تۇركيادا «اباي تاعىلىمى» اتتى كورمە اشىلدى
اقىننىڭ ادەبي مۇرالارىن كەڭىنەن ناسيحاتتاۋ ماقساتىندا انادولى جەرىندە قازاق ۇلتتىق قىزدار پەداگوگيكالىق ۋنيۆەرسيتەتى تاعىلىمدى شارا ۇيىمداستىردى.
وقۋ ورنىنىڭ رەسمي وكىلى - باسپا ءسوز قىزمەتىنىڭ جەتەكشىسى جاندار اساننىڭ ايتۋىنشا، نييدە ومەر حاليسدەمير ۋنيۆەرسيتەتىندەگى قازاق- تۇرىك مادەني ءبىلىم بەرۋ عىلىمي- زەرتتەۋ ورتالىعىندا وتكەن جيىن باۋىرلاس مەملەكەتتەر اراسىنداعى ءوزارا ىنتىماقتاستىقتى ايقىن اڭعارتتى.
«قىزدار ۋنيۆەرسيتەتىنىڭ دەلەگاتسياسى اتالعان ورتالىققا ابايدىڭ شىعارمالارى مەن ول تۋرالى ىرگەلى زەرتتەۋ ەڭبەكتەرى توپتاستىرىلعان ەلۋ كىتاپتى سىيعا تارتتى. سونداي- اق قازاقستاندىق جەتەكشى جوعارى وقۋ ورنىنىڭ باستاماسىمەن «اباي تاعىلىمى» تاقىرىبىندا كورمە اشىلدى، - دەدى جاندار اسان.
كورمەنىڭ اشىلۋ راسىمىنە تۇركيالىق عالىمدار، قازاقستاندىق دەلەگاتسيا وكىلدەرى مەن ستۋدەنتتەر قاتىستى.
يگىلىكتى شارانى نيدە ومەر حاليسدەمير ۋنيۆەرسيتەتىنىڭ وقۋ ءىسى جونىندەگى پرورەكتورى يلياس گۋكحان اشىپ، اباي قازاقتىڭ ۇلى اقىنى عانا ەمەس، سونداي- اق ءتۇبى ءبىر تۇركى دۇنيەسىنە ورتاق تۇلعا ەكەندىگىن اتاپ ءوتتى.
سونىمەن قاتار ول ويشىلدىڭ ادامزاتتىڭ اسىل مۇراسىنا اينالعان شىعارمالارى الەمنىڭ 30 دان استام تىلىمەن قاتار تۇرىك تىلىنە دە اۋدارىلعانىن ايتتى.
«اكەنىڭ بالاسى ەمەس، ادامنىڭ بالاسى بولۋدى ماقسات تۇتقان اقىننىڭ قۇندى قازىناسى وسكەلەڭ ۇرپاقپەن بىرگە جاسايتىن ماڭگىلىك مۇراعا اينالۋى ءتيىس. وسى ورايدا قازاقستان پرەزيدەنتى قاسىم- جومارت توقايەۆتىڭ اباي حاقىنداعى ماقالاسى، وي- تولعامى باستى باعدارشام بولۋى ءتيىس دەپ ويلايمىن. ول جوسپارلانعان شارالاردىڭ بارلىعى «توي تويلاۋ ءۇشىن ەمەس، وي- ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» ەكەندىگىن اتاپ ءوتتى. ءبىز دە ءوز تاراپىمىزدان اقىن مەرەيتويىن جوعارى دەڭگەيدە وتكىزۋگە اتسالىسامىز. بۇگىنگى شارا سونىڭ باستاۋى ىسپەتتەس. تۇركيا جۇرتشىلىعى ءۇشىن دە ابايدىڭ ومىرشەڭ پوەزياسىنىڭ ورنى بولەك. ونىڭ ادەبي تۋىندىلارىنىڭ استارىنا ءۇڭىلىپ قاراساڭىز ۇلكەن ماعىنا جاتىر. ونىڭ ءپالساپالىق وسيەتتەرى مەن شىعارمالارى ۋاقىتپەن ۇندەس ياكي قاناتتاس، - دەدى يلياس گۋكحان.
جيىندا ءسوز العان قىزدار ۋنيۆەرسيتەتىنىڭ عىلىمي جۇمىستار جانە يننوۆاتسيا جونىندەگى پرورەكتورى نۇرعالي ارشابەكوۆ ۇلى اقىننىڭ تاعىلىمىنا تەرەڭ بويلاۋ - بۇگىنگى كۇندە ۇلكەن ماڭىزعا يە ەكەندىگىن بايانداپ، تاعىلىمدى ىسكە ۇيىتقى بولعاندارعا ىزگى لەبىزىن ءبىلدىردى.
«ابايعا بەت بۇرۋ، «وتكەننىڭ ارتى، جاڭانىڭ باسى ەدىم» دەگەن ۇلى اقىننىڭ تاعىلىمىنا تەرەڭ بويلاۋ - بۇگىنگى كۇندە ۇلكەن ماڭىزعا يە. اباي - ۇلتتىق بولمىستىڭ ايقىن ۇلگىسى. اباي - دالا دانالارىنىڭ بارشا جاقسى قاسيەتتەرى مەن اسىل مۇرالارىن بويىنا سىڭىرە وتىرىپ، ۇلت ادەبيەتى مەن مادەنيەتىن ءھام قوعامدىق ويدى باعا جەتپەس قازىنالارمەن بايىتقان دانا دا دارا تۇلعا. اباي - ادامزاتقا ورتاق تۇلعا. ۇلى ويشىلدىڭ شىعارمالارى الەمدىك ادەبيەتتىڭ التىن قورىنا ەنۋى بۇل سوزىمىزگە ايقىن دالەل. 75 جىلدىق تاريحى بار ۋنيۆەرسيتەت ۇجىمى اتىنان اقىن مەرەيتويى قارساڭىندا ۇيىمداستىرىلعان شارانىڭ وتۋىنە قولداۋ كورسەتكەن تۋىسقان تۇرىك باۋىرلارىمىزعا العىسىمىزدى بىلدىرەمىز، - دەدى ول نۇرعالي ارشابەكوۆ.
الداعى ۋاقىتتا تۇركيادا ءبىلىم الىپ جۇرگەن قازاق جاستارىمەن قاتار كوپشىلىك قاۋىم نيدە قالاسىنداعى قازاق- تۇرىك مادەني ءبىلىم بەرۋ عىلىمي- زەرتتەۋ ورتالىعىندا اباي مۇراسىمەن كەڭىنەن تانىسۋعا مۇمكىندىك الماق. بۇل باستاما ءوز كەزەگىندە تۋىسقان حالىقتار اراسىنداعى رۋحاني ساباقتاستىقتىڭ ارتۋىنا ىقپال ەتەتىندىگى راس.
كورمەنىڭ اشىلۋ راسىمىندە حالىقارالىق تۇركى الەمى زەرتتەۋلەرى سيمپوزيۋمىنىڭ ديرەكتورى، پروفەسسور حيكمەت كوراش، ەۋرازيالىق زەرتتەۋلەر ماماندىعىنىڭ باسشىسى، PhD تۋرعاي دۇيەن، قازاق- تۇرىك مادەني ءبىلىم بەرۋ عىلىمي- زەرتتەۋ ورتالىعىنىڭ باسشىسى، پروفەسسور مۋرات بارۋت سىندى سىندى عالىمدار دا ءسوز سويلەپ، نيەتتەستىگىن ءبىلدىردى.
