ساداقاعا ارنالعان تەرمينالدار ءدىني باسقارمانىڭ اشىقتىققا ۇمتىلىپ وتىرعانىن دالەلدەيدى - مينيستر ابايەۆ

نۇر-سۇلتان. قازاقپارات - مەشىتتەردە ساداقا سالۋعا ارنالعان ەلەكتروندى تەرمينالدىڭ ورناتىلۋى - قازاقستان مۇسىلماندارى ءدىني باسقارماسىنىڭ اشىقتىقتى قولدايتىنىن دالەلدەيدى.

«اشىق ديالوگ» باعدارلاماسىندا ق ر اقپارات جانە قوعامدىق دامۋ ءمينيسترى داۋرەن ابايەۆ وسىلاي دەدى، دەپ حابارلايدى قازاقپارات ءتىلشىسى.

«بۇل وتە ماڭىزدى جۇمىس. بۇل باستامانىڭ ءوزىن قازاقستان مۇسىلماندارى ءدىني باسقارماسىنىڭ باستاپ وتىرعانى ەرەكشە قۋانتادى. بۇل دەگەنىڭىز - ءدىني باسقارمامىزدىڭ اشىقتىقتى، ەسەپ بەرۋدى قولداپ وتىرعانىن دالەلدەيدى. سول سەبەپتى، تەرمينالداردى ورناتىپ، حالىققا ءتۇسىندىرۋ جۇمىستارىن جۇرگىزۋ - بۇكىل ەل بويىنشا قولعا الىنادى»، - دەدى داۋرەن ابايەۆ.

مينيستر بۇل باعىتتاعى كەلەسى قادام - موبيلدى قۇرىلعى، بانك كارتالارى ارقىلى قۇربان شالۋ باستاماسى بولاتىنىن اتاپ ءوتتى.

«ول نە بەرەدى؟ ول ەڭ الدىمەن ازاماتتارعا اۋدارعان قاراجاتتىڭ مۇقتاج ادامدارعا انىق تاراتىلاتىنىنا كوزدەرىن جەتكىزىپ، سەنىم ۇيالاتادى. ول قاراجات مەشىت جۇمىسىن قولداۋعا، جاستاردى مەدرەسەلەردە وقىتۋعا، كوپتەگەن يگى ىسكە جۇمسالادى. قۇربان شالۋ - سەنىمگە كەلىپ تىرەلەدى. شالعان قۇربانى ءتيىستى جەرىنە باراتىنىنا كۇمان كەلتىرەتىن ازاماتتار بار. قازىر ونداي كۇدىكشىل ادامداردىڭ سانى ازايارى انىق»، - دەدى ول.

ەسكە سالا كەتسەك، كۇنى كەشە ەلورداداعى «ءالجان انا» مەشىتىندە ساداقا سالۋعا ارنالعان ەلەكتروندى تەرمينال ىسكە قوسىلعان بولاتىن.

اۆتور: ايان بەكەن ۇلى