ءومىرزاق شوكەيەۆ يتاليالىق ينۆەستورلارمەن كەزدەستى
ەكىجاقتى كەزدەسۋ بارىسىندا وتىرار اۋدانىندا قۋاتى 50 م ۆ ت قۇرايتىن كۇننەن قۋات الاتىن ەلەكتر ستانساسىنىڭ قۇرىلىسى تالقىلاندى.
شەتەلدىك ينۆەستورلاردىڭ ايتۋىنشا، كەلەسى جىلى باستالاتىن جوبانىڭ قۇرىلىسى 2021-جىلى تولىق اياقتالادى دەپ جوسپارلانۋدا. ءوز كەزەگىندە وبلىس اكىمى وڭتۇستىك ءوڭىرىنىڭ اۋا-رايى جەل مەن كۇن ەلەكتر قۋاتىن وندىرۋگە وتە قولايلى ەكەنىن اتاپ ءوتتى. سونىمەن قاتار، ەكى ەل اراسىندا ءتيىمدى بىرنەشە الەۋمەتتىك جوبالار مەن بىرلەسە جۇمىس ىستەۋدى ۇسىندى.
«يتاليا - قازاقستاننىڭ سەنىمدى سەرىكتەستەرىنىڭ ءبىرى. مەملەكەتتەرىمىز اراسىندا اۆتوكولىك، قۇرىلىس، اۋىل شارۋاشىلىعى سالاسىندا تابىستى دا ءتيىمدى قارىم-قاتىناستاردىڭ جوعارى دەڭگەيىنە قول جەتكىزىلگەنى بەلگىلى. تۇركىستان وبلىسىنىڭ دا كوزدەگەن باسىم باعىتتارىنىڭ ءبىرى - «جاسىل ەكونوميكا» سالاسى. ونىڭ ۇستىنە وڭىرىمىزدە ينۆەستورلار ءۇشىن قولايلى جاعدايلار جاسالعان. 2 ميلليوننان استام حالقى بار وڭىرىمىزدە بۇل جوبا ءتيىمدى بولارى ءسوزسىز»، - دەدى ءومىرزاق شوكەيەۆ.
قازاقستاندا «ENI» كورپوراتسياسىنىڭ «ArmWind» ەنشىلەس كومپانياسى ەلىمىزدە جۇمىس ىستەگەن ەكى جىلدىڭ ىشىندە جالپى قۋاتتىلىعى 150 مۆت بولاتىن ءىرى ءۇش جوبانى تابىستى جۇزەگە اسىرۋدا. بۇگىنگى تاڭدا كومپانيا جاسىل تەحنولوگيالاردى قولدانا وتىرىپ جاڭا جوبالاردى جۇزەگە اسىرۋ ارقىلى قازاقستان ەكونوميكاسىن دەكاربونيزاتسيالاۋعا ءساتتى ۇلەس قوسۋدا.
ايتا كەتەيىك، 1992-جىلدان باستاپ ENI قازاقستانعا 15 ميلليارد ا ق ش دوللاردان استام ينۆەستيتسيا سالعان.
