ەت اعزاعا زيان با؟

نۇر- سۇلتان. قازاقپارات- سوعىم... ءيا، قىس ناعىز سوعىم ماۋسىمى عوي قازاق حالقىندا.

جالپى، وسى ەتتىڭ اعزاعا قانداي پايدالى قاسيەتى بار ەكەنىن بىلەمىز بە؟

بۇگىن سوعىم ەتتەرىنىڭ تەك پايداسى جونىندە ايتايىق.

باسقا ءتورت تۇلىككە قاراعاندا قويدىڭ ەتىندە A1 ، B12 , B1 دارۋمەندەرى مول.

قوي ەتىنىڭ قۇرامىندا كالتسي مەن فوسفور كوپ بولعاندىقتان، جارانىڭ نەمەسە ىسىكتىڭ بەتىنىڭ تەز قايتۋىنا كومەكتەسەدى.

قويدىڭ ەتىنە قاراعاندا ەشكىنىڭ ەتى اۋىر بولادى ەكەن. ال قويدىڭ ەتى دەنەدەگى جىلۋ مەن ءال- اۋقاتتى ارتتىرادى، سونىمەن قاتار دەنەدەگى جەلدى باسىپ، تابەتىڭىزدى دە اشادى.

جىلقى ەتىن ۇناتپايتىن قازاق جوق. ءدامى ءتىل ۇيىرەتىن قازى- قارتا قازاقتىڭ ۇلتتىق تاعامى. ونىڭ دەنساۋلىققا تيگىزەر پايداسى دا كوپ.

ماسەلەن، ول ءىرىڭدى توقتاتىپ قانا قويماي، بۇيرەك پەن بەلدى جەلدەن تازارتادى ەكەن.

سونىمەن قاتار، جۇرەك-قان تامىر اۋرۋلارىنا، بۋىن سۇيەكتەرىنىڭ سىرقىراۋىنا، ىشكى اعزانىڭ دۇرىس جۇمىس جاساۋىنا تيگىزەر اسەرى مول جانە اعزا جاسۋشالارىن جاڭارتىپ وتىرادى. ياعني ەرتە قارتايۋدىڭ الدىن الادى.

سيىردىڭ ەتى تەز قورىتىلمايدى جانە مايلى بولىپ كەلەدى. الايدا ول بۇيرەك، بەل مەن باستان ۇستاعان سۋىقتى شىعارۋعا كومەكتەسەدى.

جالپى مال اتاۋلىنىڭ ءبارى جاسىنا قاراي سەمىرەدى. سوندىقتان جاسى ۇلكەيگەن سايىن ەتىنىڭ مايلىلىعى دا ارتا تۇسەدى.

سيىر ەتىنىڭ مايىندا قانىققان ماي قىشقىلدارى باسىم. مايى توڭداپ تۇرادى جانە ول اعزاعا تۇسكەندە حولەستەرين ۇلەسىنىڭ ارتۋىنا سەبەپ بولادى. سول سەبەپتى ەتىندە گەموگلوبين، اقۋىز، دارۋمەندەر جىلقى ەتىنە قاراعاندا الدەقايدا از.