قىتاي ۋحاننان وزبەك ستۋدەنتتەرىن ەۆاكۋاتسيالاۋعا رۇقسات بەرمەدى
مينيسترلىكتىڭ ايتۋىنشا، 29 - قاڭتاردا وزبەكستاننىڭ قىتايداعى ەلشىسى باحتيەر سايدوۆ قىتايدىڭ سىرتقى ىستەر مينيسترلىگىندە ماماندارمەن كەزدەسكەن. قىتاي تارابى ۇكىمەتتىڭ كوروناۆيرۋستى تاراتپاۋعا كۇش سالىپ وتىرعانىن، الدىن الۋ جانە ونى ەمدەۋ شارالارىن جۇرگىزىپ جاتقانىن ايتقان.
مينيسترلىكتىڭ دەرەگىنشە، قازىرگى كەزدە قىتايدا تەدروس گەبرەيەسۋس باستاعان دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) جۇمىس توبى ءجۇر. ۇيىم وكىلدەرى دە شەتەل ازاماتتارىن ەۆاكۋاتسيالاۋدى قۇپتاماعان. د د س ۇ باسشىسى حالىقارالىق قاۋىمداستىقتى تىنىشتىق ساقتاپ، جالعان اقپاراتقا سەنبەۋگە شاقىرعان.
وزبەكستاننىڭ رەسمي ورىندارى 30 - قاڭتاردا ۋحاندا 72 وزبەك ستۋدەنتى بار دەپ مالىمدەگەن.
بۇعان دەيىن قازاقستاننىڭ سىرتقى ىستەر مينيسترلىگى دە ۋحانداعى قازاق ستۋدەنتتەرىن ەۆاكۋاتسيالاۋ ماسەلەسىن قىتاي بيلىگىمەن تالقىلاپ جاتقانىن ايتقان. ازىرگە كەلىسسوزدىڭ قالاي اياقتالعانى بەلگىسىز.
وسىعان دەيىن ءبىر توپ اتا- انا قىتايدىڭ ۋحان قالاسىنان شىعا الماي وتىرعان ستۋدەنت بالالارىن قايتارۋدى سۇراپ، قازاقستان بيلىگىنە ءوتىنىش جاساعان. قازاقستان سىرتقى ىستەر مينيسترلىگى «قىتاي ازىرگە ۋحاننان ازاماتتارىن الىپ كەتۋ تۋرالى بىردە- ءبىر ەلدىڭ سۇراۋىنا جاۋاپ بەرمەگەنىن» ايتقان بولاتىن.
«امەريكا داۋىسى» سايتىنىڭ جازۋىنشا، 29 - قاڭتاردا ا ق ش جانە جاپونيا ۋحاننان ازاماتتارىن ەۆاكۋاتسيالاعان.
دۇنيەجۇزىلىك دەنساۋلىق ساقتاۋ ۇيىمى (د د س ۇ) كوروناۆيرۋستىڭ تارالۋىنا بايلانىستى حالىقارالىق دەڭگەيدە توتەنشە جاعداي جاريالادى. دەگەنمەن ۇيىم باسشىسى تەدروس گەبرەيەسۋس حالىقارالىق ءىس- ساپارلار مەن ساۋداعا شەكتەۋ قويۋعا نەگىز جوق دەگەن.
https://www.azattyq.org