ابايەۆ: پرەزيدەنت شەتەلدىك كولىكتەردى تىركەۋگە جەتكىلىكتى ۋاقىت بەردى
بۇل تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ «اشىق ديالوگ» باعدارلاماسىندا ايتتى، دەپ حابارلايدى قازاقپارات ءتىلشىسى.
«مەملەكەت ازاماتتارىمەن ساۋدالاسپايدى. بۇل جەردەگى باستى ماسەلە - كۇردەلى جاعدايدان دۇرىس شىعۋ. مەملەكەتتىڭ پوزيتسياسى بارىنشا قاراپايىم جانە تۇسىنىكتى. مۇنداي كولىكتەردىڭ يەلەرى قازاقستاندىق تىركەۋگە تۇرۋى كەرەك نەمەسە باسقا مەملەكەتكە اكەتۋى كەرەك. بۇل سۇراققا قاتىستى باسقا جاۋاپ جوق»، - دەدى داۋرەن ابايەۆ «اشىق ديالوگ» باعدارلاماسىندا.
ول ونلاين ساۋالناما ناتيجەسى قازاقستاندىقتاردىڭ كوبى مەملەكەت پوزيتسياسىن قولدايتىنىن كورسەتكەنى تۋرالى ايتتى.
«ولار ەكولوگيا، سالىق جانە تاعى ماسەلەلەردى ەسكەرىپ وتىر. بۇل - ويىن ءجيى بىلدىرە بەرمەيتىن كوپشىلىكتىڭ پىكىرى. مۇنداي ادامدار ءوز قۇقىعىن «ايعايلاي» قورعايتىندارعا قاراعاندا الدەقايدا كوپ. مەملەكەت وزىنە ءتان ءارتۇرلى ەرەكشەلىگى بار كولىكتەردى بىردەن تىركەۋ وڭاي بولمايتىنىن بىلەدى، سول سەبەپتى پرەزيدەنت 2021-جىلدىڭ 1- ناۋرىزىنا دەيىن ۋاقىت بەردى. بۇل - اتالعان ماسەلەنى شەشۋ ءۇشىن جەتكىلىكتى ۋاقىت دەپ سانايمىن»، - دەدى ول.
