باقىت سۇلتانوۆ دەلدالداردىڭ باعا كەلىسىمىنە قارسى جۇمىس توبىن قۇرۋدى ۇسىندى

نۇر-سۇلتان. قازاقپارات - دەلدالداردىڭ باعا كەلىسىمىنە جول بەرمەۋ ءۇشىن جۇمىس توپتارىن قۇرۋ قاجەت.

بۇل تۋرالى بۇگىن ۇكىمەت وتىرىسىندا ق ر ساۋدا جانە ينتەگراتسيا ءمينيسترى باقىت سۇلتانوۆ ايتتى، دەپ حابارلايدى قازاقپارات ءتىلشىسى.

«اسقار ۇزاقباي ۇلى، ءسىزدىڭ وتكەن جىلعى قازان ايىندا ۇكىمەت وتىرىسىندا بەرگەن تاپسىرماڭىزعا سايكەس مونوپولياعا قارسى ورگان ءبىرقاتار شارالار قابىلدادى. 2019-جىلى 198 حابارلاما، ونىڭ ىشىندە 83 ءى ساۋدا جەلىلەرىنە جىبەرىلدى. ونىڭ 182 ءسى، ونىڭ ىشىندە 75 ءى ساۋدا جەلىلەرى تاراپىنان ورىندالدى. بۇل باعانىڭ ءوسۋىن ءبىرشاما تۇراقتاندىرۋعا مۇمكىندىك بەردى. وتكەن جىلدىڭ جەلتوقسان ايىندا ول تەك 0,1 پايىزعا ءوستى. ال الدىڭعى جىلدىڭ ءتيىستى ايىندا بۇل كورسەتكىش 1,4 پايىزدى قۇرادى»، - دەدى مينيستر ۇكىمەت باسشىسى اسقار مامينگە قاراتا.

ونىڭ دەرەگىنشە، بيىل قاڭتار ايىندا قىزىلوردا قالاسىندا كۇرىش باعاسىنا قاتىستى ىمىرالاسۋ بار ەكەندىگى تۋرالى 3 حابارلاما شىققان.

«دەلدالدارمەن جۇمىس ىستەۋ كەزىندە باعا كەلىسىمدەرىنە قارسى كۇرەس ادىستەرى قولدانىلۋى ءتيىس. ول ءۇشىن اكىمدەرگە وسى اپتانىڭ سوڭىنا دەيىن باسەكەلەستىكتى قورعاۋ جانە دامىتۋ، مەملەكەتتىك كىرىس دەپارتامەنتتەرىمەن بىرلەسىپ، جۇمىس توپتارىن قۇرۋدى تاپسىرۋدى ۇسىنامىن»، - دەدى ول.

ءمينيستردىڭ ايتۋىنشا، اتالعان جۇمىس توپتارى كوتەرمە ساۋدا باعاسىن انىقتاپ، قايتا ساتىپ الۋشىلاردى كولەڭكەدەن شىعارۋى كەرەك.

«ماسەلە تەكسەرۋ جۇرگىزۋگە قاتىستى ەمەس. اتالعان جۇمىس توپتارى باعا بەلگىلەۋدى تالداپ، ايقىنداۋى قاجەت. جاريالانعان موراتوريي اياسىندا بۇل سىبايلاس جەمقورلىق الەۋەتىنىڭ تومەندەۋى مەن سالىق جيناۋدىڭ الدىن الۋعا باقىلاۋدى كۇشەيتەدى»، - دەدى باقىت سۇلتانوۆ.