ماسكەۋدە قازاقستاننىڭ تاۋەلسىزدىك كۇنىنە وراي سالتاناتتى شارا ءوتتى
رەسەي استاناسىنىڭ «لوتتە موسكۆا» اتتى قوناق ۇيىندە قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى قابىلداۋ كەشى ءوتتى. وسى كەشتىڭ مارتەبەلى مەيماندارىنىڭ اراسىنان رەسەي فەدەراتسياسى پرەزيدەنت اكىمشىلىگى، ۇكىمەتتىڭ جانە سىرتقى ىستەر مينيسترلىگىنىڭ وكىلدەرى، الەمنىڭ تۇكپىر-تۇكپىرىندە ورنالاسقان مەملەكەتتەردىڭ ديپلوماتيالىق كورپۋس جەتەكشىلەرى جانە حالىقارالىق ۇيىمدار، عالىمدار مەن مادەنيەت قايراتكەرلەرى، تانىمال قازاق-رەسەي جۇلدىزدارى جانە قازاق دياسپوراسىنىڭ وكىلدەرى بولدى.
ءداستۇر بويىنشا كەش قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆتىڭ سالتاناتتى قۇتتىقتاۋىمەن اشىلدى. ول ءوز سوزىندە وتانىمىزدىڭ تاۋەلسىزدىك تۇعىرىن 28 جىل ىشىندە بارلىق الەمدىك قاۋىمداستىق جانە ەتنوستار وكىلدەرى مويىنداعانىن اتاپ ءوتتى. ونىڭ سوزىنشە، قازاقستاندى شەت ەلدەردە تولەرانتتىلىققا، كونفەسسيالىق جانە مادەنيارالىق كەلىسىمگە قول جەتكىزۋگە باعىتتالعان دايەكتى ىشكى ساياسات جۇرگىزەتىن مەملەكەت دەپ بىلەدى.
«قازاقستان جوسپارلانعان ەكونوميكادان باسەكەگە قابىلەتتى نارىقتىق ەكونوميكاعا كوشۋ ءۇردىسىن ءساتتى وتكىزدى جانە بۇل جۇيەنىڭ بارلىق تەتىكتەرى مەن زاڭنامالىق نەگىزدەرىن قۇراستىرا ءبىلدى. قازاقستان ەۋرازيالىق كەڭىستىكتەگى ينتەگراتسيانىڭ لوكوموتيۆى بولىپ تابىلادى. ەلىمىزدىڭ قارقىندى دامۋى مەملەكەتكە ءومىردىڭ بارلىق سالالارىن ودان ءارى رەفورمالاۋعا مۇمكىندىك بەرەدى»، - دەپ اتاپ ءوتتى ديپلوماتيالىق ميسسيانىڭ باسشىسى.
ءسوزىنىڭ سوڭىندا ول قازاقستان حالقىن تاۋەلسىزدىك كۇنىمەن قۇتتىقتاپ، بارلىعىنا باقىت پەن زور دەنساۋلىق تىلەدى. ءوز كەزەگىندە رەسەي فەدەراتسياسى سىرتقى ىستەر ءمينيسترىنىڭ ورىنباسارى الەكساندر پانكين بۇگىنگى تاڭدا قازاقستان دامىعان ەكونوميكاسى مەن حالىقتىڭ ءومىر ءسۇرۋ دەڭگەيى، مادەني كەلبەتى ايقىن، زاماناۋي، دەموكراتيالىق، كوپ ۇلتتى مەملەكەت ەكەندىگىنە نازار اۋداردى.
«رەسەي مەن قازاقستان حالىقتارى تاتۋ كورشىلەر رەتىندە ءومىر ءسۇرىپ، ەكونوميكالىق جانە الەۋمەتتىك دامۋ ماسەلەلەرىن بىرلەسە شەشەدى، تۋىنداعان قيىندىقتاردى بىرگە جەڭەدى. باۋىرلاس قازاقستان حالقىنا بارلىق جاقسىلىقتاردى تىلەيمىن»، - دەپ قورىتىندىلادى الەكساندر پانكين.
سونىمەن قاتار، بۇل كەشتە ءار جەردەن قازاقستان حالقىنا جولدانعان قۇتتىقتاۋلار ەستىلدى. ساياسات تانۋشى، كاسپي ىنتىماقتاستىعى ينستيتۋتىنىڭ ديرەكتورى سەرگەي ميحەيەۆ تاۋەلسىز قازاقستاننىڭ باستى جەتىستىگى - بۇل كەدەرگىسىز تۇراقتى دامۋ ەكەنىنە سەنىم ءبىلدىردى.
«ءبىزدىڭ قيىن-قىستاۋ كەزەڭىمىزدە ۇزدىكسىز العا قادام باسۋ - ونىڭ ءوزى ۇلكەن جەتىستىك. قيىندىقسىز تۇراقتى دامۋدى قامتاماسىز ەتەتىن قازاقستان ءۇشىن بۇل پوستكەڭەستىك كەڭىستىكتەگى جانە ودان تىس ايماقتار ءۇشىن دە ءساتتى ءۇردىس. سوندىقتان مەن قازاقستان حالقىن مەرەكەمەن قۇتتىقتايمىن جانە بارلىعىڭىزعا جاقسىلىق تىلەيمىن».
ماقتان تۇتار ازاماتتارىمىزدىڭ ءبىرى، كينورەجيسسەر تيمۋر بەكمامبەتوۆ تە ءوز جەرلەستەرىن مەرەكەمەن قۇتتىقتادى.
«تۋعان جەرىمدە بولماعانىم ءۇشىن وكىنەمىن، ءبىراق جانىممەن ءارقاشان سىزدەرمەن بىرگەمىن. بارلىقتارىڭىزعا تەك ساتتىلىك تىلەيمىن، ال قالعانىن ادامدار وزدەرى شەشەدى»، - دەدى ول.
سالتاناتتى قابىلداۋ بارىسىندا قوناقتار تەك پىكىر الماسىپ قانا قويماي، سونىمەن بىرگە بىرنەشە ساعات بويىنا قازاقستانعا ساياحاتقا شىعا الدى. مۇنداي مۇمكىندىكتى قوناقتارعا سەرىك زاكاريا جەتەكشىلىك ەتەتىن «ارايلى اقتوبە» فولكلورلىق انسامبلىنىڭ ارتىستەرى، قازاقستاندىق سۋرەتشىلەر مەن ايگىلى ءمۇسىنشى مارات عابدراحمانوۆتىڭ كورمەسى سىي ەتتى.
ءىس-شارانىڭ شارىقتاۋ شەگى قازاقتىڭ ۇلتتىق تاعامدارىمەن تانىسۋ بولدى. قوناقتارعا ءتۇرلى تاعامدار مەن سۋسىندار ۇسىنىلدى. سونداي-اق، كەش قوناقتارىنىڭ ءبارى فوتوسەسسياعا قاتىستى.
