عالىمدار ادام ءومىرىن ون جىلعا ۇزارتۋعا بولاتىنىن انىقتادى

نۇر-سۇلتان. قازاقپارات - گارۆارد ۋنيۆەرسيتەتى مەن امستەردام قولدانبالى عىلىمدار ۋنيۆەرسيتەتىنىڭ عالىمدارى ادام جاسىن ون جىلعا ۇزارتۋدىڭ جولدارىن انىقتادى.

ماماندار جۇرگىزگەن جۇمىس ناتيجەلەرى British Medical Journal جۋرنالىندا جاريالاندى. زەرتتەۋگە عىلىمي جۇمىس باستالعان كەزدە ەشقانداي اۋرۋمەن اۋىرماعان ءجۇز مىڭ 50 جاستان اسقان ادام قاتىستى. ولار 20 جىلدان استام ۋاقىت بويى باقىلاۋدا بولعان. كەيىن زەرتتەۋشىلەر قاتىسۋشىلارداعى جۇرەك- قانتامىر اۋرۋى، قاتەرلى ىسىك جانە 2 ءتيپتى قانت ديابەتى اۋرۋلارىنىڭ قاي جاستا پايدا بولعانىن جانە تاجىريبەگە قاتىسۋشىلاردىڭ قانشا ءومىر سۇرگەنىنە نازار اۋدارعان.

 ناتيجەسىندە ساراپشىلار ادام ءومىرىن قىسقارتۋعا سەبەپ بولاتىن نەگىزگى بەس فاكتوردى انىقتادى: تەمەكى شەگۋ، الكوگولدى كوپ تۇتىنۋ، مايى نەمەسە قانتى كوپ تاعامداردى تۇتىنۋ، دەنە قوزعالىسىنىڭ از بولۋى جانە ارتىق سالماق. وسى بەس فاكتورعا سۇيەنە وتىرىپ، عالىمدار 50 جاستاعى ادام قانشا جىل ءومىر سۇرەتىنىن انىقتادى.

زەرتتەۋ ناتيجەسىندە دۇرىس تاماقتانعان، فيزيكالىق بەلسەندى، تەمەكى جانە الكوگول تۇتىنباعان، قالىپتى دەنە سالماعىن ساقتاعان ايەل ادامدار ورتا ەسەپپەن 84,4 جىل ءومىر سۇرسە، كەرىسىنشە بۇل قاعيدالاردى ۇستانباعان ايەل ادامدار 73,7 جىل ءومىر سۇرگەن. ال اتالعان بەس قاعيدانى ۇستانعان ەر ادامدار ورتا ەسەپپەن 81,1 جىل ءومىر سۇرسە، سالاۋاتتى سالتىن ۇستانباعان ەر ادامدار ورتا ەسەپپەن 73,5 جىل ءومىر سۇرگەن.

www.24.kz