الەمدىك تانىمال باسىلىم نۇر-سۇلتانداعى وتشاشۋ سۋرەتىن جاريالادى
ونىڭ ىشىنە نۇر-سۇلتانداعى ەسىل جاعاسىنداعى كوپىر سۋرەتى دە ەنگەن، دەپ حابارلايدى قازاقپارات ەلوردا اكىمدىگىنە سىلتەمە جاساپ.
«قازاقستان، نۇر-سۇلتانداعى ءتۇن. 2020 -جىل قارساڭىندا جاڭاجىلدىق مەرەكەلەردى كورسەتەتىن ءبىزدىڭ فوتوسۋرەتشىلەرمەن الەمدى ارالاڭىز. #nye2020» ، - دەپ جازىلعان National Geographic جۋرنالىنىڭ Instagram پاراقشاسىندا.
فوتوسۋرەتتى تانىمال امەريكالىق فوتوسۋرەتشى دجوردج شتاينمەتس (George Steinmetz) تۇسىرگەن.
«ول قازىر قازاقستان استاناسىندا «National Geographic» جۋرنالىنا قىسقى نۇر-سۇلتان تۋرالى فوتوماتەريالدار ازىرلەپ جاتىر. اسىرەسە دجوردج پاراگلايدەردەن (موتورلى پاراشيۋت) تۇسىرىلگەن بىرەگەي سۋرەتتەرىمەن تانىمال»، - دەپ حابارلادى نۇر-سۇلتان قالاسىنىڭ قوعامدىق دامۋ ىستەرى باسقارماسى.
ءوزىنىڭ 25 جىلدىق مانسابىندا دجوردج World Press Photo, Pictures of the Year، Overseas Press Club, Life Magazinە’s Alfred Eisenstadt Awards, National Science Foundation جۇلدەلەرىن جەڭىپ العان. National Geographic پەن GEO Magazine ونىڭ فوتوسۋرەتتەرىن ءجيى جاريالايدى.
Instagram جەلىسىندەگى National Geographic پاراقشاسىنا الەمنىڭ ءتۇرلى ەلدەرىنەن 128 ميلليون ادام جازىلعان.
ەسكە سالا كەتەيىك، قالا تۇرعىندارى مەن قوناقتارى وتشاشۋدى 1-قاڭتارعا قاراعان ءتۇنى ەسىل وزەنىنىڭ جاعاسىندا، بوتانيكالىق باق اۋماعىندا، ابىلاي حان داڭعىلى مەن پۋشكين كوشەسىنىڭ قيىلىسىندا ورنالاسقان الاڭدا تاماشالادى. وتشاشۋ جەرگىلىكتى ۋاقىت بويىنشا 00:00-دە باستالىپ، 7 مينۋتقا سوزىلدى. وتشاشۋدىڭ بيىكتىگى 210 مەتر، ەنى 250 مەتر.
وتشاشۋ ءۇشىن قالالىق بيۋدجەتتەن اقشا بولىنبەگەن، دەمەۋشىلەر ەسەبىنەن ۇيىمداستىرىلعان.
اۆتور: ايجان سەرىكجان قىزى
