شەتەلدەن كوشىپ كەلەتىن قانداستاردىڭ قۇجاتىن راسىمدەۋگە ءبىر تەرەزە قاعيداتى ەنگىزىلەدى

نۇر- سۇلتان. قازاقپارات - نۇرسۇلتان قالاسىندا «وتانداستار قورى» كوممەرتسيالىق ەمەس اكسيونەرلىك قوعامى جانىنان قۇرىلعان قوعامدىق كوميسسيانىڭ كەزەكتى وتىرىسى وتكىزىلىپ، وندا رەپاترياتسيا پروتسەستەرىن رەتتەۋ ماسەلەلەرى قارالدى، دەپ حابارلايدى قازاقپارات.

سونداي- اق، ق ر سىرتقى ىستەر مينيسترلىگىنىڭ شەتەلدەگى قازاقتاردى قولداۋ جونىندەگى شارالار تۋرالى اقپاراتى مەن وتانداستار قورىنىڭ 2019 -جىلعى جۇمىس قورىتىندىسى تىڭدالدى.

«وتانداستار قورىنىڭ» ۆيتسە- پرەزيدەنتى ماعاۋيا سارباسوۆ «شەتەلدەگى قازاقتاردى جانە رەپاترياتسيانى قولداۋ باعىتىندا ىسكە اسىرىلىپ جاتقان جوبالاردىڭ ءبىرى - الەم بويىنشا جۇمىس ىستەيتىن، بارلىق مادەني- ىسكەرلىك ورتالىقتاردى (قازىرگى كەزدە الەم بويىنشا 250-دەن استام) بىرىكتىرەتىن، «قازاق ءۇيى» جوباسىن اتاپ ءوتتى. «قازاق ءۇيى» - ۇكىمەتتىك ەمەس، ساياساتتان تىس جانە كوممەرتسيالىق ەمەس جوبا جانە 4 باعىتتا قىزمەت اتقارادى، ولار: «اباي» مادەني ورتالىعى، «اتامەكەن» ىسكەرلىك ءۇيى، «جاس قازاق» جاستار كلۋبى جانە «اتاجۇرت» شەتەلدىك قازاق ءتىلدى بۇقارالىق اقپارات قۇرالدارى قاۋىمداستىعى.

شەتەلدەگى قانداستارىمىزعا قولداۋ كورسەتۋ ماقساتىندا قۇرىلعان «وتانداستار قورىنىڭ» باستاماسىمەن ەلىمىزگە كوشىپ كەلەتىن سىرتتاعى​ قازاقتاردىڭ قۇجاتتارىن، مەملەكەتتەن بەرىلەتىن كومەكتەردى راسىمدەيتىن ءبىر تەرەزە قاعيداتى ەنگىزىلمەك.

پيلوتتىق جوبا موڭعولياداعى قازاقستان ەلشىلىگىندە جۇزەگە اسقالى وتىر. وسى مەملەكەتتەگى قانداستارىمىزدىڭ بارلىق قۇجاتتارى ەلشىلىگىمىز ارقىلى رەتتەلىپ، اتامەكەنگە كەلۋ ءۇردىسى جەڭىلدەتىلمەك. بۇل جوبا بىرتىندەپ، بارلىق الەمدەگى قازاقتار تۇراتىن شەتەلدەردە قولعا الىنادى. وسىلايشا، «وتانداستار قورى» سوڭعى جىلدارى سايابىرسىعان كوشتى قايتا جانداندىرۋعا ىقپال ەتپەك.