ب ا ءا ەلشىسى ەلباسىنا «بەيبىتشىلىك كىلەمىن» تابىستادى
بۇل جونىندە ەلباسىنىڭ رەسمي سايتىنا سىلتەمە جاساپ قازاقپارات حابارلايدى.
كەزدەسۋ بارىسىندا ەكى جاقتى قاتىناستاردى نىعايتۋدىڭ، قازاقستان مەن ب ا ءا اراسىنداعى ءوزارا ءتيىمدى ىنتىماقتاستىقتى دامىتۋدىڭ، مادەني بايلانىستاردى كەڭەيتۋدىڭ ماڭىزدىلىعى جايلى ايتىلدى.
- قازاقستان تاۋەلسىزدىگىن العاننان بەرى ءبىزدىڭ قارىم-قاتىناسىمىز وتە قارقىندى دامىپ كەلەدى. ءبىز ءاردايىم ب ا ءا باسشىلىعىمەن تىعىز بايلانىستا بولدىق. وسىنىڭ ارقاسىندا ەلدەرىمىز اراسىنداعى ۆيزاسىز رەجيم ماسەلەسىن شەشتىك، رەيستەردىڭ سانىن كوبەيتتىك. بۇل تۋريستەردىڭ ارتۋىنا جول اشىپ، تۇتاستاي ەكونوميكالىق قاتىناستاردىڭ كەڭەيۋىنە اسەر ەتتى، - دەدى نۇرسۇلتان نازاربايەۆ.
ءوز كەزەگىندە مۇحاممەد ال-دجابەر ب ا ءا باسشىلىعى اتىنان قازاقستاننىڭ ودان ءارى تابىستى دامۋى مەن وركەندەۋىن تىلەي وتىرىپ، نۇرسۇلتان نازاربايەۆتى جانە قازاقستان حالقىن تاۋەلسىزدىك كۇنىمەن قۇتتىقتادى.
- قازاقستان - ورتالىق ازياداعى ماڭىزدى سەرىكتەستەردىڭ ءبىرى. ءبىز ۆيزاسىز رەجيم تۋرالى كەلىسىمگە قول جەتكىزۋدى وڭ باعالايمىز. بۇل كاسىپكەرلەر اراسىنداعى بايلانىست جەڭىلدەتۋگە جانە ينۆەستيتسيالىق بەلسەندىلىككە ىقپال ەتەدى، - دەدى ەلشى.
سونىمەن قاتار، ديپلومات نۇرسۇلتان نازاربايەۆقا مارتەبەلى شەيح فاتيما بينت مۇحاممەد بين ءزايدتىڭ گۋمانيتارلىق جوباسى اياسىندا جاسالعان «بەيبىتشىلىك كىلەمىن» تابىستادى.
ايتا كەتەيىك، «بەيبىتشىلىك كىلەمى» جوباسى كىلەم توقۋدىڭ ءداستۇرلى قولونەرىن ناسيحاتتاۋعا جانە سوعىس بەينەلەرىنىڭ وسى ونەرگە ەنۋىنە قارسى تۇرۋعا باعىتتالعان. جوبا اياسىندا قولونەرشىلەر بەيبىت جانە گۇلدەنگەن ءومىر تۋرالى وزدەرىنىڭ كوزقاراستارىمەن كىلەمدەر توقيدى.
ول اسكەري قاقتىعىس، جاۋىنگەرلەر مەن قارۋ-جاراق بەينەلەنگەن «سوعىس» تاقىرىبىنداعى اۋعان كىلەمدەرىن جاساۋ داستۇرىنە قارسى باعىتتالعان جوبا.
