يراكتان ورالعان بالالاردى تەزىرەك تۋىستارىنا تاپسىرۋعا تىرىسامىز – ب ع م

نۇر-سۇلتان. قازاقپارات – ق ر ءبىلىم جانە عىلىم ءمينيسترىنىڭ كەڭەسشىسى رايسا شەر يراكتان قايتارىلعان بالالارمەن قانداي ماماندار جۇمىس جۇرگىزىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«14 بالانىڭ 10 ى - مەكتەپكە ءالى بارماعان بالالار. تورتەۋى - وقۋشى. سىرتقى ىستەر مينيسترلىگى بعم مەن باسقا دا مەملەكەتتىك ورگانداردىڭ كومەگىمەن جاسوسپىرىمدەردى قايتارۋ جونىندە ارنايى ءىس- ارەكەت جوسپارىن بەكىتكەن بولاتىن. قازىرگى تاڭدا بالالاردىڭ ءبارى نۇر- سۇلتان قالاسىنىڭ ومىرلىك قيىن جاعدايدا قالعان بالالاردى قولداۋ ورتالىعىندا. ورتالىقتا بالالار ءۇشىن بارلىق جاعداي جاسالعان. مەديتسينالىق پەرسونال تولىق. اس ءمازىرى، كۇن ءتارتىبى تۇگەل بەكىتىلگەن. بالالارمەن ءارتۇرلى سالاداعى ماماندار جۇمىس جۇرگىزەدى. ولاردىڭ ىشىندە پسيحولوگتار، تاربيەشىلەر، مۇعالىمدەر مەن الەۋمەتتىك قىزمەتكەرلەر بار»، - دەيدى ءبىلىم جانە عىلىم ءمينيسترىنىڭ كەڭەسشىسى.

رايسا شەردىڭ ايتۋىنشا، كۇنى كەشە يراكتان قايتارىلعان بالالاردى 15 دارىگەر تەكسەرىپ، ءتيىستى پروتسەدۋرالاردى وتكىزگەن.

«بالالار ورتالىقتا جۇگىرىپ ويناپ، وزدەرىن جايلى سەزىنە باستادى. انالارىمەن بىرگە يراكتا تۇرعان بالالار ەش جەردە وقىماعان. ەشقانداي بالاباقشا نەمەسە مەكتەپكە بارماعان. سوندىقتان، ەكى كۇننىڭ ىشىندە ماماندار بالالاردىڭ پسيحولوگيالىق جاعدايىن تەكسەرىپ، ءبىلىمى مەن داعدىلارىن باقىلايدى. بىرنەشە كۇننەن كەيىن ءار بالامەن جەكە جۇمىس ىستەيتىن جەكە جوسپار ازىرلەنەدى. بارلىق ءتيىستى پروتسەدۋرا جۇرگىزىلگەننەن كەيىن بالالاردىڭ ءبارى تۋىستارىنا تاپسىرىلادى. تۋىستارى كۇنى كەشە ولاردى اۋەجايدان كۇتىپ العان بولاتىن»، - دەدى ول.

رايسا شەر يراكتان كەلگەن بالالاردىڭ احۋالى تۋرالى ايتتى.

«سيريادان ورالعان بالالار انالارىمەن بىرگە كەلدى. ال يراكتان كەلگەندەر اتا- اناسىز قايتتى. سوندىقتان، ولار اتا- انا قامقورلىعىنسىز قالعان بالالار ساناتىنا جاتادى. سول سەبەپتى، ءبىز تەزىرەك بارلىق ۇيىمداستىرۋ پروتسەدۋراسىن جۇرگىزىپ، بالالاردى تۋعان- تۋىستارىنا تاپسىرۋعا تىرىسامىز»، - دەدى ول.

ءمينيستردىڭ كەڭەسشىسى بالالاردىڭ ءبارى قوعامعا بەيىمدەلگەننەن كەيىن مەكتەپكە، بالاباقشالارعا بارىپ، جەرگىلىكتى اۋرۋحانالارعا تىركەلەتىنىن ايتىپ ءوتتى.

ال سىرتقى ىستەر ءمينيسترى ەرجان اشىقبايەۆتىڭ ايتۋىنشا، يراكتان قايتقان بالالار ءتىلدى جەتىك بىلەدى دەپ ايتۋ قيىن. ءقازىر ولارعا ورتالىقتا ارنايى دياگنوستيكا جۇرگىزىلەدى. جالپى، بالالار قازاقشا دا، ورىسشا دا تۇسىنەدى. بالالاردىڭ انالارى ءومىر بويىنا باس بوستاندىعىنان ايىرىلعان.

«ءبىزدىڭ رەسمي دەرەكتەرگە سايكەس، يراكتا قازاقستان بالالارى جوق. جالپى، وپەراتسياعا 57 ميلليون تەڭگە جۇمسالدى. بۇل قارجىنىڭ نەگىزگى بولىگى بالالاردى قايتارۋعا ارنالعان ۇشاقتى جالداۋ ءۇشىن جۇمسالعان. ال ەندى ساۋىقتىرۋ ماسەلەسى دە، باسقا پروتسەدۋرالار دا ورتالىق جانە جەرگىلىكتى مەملەكەتتىك ورگانداردىڭ بيۋدجەتىمەن قارجىلاندىرىلادى»، - دەدى ەرجان اشىقبايەۆ.

ەسكە سالا كەتسەك، ق ر پرەزيدەنتى قاسىم-جومارت توقايەۆتىڭ تاپسىرماسى بويىنشا جۇزەگە اسىرىلعان گۋمانيتارلىق اكسيا ناتيجەسىندە يراك تۇرمەسىندە ءوز انالارىنىڭ جانىندا جاتقان 14 قازاقستاندىق بالا قايتارىلعان بولاتىن.

اۆتور: ايان بەكەن ۇلى