«التىن دومبىرا» ايتىسىندا فينالعا شىققاندار بەلگىلى بولدى
«Nur Otan» پارتياسىنىڭ قولداۋىمەن ق ر مادەنيەت جانە سپورت مينيسترلىگى مەن ب ق و اكىمدىگى ۇيىمداستىرعان جىلدىڭ قورىتىندى سايىسىنا بارلىعى 20 اقىن قاتىسىپ، باق سىنادى.
العاشقى جۇپتا-اق «التىن دومبىرا» يەگەرلەرى، باتىس قازاقستاندىق جانسايا مۋسينا مەن نۇر-سۇلتان قالاسىنان كەلگەن جانداربەك بۇلعاقوۆ ءسوز قاعىستىردى. مۇندا قازىلار القاسىنىڭ شەشىمىمەن جانساياعا 87 بال بەرىلسە، جانداربەكتىڭ ەنشىسىنە 85 بال ءتيدى.
بۇدان كەيىن ارقالىقتان كەلگەن ايتىستىڭ اقتاڭگەرى ايبەك قاليەۆ تاعى ءبىر ارداگەر اقىن، شىعىس قازاقستاندىق سەرىك قۇسانبايەۆتان باسىم ءتۇستى.
نۇر-سۇلتان قالاسىنىڭ وكىلدەرى اسەم ەرەجە قىزى مەن بەكزات اسقاروۆ ءوزارا سىنعا ءتۇستى. ەڭ جوعارى بالدىڭ (90) ءبىرى اسەمگە بەرىلدى.
پاۆلودارلىق اسپانبەك شۇعاتايەۆ پەن الماتىلىق شۇعايىپ سەزىمحان ايتىس كورىگىن ايرىقشا قىزدىردى. مۇندا اسپانبەكتىڭ باعى جاندى.
تارازدىق، قازىر الماتىدا تۇراتىن قانات مىرزاحان اقتوبەگە تۇرمىسقا شىعىپ، وسى ءوڭىردىڭ نامىسىن قورعاعان جەرلەس قارىنداسى ارۋنا كەرىمبەكپەن ايتىستى. قازىلار باسىمدىقتى قاناتقا بەردى.
قاراعاندىلىق ءومىرجان كوپبوسىنوۆ تا ايتىستىڭ جاس جۇلدىزى، وسكەمەندىك جۇلدىزاي ماراتبەك قىزىمەن سايىسىندا ەڭ جوعارى بالعا قول جەتكىزدى.
قوس قۇرداس، الماتىلىق قازىرەت بەردىحان مەن تۇركىستاندىق ءبىرجان بايتۋوۆتىڭ ايتىسى وتە قىزۋ بولدى. مۇندا ءبىر بال ايىرماشىلىعىمەن قازىرەت جەڭدى.
بيىلعى ايتىستاردا باعى جانىپ، رەيتينگتە الدا كەلە جاتقانداردىڭ ءبىرى، باتىس قازاقستاندىق تالعات مىقيدى ۇتقان الماتىلىق رۇستەم قايىرتاي دا 90 بال الدى.
تاعى ءبىر باتىس قازاقستاندىق باۋىرجان شيرمەدين ۇلى مەن قاراعاندىلىق ديدار قاميەۆتىڭ ۇپايلارى تەڭ بولدى. مۇندا جەڭىس باۋىرجاننىڭ ەنشىسىندە كەتتى.
ساحناعا ەڭ سوڭعى بولىپ شىققان «التىن دومبىرا» ايتىسىنىڭ ەكى دۇركىن يەگەرى، قىزىلوردالىق مۇحتار نيازوۆ اتىراۋلىق قۇرداسى شالقارباي ىزباساروۆپەن ايتىسىندا ناعىز بابىندا ەكەندىگىن بايقاتتى (90 بال).
اقىندار تاۋەلسىزدىك جولىنداعى بابالار كۇرەسى، ەلدىك پەن ەرلىككە قوسا بۇگىنگى كۇننىڭ وزەكتى ماسەلەلەرىن بارىنشا جىرعا قوستى. اراسىندا جاراسىمدى ازىلدەر، قاعىتپا قالجىڭدار دا بولماي قالعان جوق.
وسىلايشا جانسايا مۋسينا، ايبەك قاليەۆ، اسەم ەرەجە قىزى، اسپانبەك شۇعاتايەۆ، قانات مىرزاحان، ءومىرجان كوپبوسىنوۆ، قازىرەت بەردىحان، رۇستەم قايىرتاي، باۋىرجان شيرمەدين ۇلى جانە مۇحتار نيازوۆ فينالعا جولداما الدى.
«التىن دومبىرا» يەگەرى مەن جۇلدەگەرلەر 17- جەلتوقسان كۇنى انىقتالادى.
ەسكە سالا كەتەيىك، بۇدان بۇرىن ورالدا «التىن دومبىرا» رەسپۋبليكالىق اقىندار ايتىسىنىڭ وتەتىنىن جازعان بولاتىنبىز.
