يمانعالي تاسماعامبەتوۆتىڭ ورنىنا رەسەيگە كىم ەلشى بولادى
ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن مينيستر، قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆ كەتكەننەن كەيىن ونىڭ قىزمەتىن ۋاقىتشا كىم اتقاراتىنىن ايتىپ بەردى.
«كەڭەسشى- ەلشى اتقارادى. كەشە ارنايى بۇيرىققا قول قويدىم. نۇرجان قاجياقباروۆ ەلشىلىكتەگى ەكىنشى ادام، وعان رەسەي فەدەراتسياسىنداعى قازاقستان رەسپۋبليكاسى ىستەرىنىڭ ۋاقىتشا سەنىمدى وكىلى مىندەتى جۇكتەلدى. نۇرجان قاجياقباروۆ جاڭا ەلشى تاعايىندالىپ، رەسەي پرەزيدەنتىنە سەنىم گراموتاسىن تاپسىرعانعا دەيىن مىندەتىن اتقاراتىن بولادى»، - دەدى ول.
مينيستر ب ا ق وكىلدەرىنىڭ يمانعالي تاسماعامبەتوۆ سىرتقى ىستەر مينيسترلىگى جۇيەسىندە قىزمەتىن جالعاستىرا ما دەگەن ساۋالىنا دا جاۋاپ بەردى.
«ول زەينەت جاسىنا جەتۋىنە بايلانىستى ءوز ەركىمەن جۇمىستان شىقتى. سوندىقتان دا مەنىڭ تۇسىنۋىمشە، ول س ءى م جۇيەسىندە قالمايدى»، - دەدى م. تىلەۋبەردى.
بۇعان دەيىن مەملەكەت باسشىسى قاسىم-جومارت توقايەۆتىڭ جارلىعىمەن يمانعالي نۇرعالي ۇلى تاسماعامبەتوۆ زەينەتكەرلىك جاسقا تولۋىنا بايلانىستى قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى قىزمەتىنەن بوساتىلعانىن حابارلاعان ەدىك.
اۆتور: مارلان جيەمباي
