جاپونيا يمپەراتورى قازاقستان حالقىنا وركەندەۋ تىلەدى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت ەلدەردىڭ باسشىلارىنان قۇتتىقتاۋ حاتتار مەن جەدەلحاتتار كەلىپ تۇسۋدە. قازاقپارات بۇل تۋرالى اقورداعا سىلتەمە جاساپ حابارلايدى.

ءوزىنىڭ قۇتتىقتاۋ حاتىندا جاپونيا يمپەراتورى نارۋحيتو قاسىم-جومارت توقايەۆقا باق-داۋلەت، ال قازاقستان حالقىنا وركەندەۋ تىلەدى.

گەرمانيا پرەزيدەنتى فرانك ۆالتەر-شتاينمايەر قاسىم-جومارت توقايەۆتى تاۋەلسىزدىك مەرەكەسىمەن قۇتتىقتاي كەلە: «قازاقستاندا تۇراتىن ەتنيكالىق نەمىستەر ءبىزدىڭ ەلدەرىمىزدىڭ اراسىندا «كوپىر» ورناتتى. ءسىزدىڭ ەلىڭىز بەن ايماعىڭىزدىڭ بولاشاعى ديالوگقا، رەفورمالارعا جانە اشىقتىققا باعىتتالعان. بۇل رەتتە گەرمانيا بولاشاقتا دا ءسىز ءۇشىن سەنىمدى سەرىكتەس بولىپ قالا بەرەدى»، - دەپ جازعان.

يوردانيا كورولى ابداللا II ءوزىنىڭ حالقى مەن ۇكىمەتى اتىنان ەلىمىزگە ۇزدىكسىز پروگرەسس پەن وركەندەۋ تىلەدى.

يتاليا پرەزيدەنتى سەردجو ماتتارەللا: «ۋاقىت وتە كەلە قالىپتاسقان ساياسات، ەكونوميكا جانە مادەنيەت سالاسىنداعى ىنتىماقتاستىق نىعايىپ كەلەدى. ءبىزدىڭ بايلانىستارىمىز نۇر-سۇلتان مەن ەۋروپالىق وداق اراسىنداعى قاتىناستاردىڭ اياسىندا دا ودان ءارى دامي بەرەتىنىنە سەنىمدىمىن»، - دەدى جەدەلحاتتا.

پولشا پرەزيدەنتى اندجەي دۋدا قازاقستاننىڭ ورتالىق ازياداعى ەڭ ماڭىزدى سەرىكتەس ەكەنىن اتاپ وتكەن. «ءبىزدىڭ مەملەكەتتەرىمىزدىڭ تىعىز بايلانىستارى ارتىپ كەلەدى. پولشا قازاقستاننىڭ الەمدىك ارەناداعى بەلسەندىلىگىن، اسىرەسە، ورتالىق ازياداعى قاۋىپسىزدىك، يادرولىق قارۋ تاراتپاۋ جانە مادەنيەتارالىق ديالوگ ماسەلەلەرىنە قاتىستى ۇستانىمىن جوعارى باعالايدى»، - دەپ جازعان جەدەلحاتتا.

يزرايل پرەزيدەنتى رەۋۆەن ريۆلين تاۋەلسىزدىك كۇنىنە ارنالعان قۇتتىقتاۋىندا، ەكى ەل اراسىنداعى يننوۆاتسيالىق جانە تەحنولوگيالىق بايلانىستاردىڭ ارتىپ كەلە جاتقانىن اتاپ وتكەن.

فينليانديا پرەزيدەنتى ساۋلي نيينيستە قاسىم-جومارت توقايەۆقا ساتتىلىك پەن زور دەنساۋلىق، ال قازاقستان حالقىنا بەيبىتشىلىك جانە گۇلدەنۋ تىلەدى. «ەلدەرىمىز اراسىندا بۇرىننان قالىپتاسقان وتە جاقسى دوستىق قارىم-قاتىناسىمىزدى ودان ءارى نىعايتا تۇسۋگە نيەتتىمىز»، - دەلىنگەن جەدەلحاتتا.

شۆەيتساريا كونفەدەراتسياسىنىڭ پرەزيدەنتى ۋلي ماۋرەر پرەزيدەنت قاسىم-جومارت توقايەۆتىڭ رەسمي قىزمەتىنە جانە قازاقستان حالقىنا جارقىن بولاشاق تىلەدى. ۋلي ماۋرەر قىركۇيەكتىڭ 24- كۇنى نيۋ-يوركتە جانە قاراشانىڭ 22-ىندە نۇر-سۇلتاندا بولعان كەزدەسۋلەرگە ريزاشىلىعىن ءبىلدىردى. «ءبىزدىڭ كەزدەسۋلەرىمىز ەلدەرىمىزدىڭ اراسىنداعى دوستىق بايلانىستاردى قايتا جاڭعىرتۋعا مۇمكىندىك بەردى. شۆەيتساريا ەكى تاراپتىڭ دا يگىلىگى ءۇشىن قازاقستان رەسپۋبليكاسىمەن بەرىك قارىم-قاتىناستاردى ساقتاۋعا نيەتتى»، - دەپ جازىلعان.

سەربيا پرەزيدەنتى الەكساندر ۆۋچيچ ءوزىنىڭ قۇتتىقتاۋ جەدەلحاتىندا: «ءسىزدىڭ ءوز ىسىڭىزگە ادالدىعىڭىزدىڭ ارقاسىندا ەلىڭىز تۇڭعىش پرەزيدەنت - ەلباسى نۇرسۇلتان نازاربايەۆ سالىپ كەتكەن سارا جولدان اينىماي دامىپ كەلەدى. وسىعان قۇرمەتىم شەكسىز. جولداۋىڭىزدا كونسترۋكتيۆتى جانە قوعامدىق ديالوگ - قازاقستاننىڭ تۇراقتىلىعى مەن گۇلدەنۋىنىڭ نەگىزى، دەپ اتاپ وتكەنسىز»، - دەپ جازعان جەدەلحاتتا.

موڭعوليا پرەزيدەنتى حالتمااگيين باتتۋلگا قاسىم-جومارت توقايەۆتى جانە قازاقستان حالقىن تاۋەلسىزدىك مەرەكەسىمەن قۇتتىقتادى. ول موڭعوليا مەن قازاقستان اراسىنداعى دوستىق قارىم-قاتىناستاردىڭ دامۋىن اتاپ ءوتتى. «الداعى ۋاقىتتا دا ساياسي قارىم-قاتىناستارىمىزدى ودان ءارى نىعايتىپ، ەڭ جوعارى دەڭگەيلەردە ءوزارا ساپارلارمەن بەلسەندى جانە جۇيەلى تۇردە الماساتىن بولامىز»، - دەپ جازعان جەدەلحاتىندا.

سونداي اق، قازاقستان تاۋەلسىزدىگىنىڭ 28 جىلدىعىنا وراي قاسىم-جومارت توقايەۆتىڭ اتىنا قۇتتىقتاۋ جەدەلحاتتارىن باحرەيىن كورولى شەيح حاماد بەن يسا ءال حاليفا، ليتۆا پرەزيدەنتى گيتاناس ناۋسەدا جانە رۋمىنيا پرەزيدەنتى كلاۋس ۆەرنەر يوحاننيس جولداعان.