تاراز قالاسىنىڭ اينالاسى جاسىل بەلدەۋگە اينالادى

تاراز. قازاقپارات - جامبىل وبلىسىنىڭ ورتالىعى تاراز قالاسىنىڭ اۋماعىنان جاسىل بەلدەۋ قۇرۋ جۇمىستارى قىزۋ ءجۇرىپ جاتىر، - دەپ حابارلايدى قازاقپارات.

ايماق باسشىسى اسقار مىرزاحمەتوۆتىڭ توراعالىعىمەن وتكەن جيىندا شاھار اۋماعىن جاسىل جەلەككە اينالدىرۋ ماسەلەسى تالقىلاندى.

اسقار يسابەك ۇلى ەڭ الدىمەن جاسىل جەلەكتىڭ كولەمىن مۇمكىندىگىنشە ۇلعايتۋدى جانە ونىڭ وبلىس ورتالىعى اۋماعىندا بولۋىن نەمەسە بارىنشا تاياۋ ورنالاسۋىنا نازار اۋدارتتى. سەبەبى، ول تەك تارازدىقتاردىڭ تابيعي دەمالىس ورنى عانا ەمەس، بولاشاقتا قالانىڭ «وكپەسىنە» اينالۋى ءتيىس. ءوڭىر باسشىسى اعاش ەگىلەتىن القاپتاردا مىندەتتى تۇردە سۋ ماسەلەسى شەشىلۋ كەرەكتىگىنە كوڭىل ءبولدى.

ايتا كەتەيىك، ايماق باسشىسى بۇعان دەيىن بۇل باعىتتاعى جۇمىستاردى جۇيەلەۋ ءۇشىن جوعارىداعى ماسەلەلەردى ەسكەرە وتىرىپ جاۋاپتى تۇلعالارعا ناقتى تاپسىرمالار جۇكتەگەن بولاتىن. ول ءۇشىن بوس جەرلەردىڭ مۇمكىنشىلىكتەرىن جان-جاقتى زەردەلەۋگە ارنايى ماماندار تارتۋ كەرەكتىگىن، اعاش كوشەتتەرىن دايىندايتىن جاڭا ءتالىمباقتار قۇرۋ، قولدانىستاعى ءتالىمباقتىڭ اۋماعىن ارتتىرۋدىڭ ماڭىزدىلىعىنا توقتالعان-دى.

اتالعان جيىندا ايماق باسشىسىنىڭ تاپسىرماسىنا وراي اتقارىلىپ جاتقان جۇمىستاردى بايانداعان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى اسلان ورازبەكوۆ جاسىل بەلدەۋ بويىنشا بارلىعى 7 اۋماقتىڭ تاندالىپ الىنعاندىعىن تىلگە تيەك ەتتى. ول تاراز قالاسىنان جالپى 395 گەكتاردى قۇرايتىن 6 اۋماق، جامبىل اۋدانىنان 50 گەكتارلى 1 اۋماق بويىنشا جۇمىستار جۇرگىزىلىپ جاتقانىن جەتكىزدى.

اتاپ ايتساق، سۇلەيمەنوۆ كوشەسىنىڭ اياعىنداعى 28 گەكتار جەردى ءتيىمدى يگەرۋ، كوشەت ەگۋ جۇمىستارى اقپان ايىنىڭ سوڭىندا باستالماق. قازىرگى تاڭدا سۋ كوزدەرى انىقتالىپ، كانالداردان سۋ تارتۋ شارالارى سارالانۋدا. ال «تاراز بىلعارى اياق كيىم» ج ش س جانىنداعى 103 گەكتار اۋماقتى تەگىستەۋ، سۋ جۇيەلەرىن جۇرگىزۋ ءۇشىن ارنايى جوسپار تۇزىلۋدە. بۇگىندە اتالعان جەرلەرگە وتىرعىزىلاتىن كوپ جىلدىق قاراعاش كوشەتتەرى دايىندالۋدا. سونداي-اق، تاراز-اسا جول بويىنداعى «تاراز مەتاللۋرگيا زاۋىتى» مەن «جامبىل گيپس» زاۋىتى اۋماعىنداعى 72 جانە 23 گەكتار جەرلەر دە الداعى ۋاقىتتا جاسىل جەلەككە اينالماق. ونىڭ ءبىرىن ارىق تارتۋ ارقىلى، ەكىنشىسىن ارتيزان قۇدىعىن قازۋ ارقىلى سۋعارۋ كوزدەلۋدە. باسقا دا تاڭدالعان ۋچاسكەلەردە ءتيىستى شارالار قولعا الىنعان.

اسقار يسابەك ۇلى جوسپارداعى جاسىل بەلدەۋدىڭ كولەمىن ۇلعايتۋ، قالايدا 500 گەكتارعا جەتكىزۋ كەرەكتىگىنە كوڭىل ءبولىپ، ول ءۇشىن اتالعان اۋماقتاردىڭ ماڭىنداعى جەكەمەنشىك جەرلەردى دە قوسۋ مۇمكىنشىلىگىن زەردەلەۋدى تاپسىردى. ەگەر ءتيىمدى پايدالانىلماي وتىرعان بولسا، مەملەكەت مەنشىگىنە قايتارۋ نەمەسە بالامالى جەر ۋچاسكەسىن ۇسىنۋ ماسەلەلەرىن قاراستىرۋدى جۇكتەدى. جيىن قورىتىندىسى بويىنشا ءتيىستى تۇلعالارعا ناقتى تاپسىرمالار جۇكتەلىپ، حاتتاما تولتىرىلدى.