پرەزيدەنتتىڭ ماقالاسى دۇنيەگە اباي كوزىمەن قاراۋعا شاقىرادى - نەسىپبەك ايت ۇلى
مەملەكەتتىك سىيلىقتىڭ لاۋرەاتى، بەلگىلى اقىن نەسىپبەك ايت ۇلى ماقالادا كوتەرىلگەن ماسەلەلەردىڭ ماڭىزدى ەكەندىگىن ايتىپ، ونى ۇلتتىق سانا توڭكەرىسىنە الىپ كەلەتىن تۋىندى رەتىندە باعالادى. «قاسىم- جومارت توقايەۆتىڭ «اباي جانە XXI عاسىرداعى قازاقستان» اتتى ماقالاسى - ۇلتتىق سانامىزعا توڭكەرىس جاساعان تۋىندى دەپ باعالايمىن. بۇل ماقالانى ۇلتتىق باعدارلامانىڭ وزەگى دەۋگە بولادى. پرەزيدەنتىمىز ماقالاسىندا ابايدىڭ رۋحىن تانۋ مەن ونىڭ دانالىق سوزدەرىن بويعا ءسىڭىرۋ ارقىلى ەلدىڭ ەل بولاتىندىعىن ايقىن اتاپ ءوتتى» ، - دەدى ول. سونداي- اق، اقيىق اقىن اباي ولەڭدەرىن جۇرەكپەن وقۋعا شاقىردى. «پرەزيدەنتتىڭ ماقالاسىن وقىپ وتىرىپ، ونىڭ ابايدى جاستايىنان وقىپ، بويىنا ءسىڭىرىپ، اقىننىڭ تاعىلىمدى ويلارىن جۇرەگىنە ۇيالاتقاندىعىنا رازى بولدىم. ابايدى جاتتاپ ەمەس، جۇرەگىڭمەن ءتۇسىنىپ وقۋ كەرەك. ءبىر سوزبەن ايتقاندا، بۇل ماقالا ءار قازاقتى ويلانۋعا، جاڭارۋعا، دۇنيەگە اباي كوزىمەن قاراۋعا شاقىرادى» ، - دەدى ول ءوز سوزىندە.
جاستار دا ماقالانى وقىپ، اباي جايلى ءوز پىكىرىن بىلدىرۋگە اسىقتى. سولاردىڭ ءبىرى - «تۇران- استانا» ۋنيۆەرسيتەتىنىڭ جاستار ءىسى كوميتەتىنىڭ ءتوراعاسى تەمىرلان قايىرجانوۆ.
«اباي - قازاقتىڭ ماڭدايىنا بىتكەن ۇلكەن باق. سەبەبى ونىڭ شىعارمالارى ارقىلى وسكەلەڭ ۇرپاق ءبىلىم الىپ، بويىنا قازاقتىڭ رۋحاني بايلىقتارىن سىڭىرۋدە. بيىل اباي اتامىزدىڭ 175 جىلدىعى كەڭ كولەمدە تويلانۋدا. الەۋمەتتىك جەلىلەر ارقىلى ۇلى اقىننىڭ ولەڭىن مانەرلەپ وقۋدان مەملەكەت باسشىسى تاراپىنان ەستافەتا جولداندى. تەك قازاقستان كولەمىندە عانا ەمەس، شەت ەلدەن دە الەمگە تانىمال ونەر يەلەرى وسى ەستافەتانى جالعاستىرىپ اباي اتامىزدىڭ ولەڭدەرىن ءوز تىلدەرىندە وقىدى. وسىلايشا، اباي اتامىزدىڭ ولەڭدەرىن قايتا ءبىر جاڭعىرتقانداي بولدىق. مەملەكەت باسشىسىنىڭ ءوز ماقالاسىندا ۇلى اقىن ەڭبەكتەرىن ەلىمىزدىڭ باستى مۇراسى ءتۇسىنىپ وقۋعا شاقىرادى» ، - دەدى تەمىرلان قايىرجانوۆ.
