جابايى مىسىقتىڭ قاي ءتۇرىن اڭشىلىققا ۇيرەتۋگە بولادى؟
قازاقتىڭ ءتورت تۇلىك مالى دا ۇيرەتىلگەن جانۋارلار ەكەنى ءسوزسىز. جىلقىنىڭ جابايى ءتۇرى - قۇلان بولسا، قويدىڭ جابايى ءتۇرى - ارقار، ال تۇيەنىكى - لاما.
قورعاۋشى قىزمەتىن اتقاراتىن ءيت پەن مىسىق تا - كونە داۋىرلەردەن بەرى قولعا ۇيرەتىلگەن جابايى اڭدار.
اسىرەسە، ءيتتىڭ ادامزات ءۇشىن پايداسى كوپ بولدى. ءار ءيتتىڭ ءوز قىزمەتى بار. ءبىرى مال باقسا، ءبىرى ءۇي قورعادى، قاسقىردى الدى، ەندى ءبىرى اڭشىلىققا باردى.
الەمدە اڭ اۋلايتىن ءيت تۇرلەرى كوپ. قازاقتىڭ قۇماي تازىسى دا وسى تۇقىمعا جاتادى. الايدا مىسىق تەكتەس اڭداردى اڭشىلىققا سالۋعا بولادى دەگەندى ەستىگەنسىز بە؟
جولبارىس، ارىستان، لەوپارد، گەپارد، سىلەۋسىن، بارىس، ياگۋار، ءىلبىس، قاراقال، پۋما سىندى مىسىق تەكتەستەردىڭ ىشىندە گەپارد قانا قولعا تەز ۇيرەنەتىن كورىنەدى.
گەپارد تابيعاتىنان مەيىربان، سالقىنقاندى، قايىرىمدى، ەركە كەلەدى. ادامعا تەز باۋىر باسادى.
سوندىقتان تاياۋ شىعىس پەن اراب-پارسى تۇبەگىندە ءومىر سۇرگەن بۇرىنعى قاۋىمدار گەپاردتى قولعا ۇيرەتىپ، ءسان-سالتانات قۇراتىن بولعان. ونىڭ ۇستىنە، گەپارد جۇيرىك ءارى اقىلدى اڭ بولعاندىقتان، ونى اڭ اۋلاۋعا پايدالانعان. گەپاردتىڭ جىلدامدىعى ساعاتىنا 110 شاقىرىمعا دەيىن جەتەدى.
گەپاردتىڭ دەنە تۇرپاتى جۇيرىك كولىك دەسەك بولادى. قۋعان اڭىن قايدا بۇرىلسا دا قاعىپ تۇسىرەر ەبى مەن جەمتىگىنە قاس-قاعىمدا جەتىپ بارار جىرتقىشتىعى كىمدى بولسا تاڭقالدىرارى ءسوزسىز.
جانۋاردى جايراتىپ سالىپ، يەسىن كۇتىپ وتىراتىن بولعان. كونە ەگيپەت، شۋمەر مەن ۆاۆيلون سۋرەتتەرىندە باي-باعلانداردىڭ مىسىق تەكتەس جانۋاردى قولعا ۇستاپ، كەربەز جۇرىسپەن كەتىپ بارا جاتقان بەينەلەرى كوپ كەزدەسەدى.
سوعان قاراعاندا گەپاردتى قولعا ۇيرەتۋ بايلىق پەن باق-داۋلەتتىڭ كورىنىسى بولسا كەرەك. اراب شەيحتارى گەپاردتى كورول بيلىگى مەن اسقان باقۋاتتىڭ بەلگىسى رەتىندە ءالى كۇنگە دەيىن ۇستايدى.
ال گەپاردپەن اڭ اۋلاۋ تۋرالى دەرەكتەر VII عاسىردان باستاپ كەزدەسەدى. قازىرگى يەمەن ەلى ورنالاسقان اۋماقتا گەپارد اسىراپ، ونى اڭ اۋلاۋعا ۇيرەتەتىن شەبەرلەر بولعان.
الدىمەن گەپاردتى قولعا ۇيرەتىپ، كەيىن ەت نە جەمتىك لاقتىرۋ، كەيدە اقبوكەن سىندى جانۋاردى بايلاپ قويىپ، سوعان جىبەرۋ ارقىلى اڭ اۋلاۋعا باۋلىعان.
ءتىپتى، گەپاردتى اتقا مىنۋگە دە ۇيرەتكەن كورىنەدى. اتقا ءمىنىپ، يەسىنىڭ ارتىندا وتىراتىن بولعان. مۇنى قىتاي، ءۇندى جازبالارىنداعى سۋرەتتەردەن كورۋگە بولادى. قىتاي مەن ءۇندى ساۋداگەرلەرى ارابتاردان گەپارت پەن قاراقالدى ساتىپ الىپ، وزدەرى دە اڭ اۋلاۋعا پايدالانعان ەكەن.
Massaget.kz
