قازاقستاندا شەتەلدىك بانكتەرگە فيليال اشۋعا رۇقسات بەرىلەدى
بۇل جايىندا ءماجىلىس دەپۋتاتتارىنىڭ رەسمي ساۋالىنا ق ر پرەمەر-ءمينيسترى اسقار ءماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«2020 -جىلدىڭ 16-جەلتوقسانىنان شەتەلدىك بانكتەرگە تىكەلەي فيليالدارىن اشۋعا رۇقسات بەرىلەدى. بۇل رەتتە قارجى سەكتورىنىڭ جاۋاپكەرشىلىگىن ساقتاۋ ماقساتىندا شەتەلدىك بانكتەردىڭ مينيمالدى جارعىلىق كاپيتالىنا تالاپ ساقتالادى. 2021 -جىلدىڭ 1-قاڭتارىنان باستاپ 2019 -جىلدىڭ 1-قاڭتارىنا دەيىن جاسالعان جەر قويناۋىن پايدالانۋشىلارعا ارنالعان كەلىسىمشارتتاردا قازاقستاندىق قامتۋ تالاپتارى الىنىپ تاستالادى. دەگەنمەن، ۇكىمەت وتپەلى كەزەڭ قورىتىندىسىنا وراي دۇنيەجۇزىلىك ساۋدا ۇيىمى مەن ەۋرازيالىق ەكونوميكالىق وداق تۇرعىسىندا رۇقسات بەرىلگەن وتاندىق ءوندىرىستى قولداۋدىڭ بالاما شارالارىن ازىرلەيتىندىگىن حابارلايمىز»، - دەدى اسقار مامين.
ونىڭ اتاپ وتۋىنشە، 2015 -جىلىدڭ 30 قازانىندا دۇنيەجۇزىلىك ساۋدا ۇيىمىنىڭ بارلىق مۇشە ەلدەرى قازاقستاندى قولايلى ينۆەستيتسيالىق احۋالدى قامتاماسىز ەتەتىن جانە حالىقارالىق قۇقىقتىق نورمالارعا ساي ساۋدا ساياساتىن جۇرگىزەتىن تەڭ سەرىكتەس رەتىندە مويىنداعان.
«قازاقستان د س ۇ-عا كىرگەن ساتتەن باستاپ ەل ەكونوميكاسىنا شامامەن 67 ميلليارد دوللار كولەمىندە تىكەلەي شەتەل ينۆەستيتسياسى تارتىلدى. ونىڭ ىشىندە وڭدەۋ ونەركاسىبىنە 19، قىزمەت كورسەتۋ سەكتورىنا 32 جانە مۇناي-گاز جانە ءوندىرۋ سەكتورىنا 46,5 پايىزى تيەسىلى. بۇعان قوسا، ەكونوميكانىڭ شيكىزاتتىق ەمەس سەكتورىنا، سونىمەن قاتار قىزمەت كورسەتۋ سالاسىنا ينۆەستيتسيا اعىنىنىڭ ارتۋى بايقالادى»، - دەپ اتاپ وتەدى ۇكىمەت باسشىسى.
اۆتور: مارلان جيەمباي
