تارازدىق دانىشپان بالا حالىقارالىق كونكۋرستا جەڭىمپاز اتاندى
ايرىقشا مۇقتاجدىعى بار بالالارعا ارنالعان اقپاراتتىق تەحنولوگيالار سالاسىنداعى بۇل ءداستۇرلى بايقاۋ 2011 -جىلدان بەرى وتكىزىلىپ كەلە جاتىر. IT سالاسىنداعى تالانتتى جاستاردى قولداۋعا باعىتتالعان اتالعان حالىقارالىق كونكۋرسقا وسى توپتاعى 13-22 جاس ارالىعىنداعى جاستار قاتىسا الادى.
بيىل بۇل بايقاۋ وڭتۇستىك كورەيانىڭ پۋسان قالاسىندا 26-28 -قاراشا كۇندەرى وتكەن بولاتىن. LG كومپانياسىنىڭ Pacific Ocean ەلدەرىنە ارنالعان بىرەگەي بايقاۋىنا بيىل 20 ەلدەن 300 ۇمىتكەر قاتىستى. جەرلەسىمىز اقپاراتتىق تەحنولوگيا سالاسىنداعى ەڭ ۇزدىك ايتي ماماندار ىشىنەن «ەLifeMap» اتالىمىندا توپ جارىپ، «Best Award» باس جۇلدەسىن جەڭىپ الدى.
ەسكە سالا كەتەيىك، يسااك مۋستوپۋلو - «ۇيلەسىم تەورياسى» جوباسىنىڭ اۆتورى. ول تاراز قالاسىندا تۋعان. تۋمىسىنان سال اۋرۋىنا شالدىقسا دا، عىلىم- ءبىلىم جولىندا ەشقانداي كەدەرگى بولماۋ كەرەگىن حوكينگتەن كەيىن دالەلدەگەن تۇلعا رەتىندە تاريحتا قالۋى بەك مۇمكىن. يسااك بريتان كەڭەسى مەن National Agency for Technological Development ۇيىمداستىرعان مۇمكىندىگى شەكتەۋلى جاندارعا ارنالاعان STEM ۇلتتىق يننوۆاتسيا كونكۋرسىندا «ۇيلەسىم تەورياسى» اتتى ۆيدەوروليگى ءۇشىن ارنايى جۇلدەگە يە بولعان. ءوز ۆيدەوسىندا ول عارىش اپپاراتتارى ءۇشىن ەلەكتر قۋاتىن ءوندىرۋ جولىن سيپاتتاپ بەرگەن بولاتىن.
15 جاسىندا عارىش كەمەلەرىنە ارنالعان ەلەكتروەنەرگيانى ءوندىرۋ جولدارىن پايىمداعان. وسىدان كەيىن ايگىلى ۇلى بريتانيالىق استروفيزيك، پروفەسسور ستيۆەن حوكينگپەن كەزدەسكەن بولاتىن.
اۆتور: عيبرات سەمباي
