قازاقستاندا جۇمىس ىستەۋ ءتيىمسىز بە؟

نۇر-سۇلتان قازاقپارات - بۇگىندە، الەۋمەتتىك جاعدايىن كوتەرۋدى ويلاپ مۇحيت اسىپ جۇمىس ىستەپ جاتقان قانداستارىمىز قانشاما.

ءبارىنىڭ ويلاعانى وتباسىنىڭ، بالا-شاعانىڭ قامى. بۇگىنگى اسى مەن كيەر كيىمى، ەرتەڭگى ءبىلىمى ءۇشىن بارىن سالۋدا. ال، ءوز ەلىندە ءبىلىم- الىپ، ديپلومىن ساندىقتىڭ تۇبىنە تاستاپ، وزدەرى شەت ەلگە كەتىپ، ونداعى قارا جۇمىستىڭ باسى قاسىندا جۇرگەنى بار. ءبارى دە قۇر قۇلقىننىڭ قامى ءۇشىن. ال، جاستاردىڭ كەشە عانا وقۋىن ءبىتىرىپ، بۇگىن ەلىمىزدىڭ شەكاراسىنان اسىپ، وزگە ەلدىڭ توپىراعىن باسۋىنا نە سەبەپ بولۋى مۇمكىن؟ وسى تاقىرىپ توڭىرەگىندە جاستارعا ساۋال تاستاپ كورگەن ەدىك.

ماقساتتىڭ جاسى 22 دە. اۋىلدىڭ قاراپايىم بالاسى. جوعارعى ءبىلىمى دە جوق. سوعان قاراماستان ەل قاتارلى جۇمىس ىستەپ ءناپاقاسىن تاۋىپ جۇرگەن جىگىت. سوڭعى ەكى جىلدىڭ ىشىندە ۇيلەنبەك نيەتى دە بار. سول ءۇشىن ءبىر ايدان سوڭ كورەيادا جۇمىس ىستەپ ءبىراز قاراجات جيىپ كەلەمىن دەيدى.

قازىر ماقسات سياقتى ويلايتىن جاستار وتە كوپ. ەكىنىڭ بىرىنەن ەستيتىنىمىز «پالەنشەنىڭ بالاسى رەسەيگە نەمەسە كورەياعا كەتىپ بارا جاتىر ەكەن» دەگەن قاۋەسەت. كەزىندە قىزعا قىرىق ۇيدەن تۇساۋ سالىپ، قاتاڭ ۇستاعان قازەكەم بۇگىندە بويجەتكەندەرىن وزدەرى شەت مەملەكەتكە شىعارىپ سالۋدا. بۇرىندارى باسقا ەلگە ساياحات پەن وقۋ ءۇشىن باراتىن جاستار بۇگىندە قارا جۇمىس ىستەۋ ءۇشىن اعىلۋدا. ەلىمىزدىڭ بولاشاعى دەپ بىلەتىن ۇمىتكەرلەر نەلىكتەن شەتەل اسىپ اقشا تابۋعا قۇمار؟ ءوز ەلىندە جۇمىس ىستەۋ ولارعا ءتيىمسىز بولعانى ما؟ بۇل سۇراقتىڭ جاۋابىن وزدەرىنەن سۇراپ كورەلىك.

مۇرات، كورەيادا (1995 ج)

ءيا، شىنىندا دا ماعان قازاقستاندا جۇمىس ىستەۋ ءتيىمسىز. ولاي دەيتىن سەبەبىم ايلىق از. مەن كورەيادا العان ءبىر ايلىق قارجىمدى مۇندا بىرنەشە اي ءجۇرىپ تابامىن. ول جاقتا ەڭبەكاقى ساعاتىنا تولەنەدى. قاراپايىم جۇمىسكەرلەرگە دە جاقسى قارىم-قاتىناس جاسايدى.

نۇرلان، رەسەي (1999 ج)

رەسەيدە بار بولعانى ەكى اي جۇمىس ىستەدىم. از ۋاقىت بولسام دا جاقسى قاراجاتپەن ورالدىم. ەندى تاعى دا بارماق نيەتىم بار. جالپى شىنى كەرەك، باسقا ەلمەن سالىستىرعاندا ەلىمىزدەگى جالاقى مولشەرى از. ءوز باسىم كوڭىلىم تولمايدى.

جوعارىداعى ەكى جىگىتتەن دە قانداي جۇمىس ىستەيتىندەرىن سۇرادىق. ءبىرى ءىرى عيماراتتا قۇرىلىسشى، ەكىنشىسى فابريكادا جۇك تاسۋشى بولعانىن ايتتى. ەكەۋىنىڭ سوزىنە سەنسەك ءبارى كەرەمەت. شەتەل اس تا، مول قارجىعا كەنەلە بەر. دەگەنمەن تاياقتىڭ ەكى ۇشى بولاتىداي ءار نارسەنىڭ پايداسى مەن زيانى بار. جاۋاپ العان ءۇشىنشى كەيىپكەرىمىز جوعارىداعى جىگىتتەردىڭ سوزىنە مۇلدەم كەراعار پىكىر ءبىلدىردى.

اينۇر، كورەيا (1991 ج)

مەن التى اي كورەيادا بەلگىلى رەستوراندا ىدىس جۋۋشى بولىپ ىستەدىم. باستاپقىدا ءبارى دۇرىس بولىپ كورىنگەنىمەن كەيىننەن وكتەمدىك جاساي باستادى. ءارتۇرلى سەبەپتەرمەن اقشامىزدى قىسقارتىپ تاستايتىندى شىعاردى. مەن التى اي وندا قارجىنى قىرىپ تاپقاندىقتان ەمەس، اتا-انامنان جولعا دەپ قيناپ الىپ كەتكەن اقشامدى ءوندىرىپ الۋ ءۇشىن امالدىڭ جوعىنان ءجۇردىم. قانشا تابىس تاپساڭ دا ءوز ەلىڭە جەتپەيدى. اسىرەسە، قىز بالا ءۇشىن ول جاقتا ءومىر ءسۇرۋ وتە قيىن.

قالاي دەسەك تە وڭاي جەردە نان جوق. وزگە ەلگە وقۋعا بارساڭىز ءبىر ءجون، ال ءسىز قارا جۇمىس ىستەۋ ءۇشىن شەتەلگە شىعار ما ەدىڭىز؟ نەمەسە ءبىزدىڭ مەملەكەت حالىقتىڭ شەتەلدەگىدەي ءومىر ءسۇرىپ، قارجى تابۋىنا ىقپال ەتە الماي ءجۇر مە؟ قازىر ادامدى كوك قاعازعا تاۋەلدى ەتكەن مىنا زاماندا ءومىر ءسۇرۋ وڭاي ەمەس. قاعازىم از ەدى دەپ سىرتقا قاراي تەلمىرگەننەن اسقان قورلىق جوق. كوڭىلىڭىز توق، قالتاڭىز كوپ بولسا امالسىزدان وزگە ەلدىڭ قارجىسىنا كوز سالماس ەدىڭىز.

قۋاتتى ەل بولامىز دەسەك ماقسات سياقتى جاستاردىڭ ويىن وزگەرتۋ كەرەك.  قىزىق، ال ول ءۇشىن ەڭ ءبىرىنشى نە ىستەۋ قاجەت.

عاليا بيسەيىت، قوجا احمەت ياساۋي اتىنداعى ح ق ت ۋ-دىڭ 3 كۋرس ستۋدەنتى