كيەۆ تۇرعىندارى ەكى جىلدان بەرى قازاق ءتىلىن ۇيرەنىپ ءجۇر
بۇل - كيەۆ قالاسىنداعى «دوستىق» مادەني ورتالىعىنىڭ باستاماسى. مۇنداعى قازاق ءتىلىن ۇيرەنىپ جۇرگەن ۋكراينا ازاماتتارى مەن كيەۆتەگى قازاق دياسپوراسىنىڭ وكىلدەرى قازاق ەلىن تاۋەلسىزدىك مەرەكەسىمەن قۇتتىقتاپ، ىزگى تىلەكتەرىن جولدادى.
الەكساندر - اپتاسىنا ءبىر رەت وتەتىن قازاق ءتىلى كۋرسىنىڭ وقۋشىسى. ۋكراينا ازاماتىنىڭ قازاق تىلىنە دەگەن قۇرمەتى ەرەكشە. بۇل ساباقتى ەكى جىل بويى كيەۆتەگى «دوستىق» مادەني ورتالىعى ۇيىمداستىرىپ كەلەدى.
«بۇگىنگى ساباق قازاقستاننىڭ تاۋەلسىزدىك كۇنىنە ارنالدى. قازاقستاندى ەگەمەندىگىمەن قۇتتىقتايمىن. ەكى حالىق اراسىندا دوستىق ارتا بەرسىن، جاماندىق بولماسىن»، - دەيدى كيەۆ قالاسىنىڭ تۇرعىنى الەكساندر بازارنىي.
«الىپپە» جانە قازاق تىلىنە قاتىستى ادەبيەتتىڭ كوپ بولىگىن «دوستىق» مادەني ورتالىعى قازاقستاننىڭ ۋكرايناداعى ەلشىلىگىنەن العان. بولاشاقتا كىتاپ قورىن كەڭەيتىپ، تۋعان تىلگە قاتىستى قوسىمشا ساباقتى مادەني ورتالىق قازاقستانمەن ونلاين بايلانىس ارقىلى الۋدى جوسپارلاپ وتىر.
«بۇل جەردە تەك قازاقتار عانا ەمەس، وزگە ۇلتتىڭ وكىلدەرى دە بار. ۋكراينا حالقىنىڭ ازاماتى دا قۇلشىنىسىن تانىتىپ، قازاق تىلىنە دەگەن سۇيىسپەنشىلىگىن ءبىلدىرىپ، ۇيرەنىپ ءجۇر. ءار سەنبى سايىن ءبىز وسىندا باس قوسامىز. تۇراقتى ون قانداسىمىز كەلىپ، قازاق ءتىلىنىڭ تاريحىن، سالت-ءداستۇرىن، قازاقتان شىققان عۇلاما ازاماتتار جونىندە ماعلۇمات الادى. مۇنى ولار عانا ەمەس، سونىمەن قاتار بالالارىمىز - وسكەلەڭ ۇرپاقتىڭ دا بويىنا سىڭىرۋگە تىرىسامىز. ءبىز تاريحي وتانىمىزدان الشاقتا جۇرسەك تە، ءوزىمىزدىڭ انا تىلىمىزدە سويلەۋگە، سالت-ءداستۇرىمىزدى قاستەرلەپ قادىرلەۋگە، تاريحىمىزدى بىلۋگە وزىندىك سەپتىگىمىزدى تيگىزىپ جاتقان جايىمىز بار»، - دەيدى «دوستىق» قازاق مادەني ورتالىعى ءتوراعاسىنىڭ ورىنباسارى باتىر نيازبەكوۆ.
قازاق دياسپوراسى باس قوسقاندا مول داستارحان جايىلادى. بۇگىن دە ۇلتتىق تاعام تۇرلەرى ۇستەل اجارىن اشا ءتۇسىپتى. توردە تۋىمىز ءىلىنىپ تۇر. ەڭ باستىسى، مۇندا قازاق دياسپوراسىنىڭ وكىلدەرى ءبىر-بىرىمەن انا تىلىندە سويلەسەدى. ءبىر ءسات حالىق انىنە دە ورىن بەرىپ، ارنا ارقىلى ەلگە ىستىق سالەمىن جولدايدى.
