باستاماسىنىڭ ماقساتى - كوپپارتيالىق پروتسەستى قامتاماسىز ەتۋ جانە ولاردىڭ مەملەكەتتىك شەشىمدەردى ازىرلەۋ جانە قابىلداۋ پروتسەستەرىنە بەلسەنە قاتىسۋىن قامتاماسىز ەتۋ»، - دەدى ول.
