قازاقستاندا عارىش سالاسىنىڭ ماماندارىن دايارلايتىن جاڭا ورتالىق قۇرىلادى

نۇر- سۇلتان. قازاقپارات - «بايتەرەك» كەشەنىنە قاجەتتى عارىش سالاسى ماماندارىن دايارلايتىن ورتالىق قۇرىلادى. بۇل تۋرالى پارلامەنت ءماجىلىسىنىڭ جالپى وتىرىسىندا ءمالىم بولدى، دەپ حابارلايدى قازاقپارات ءتىلشىسى.

«بايتەرەك» عارىش زىمىران كەشەنىن قۇرۋ جوباسى «بايقوڭىر» عارىش ايلاعىن پايدالانۋ بويىنشا قازاقستاندىق- رەسەيلىك ءبىرىنشى جوبا بولىپ وتىر. بۇل ءوز كەزەگىندە قازاقستانعا عارىش اپپاراتتارىن وندىرۋدەن، ۇشىرۋعا دەيىن تولىق تەحنولوگيالىق تىزبەكتى قالىپتاستىرۋعا مۇمكىندىك بەرەدى. وتاندىق عارىش سالاسىن دامىتۋ بىلىكتى ينجەنەرلىك- تەحنيكالىق كادرلاردى دايارلاۋدى قاجەت ەتەدى. وسى ورايدا عارىش سالاسىندا بىلىكتى ۇلتتىق كادرلاردى دايارلاۋدىڭ ورتالىعى قۇرىلدى ما؟»، - دەپ سۇرادى دەپۋتات اباي تاسبولاتوۆ.

ءوز كەزەگىندە ق ر سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى اسقار جۇماعالييەۆ بۇگىندە قاجەتتى ماماندار دايارلىقتان ءوتىپ جاتقانىن اتاپ ءوتتى.

«بۇگىندە قازاقستاندا بەس ج و و عارىش سالاسى ءۇشىن ءتيىستى مامانداردى دايارلاۋدا. «بايتەرەككە» توقتالساق، ءبىز بايقوڭىردا تىكەلەي دايىندىقتان وتەتىن مامانداردى پايدالانۋدى ەسكەرىپ وتىرمىز. ماسكەۋ اۆياتسيالىق ينستيتۋتىنىڭ فاكۋلتەتى بار. ءبىز ولارمەن بىرگە جۇمىس ىستەۋدەمىز، اتالعان جوعارى وقۋ ورنىندا 200-گە جۋىق قىزمەتكەردى دايارلاۋدامىز. بۇل ستۋدەنتتەر دايىندىقتان وتكەننەن كەيىن، «بايتەرەكتە» جۇمىس ىستەي الادى»، - دەدى ا. جۇماعاليەۆ.

سونىمەن قاتار ۆەدومستۆو باسشىسى مامانداردى دايارلاۋ ورتالىعى قاشان قۇرىلاتىنىن ناقتىلادى.

«ءسىز اتاپ وتكەن ورتالىق مىندەتتى تۇردە قۇرىلاتىن بولادى. وندا ءبىزدىڭ قىزمەتكەرلەردى وقىتىپ، بىلىكتىلىگىن كوتەرەمىز. ەكىنشىدەن، وسى ورتالىقتا وقىتۋشىلار رەتىندە رەسەيلىك ارىپتەستەرىمىزدى دە شاقىرامىز. ورتالىقتى 2021 -جىلى قۇرامىز دەپ جوسپارلاپ وتىرمىز»، - دەدى مينيستر.

اۆتور رۋسلان عابباسوۆ