قازاق تىلىندەگى ۇزدىك سايتتار انىقتالدى

نۇر- سۇلتان. قازاقپارات - «ۇزدىك قازاقءتىلدى ينتەرنەت- سايت سىيلىعى» بايقاۋىنىڭ جەڭىمپازدارى انىقتالدى، دەپ حابارلايدى قازاقپارات تۇڭعىش پرەزيدەنت قورىنىڭ باسپا ءسوز قىزمەتىنە سىلتەمە جاساپ.

ينتەرنەت- سايت بايقاۋىنىڭ ماراپاتتاۋ ءراسىمى ءوتتى. بايقاۋ ۇيىمداستىرۋشىسى - مەملەكەتتىك ءتىلدى دامىتۋ قورى.

ماراپاتتاۋ راسىمىنە قازاقستان رەسپۋبليكاسى تۇڭعىش پرەزيدەنتى - ەلباسى قورى اتقارۋشى ديرەكتورىنىڭ ورىنباسارى الكەي مارعۇلان، ق ر  پارلامەنت سەناتىنىڭ دەپۋتاتى نۇرتورە ءجۇسىپ، مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ، سونىمەن قاتار قوعام قايراتكەرلەرى مەن ب ا ق وكىلدەرى قاتىستى.

ەڭ ۇزدىك قازاقءتىلدى ينتەرنەت سايت بايقاۋى 2016 -جىلدان باستاپ ءداستۇرلى تۇردە وتكىزىلىپ كەلەدى. بيىل رەسپۋبليكانىڭ ءار ايماعىنان 30-عا جۋىق ۇمىتكەر ۇزدىك سايت اتاعى ءۇشىن باق سىناستى. جەڭىمپازدار 9 نوميناتسيا بويىنشا انىقتالدى.

ماراپاتتاۋ ءراسىمىنىڭ اشىلۋىندا الكەي مارعۇلان ۇلى:

«وسى بايقاۋدى ۇيىمداستىرا وتىرىپ، ءبىز مەملەكەتتىك ءتىلدىڭ دامۋىن، ونىڭ ىشىندە ينتەرنەتتەگى دامۋىن قولدايمىز جانە قازاق ءتىلدى سايتتاردىڭ قىزمەتىن ىنتالاندىرامىز. بايقاۋعا دەگەن قىزىعۋشىلىق جىلدان- جىلعا ارتىپ كەلە جاتقانىنا قۋانىشتىمىن»، - دەپ اتاپ ءوتتى.

«وتكىر ءتىل» اتالىمى بويىنشا qalamger.kz سايتى جەڭىمپاز اتاندى.

«رۋحاني ازىق» اتالىمىنداعى ەڭ ۇزدىك سايت ماراپاتىنا madeniportal.kz سايتى يە بولدى.

dasturkb.kz سايتى «تەرەڭ ىزدەنىس» اتالىمى بويىنشا ۇزدىك دەپ تانىلدى.

Arasha.kz سايتى «شىنايى ءومىر» اتالىمىندا ۇزدىك دەپ باعالاندى.

«سپورت تىنىسى» اتالىمى بويىنشا ەڭ ۇزدىك سايت - qsport.kz.

«ءبىلىم بۇلاعى» اتالىمى بويىنشا جۇلدە ozattar.kz سايتىنا بەرىلدى.

«جاستار الەمى» اتالىمى بويىنشا balbal-kz سايتى جەڭىمپاز اتاندى.

«بالالارعا بازارلىق» اتالىمىنداعى ەڭ ۇزدىك بالالارعا ارنالعان سايت ماراپاتى imektep.kz پورتالىنا بەرىلدى.

«ويىن- ساۋىق» اتالىمى بويىنشا جۇلدە kinostan.kz سايتىنا بەرىلدى.

بايقاۋ جەڭىمپازدارى ق ر تۇڭعىش پرەزيدەنتى - ەلباسى قورىنىڭ ديپلومىمەن، 385 مىڭ تەڭگە كولەمىندەگى اقشالاي سىيلىقپەن ماراپاتتالدى.

تۇڭعىش پرەزيدەنتى قورى اتقارۋشى ديرەكتورىنىڭ ورىنباسارى الكەي مارعۇلان ەلەكتروندى اقپاراتتىق كەڭىستىكتەگى مەملەكەتتىك ءتىلدىڭ دامۋىنا ءوز ۇلەستەرىن قوسىپ، اۋديتوريانى قازاق تىلىندە اقپاراتتاندىراتىن وتاندىق سايتتاردىڭ ءرولىن ەرەكشە اتاپ ءوتتى.

ەسكە سالا كەتەيىك، بۇعان دەيىن وتكىزىلگەن ءۇش بايقاۋدىڭ قورىتىندىسى بويىنشا رەسپۋبليكانىڭ 25 قازاقءتىلدى سايتى جەڭىمپاز اتانىپ، اقشالاي سىيلىققا يە بولعان.