قان قىسىمىن ءدارى ىشپەي-اق ءتۇسىرىڭىز

نۇر-سۇلتان. قازاقپارات - كەي ادامدا قان قىسىمى دەرەۋ كوتەرىلىپ كەتىپ جاتادى، مۇندايدا جانىمىزدا ءدارى بولماسا نە ىستەۋگە بولادى؟

ونىڭ ۇستىنە ءدارىنىڭ پايداسىمەن بىرگە زيانى دا قاتار جۇرەتىنىن ەسكەرىڭىز. باستىسى جاعدايىڭىزعا بەيجاي قاراپ، قازىر ءوزى تۇسەدى دەپ شاراسىز وتىرا بەرمەي، قىسىمدى تومەندەتۋ امالدارىنا كىرىسىڭىز.

قان قىسىمى كوتەرىلۋىنىڭ بەلگىلەرى:

• ساۋساق ۇشتارى توڭۋى؛ • باس اينالۋى؛ • قۇلاق بىتەلۋى؛ • بەت قىزارۋى؛ • باس اۋىرۋى؛ • جۇرەك تۇسى جايسىزدانۋى؛ • مۇرىن قاناۋى. قان قىسىمىن ءتۇسىرۋ تاسىلدەرى:

تىنىس جاتتىعۋى

بۇل قان قىسىمىن 20 بىرلىككە تومەندەتىپ قانا قويماي، ادامدى تىنىشتاندىرۋعا دا كومەگى تيەدى. الدىمەن ىڭعايلى جەرگە وتىرىپ، دەنەڭىزدى بوس ۇستاڭىز. • اۋىزبەن دەم الىپ، ءبىراز كىدىرىڭىز؛ • مۇرىنمەن تەرەڭ تىنىستاڭىز؛ • مۇرىنمەن دەم شىعارىڭىز.

وسى جاتتىعۋدى بەس رەت قايتالاڭىز.

سۋ پروتسەدۋراسى

ەگەر ۇيدە بولساڭىز، قان قىسىمىن تۇسىرۋگە سۋدىڭ دا كومەگى بار. جىلى دۋش استىندا بىرنەشە ۋاقىت تۇرساڭىز، جانىڭىز تىنىشتالىپ، قان قىسىمىڭىز 30 بىرلىككە ازايادى. اياعىڭىزدى سۋعا سالىپ وتىرساڭىز دا تەز اسەر ەتەدى، بىرنەشە مينۋت ىشىندە قان قىسىمىڭىز ءتۇسىپ، جانىڭىز جاي تابادى.

كومپرەسس قويۋ

ارتەريالىق قان قىسىمىن ءتۇسىرۋ ءۇشىن تىزەدەن تومەن قىشا قاعاز تارتىپ قويۋعا دا بولادى، 5-10 مينۋتتان سوڭ الساڭىز، قىسىم 25 بىرلىككە تومەندەگەنىنە كوز جەتكىزەسىز. الما سىركەسۋىنان مويىنعا كومپرەسس قويساڭىز دا، 15 مينۋت ىشىندە قان قىسىمى تومەندەيدى.