ال ە ۇ ۋ جاستار ساياساتى ورتالىعىنىڭ ءتوراعاسى ازات تەڭگەبايەۆ بولسا، ابايدىڭ ناقىل سوزدەرىن ۇرانعا اينالدىرىپ، ويشىلدىڭ مەرەيتويىنا ءوز ۇلەسىن قوساتىنىن اتاپ ءوتتى: «مەن ءوز كوماندامدى قالىپتاستىرۋ بارىسىندا، بىرگە جەڭىسكە جەتەلەۋ جولىندا ابايدىڭ «وزىڭە سەن، ءوزىڭدى الىپ شىعار اقىلىڭ مەن ەڭبەگىڭ ەكى جاقتاپ» دەگەن ءسوزىن ۇران رەتىندە ۇستانامىن. پرەزيدەنت ماقالاسىندا وسى جىلى ابايدىڭ 175 جىلدىق مەرەيتويى حالىقارالىق دەڭگەيدە اتالىپ وتەتىندىگىن ايتتى. ءبىز دە سوعان ۇلەس قوسۋعا تىرىسامىز» .
سونداي- اق، جوعارى وقۋ ورنىنىڭ وقىتۋشىلارى پرەزيدەنتتىڭ ماقالاسىنا قاتىستى ويلارىن ورتاعا سالدى.
«تاريحي مۇرانى ساقتاۋعا باعىتتالعان قازاقستان رەسپۋبليكاسىنىڭ مەملەكەتتىك ساياساتى - رەسپۋبليكاداعى قازىرگى ساياسي احۋالدىڭ وتە ماڭىزدى قۇرامداس بولىگى. مەملەكەت باسشىسى قابىلداپ جاتقان شەشىمدەر سونىڭ دالەلى. سوندىقتان قاسىم- جومارت توقايەۆتىڭ ماقالاسىندا كورسەتىلگەن اباي دانالىعىنىڭ ماڭىزدىلىعىن كوتەرۋى، ۇلتتىق مۇرانى ساقتاۋ قاجەتتىلىگى ەلىمىزدى الدىعا جەتەلەيتىنى ءسوزسىز» ، - دەدى قازاق ەكونوميكا، قارجى جانە حالىقارالىق ساۋدا ۋنيۆەرسيتەتىنىڭ ستۋدەنتتەرمەن جۇمىس جونىندەگى دەكانى ايگۇل مۇحامەدجانوۆا.
ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى بەكجان ءابدۋالي ۇلى پرەزيدەنت ماقالاسىندا اباي تاعىلىمى جان- جاقتى زەردەلەنگەنىن بايان ەتتى: «پرەزيدەنت ماقالاسىندا ۇلى ويشىلدىڭ دانالىعىن جان- جاقتى زەردەلەنە وتىرىپ، بۇگىنگى كۇننىڭ قاجەتىنە جاتارۋ جولدارى قاراستىرىلعان. وندا اباي الەمى ۇلتتى ۇيىستىرۋشى نەگىز، الەمگە تانىتۋشى تۇلعا، ءار ادامنان باستاپ، بارشا حالقىمىز قۋات الاتىن تاۋسىلماس رۋحاني ازىق رەتىندە قاراستىرىلادى. ءارى مەملەكەتتىك ساياساتتىڭ دا ارقا سۇيەر التىن قورعانى ىسپەتتى، ويتكەنى اباي مۇراسى ارقىلى بارشا قازاق بالاسى رۋحاني ءشولىن قاندىرادى، ول ارقىلى قازاق الەمگە تانىلادى. ەلدىڭ تۇتاستىعىنان اسقان بەرەكە- بىرلىك، ودان اسقان ەرلىك، ۇلى بولاشاق جوق. اباي مۇراسى ارقىلى XXI عاسىرداعى قازاق بالاسى ءوزىنىڭ وتكەنىمەن جالعاسادى، بولاشاعىنا دۇرىس قادام جاسايدى» .
