ەلىمىزدە بالا اسىراپ الۋشىلار ارنايى دايىندىقتان وتۋگە مىندەتتەلەدى
«بالا اسىراپ الۋ جونىندەگى ۇلتتىق اگەنتتىك 2016 -جىلدان باستاپ جۇمىس ىستەيدى. ءبىزدىڭ مىندەتىمىز - بولاشاق اسىراپ الۋشى اتا- انالاردى دايارلاۋ، ولارعا ءبىلىم بەرۋ جانە اتا- انالىق قۇزىرەتتىلىگىن ارتتىرۋ. ءبىزدىڭ جوبا بۇكىل قازاقستان بويىنشا ۇسىنىلعان. 17 ايماقتا بولىمشەمىز بار. سونداي- اق، قازاقستان بويىنشا 17 اسىراپ الۋشى اتا- انالار مەكتەبى بار. ءتورت جىل ىشىندە ءبىزدىڭ ىقپال ەتۋىمىزبەن 801 اسىراپ الۋشى وتباسى پايدا بولدى، 1153 بالا پاتروناتتىق، قامقورشىلىق سياقتى ءارتۇرلى فورماداعى وتباسىلاردا تاربيەلەنۋدە»، - ءلاززات ءجۇسىپوۆا.
ول بالالاردى اسىراپ الاتىن اتا- انالاردى وقىتۋ نە ءۇشىن ماڭىزدى ەكەنىن ايتتى.
«قامقورشىلىققا العان بالالارىن قايتادان جەتىمدەر ۇيىنە وتكىزەتىن اتا- انالار بار. جىل سايىن اسىراپ الۋشى اتا- انالار 200-250-گە جۋىق بالانى بالالار ۇيىنە قايتارادى. 2019 -جىلدىڭ قورىتىندىسى بويىنشا، ءبىزدىڭ جوبا اياسىندا وقىعان اتا- انالار 19 بالانى جەتىمدەر ۇيىنە قايتارعانى انىقتالدى. وسى جاعدايدان كەيىن بۇل ماسەلەگە ەرەكشە نازار اۋدارا باستادىق. ءقازىر پاترونات اتا- انالارعا كاسىبي قولداۋ ۇيىمداستىرىلدى. بىزدە وتباسىلارعا بازالىق، داعدارىستىق جانە توتەنشە كومەك جۇيەسى بار. ءبىزدىڭ ماماندار بالانىڭ وتباسىنا قالاي بەيىمدەلىپ جاتقانىن كورۋ ءۇشىن قوڭىراۋ شالىپ، كەزدەسەدى. بالانى وتباسىنا بەيىمدەۋ پروتسەسى وتە ۇزاققا سوزىلادى، سەبەبى بالا ول وتباسىعا جانى جارالانىپ كەلەدى»، - دەيدى ول.
سونداي- اق، ول بالا اسىراپ الۋشىلار مەكتەبى اپتاسىنا 3 ساعاتتان تۇراتىن 14 ساباقتى قۇرايتىنىن ايتتى.
«ياعني، بالا اسىراپ الۋشىلار بۇل مەكتەپكە ءۇش جارىم اي بارۋ كەرەك. وقۋ بارىسىندا بالا اسىراۋ ويىنان اينىپ قالاتىندار بار. بۇل - بالا اسىراپ العاننان كەيىن اينىپ قالۋعا قاراعاندا جاقسى»، - دەيدى ول.
اۆتور: زارينا قاھارمان
