پاريجدەگى «قورقىت اتا» مادەني ورتالىعى قانداستارعا قازاق ءتىلىن وقىتىپ جاتىر

نۇر-سۇلتان. قازاقپارات - فرانسيادا تۇراتىن ايگەرىم ەرساينوۆا اتتى وتانداسىمىز پاريجدەگى قورقىت اتا اتىنداعى قازاق مادەني ورتالىعىنىڭ جۇمىسى تۋرالى بايان ەتتى، دەپ حابارلايدى قازاقپارات ءتىلشىسى.

«مەن فرانسيادا قورقىت اتا اتىنداعى قازاق مادەني ورتالىعىن باسقارامىن. ءبىزدىڭ ورتالىق بالالارعا قازاق ءتىلى مەن قازاق ونەرىن ۇيرەتىپ، قازاق ءبيى، حالىقارالىق اسپاپتار، فورتەپيانو، قولونەر جانە توعىزقۇمالاق ۇيىرمەلەرىن ۇسىنادى. وعان قوسا ءبىز جىلىنا 12 مەرەكە وتكىزەمىز. قازاقستاننان كەلگەن انسامبلدەرگە گاسترولدەر ۇيىمداستىرىپ بەرەمىز. ماسەلەن، جاقىندا عانا استانا ميۋزيكل تەاترىنىڭ، اۋەزوۆ تەاترىنىڭ گاسترولىنە كومەك كورسەتتىك. «وتانداستار» قورى ۇيىمداستىرىپ جاتقان «قاستەرلى قالام» جوباسى اياسىندا فرانسيادا دا قازاق سىنىبى اشىلىپ جاتىر. انا ءتىلىن ۇمىتىپ بارا جاتقان جاستارعا قازاق ءتىلى ءپانىن وقىتۋدامىز»، - دەدى ەلوردادا وتكەن «وتانداستار. بولاشاققا باعدار» اتتى حالىقارالىق دوڭگەلەك ۇستەلىندە ونلاين رەجىمدە وتانداستارىندا جولداعان سالەمىندە.

ايگەرىم ەرساينوۆا ءوز سوزىندە «قاستەرلى قالام» جوباسىنىڭ جولعا قويىلعانىنا العىسىن ءبىلدىردى.

«وسىنىڭ ارقاسىندا كوپتەگەن ماسەلەلەردى شەشىپ جاتىرمىز. ماسەلەن، ناۋرىز مەرەكەسىن وتكىزگەن كەزدە «وتانداستار« قورى كوستيۋممەن، مەرەكە وتكىزۋگە قاجەتتى كەرەك- جاراقتارمەن كومەكتەسكەن ەدى. مەرەيتويىمىز العاشقى كەزدەن باستاپ- اق كەرەمەت دەڭگەيدە ءوتىپ جاتىر. بارىڭىزگە ساتتىلىك تىلەيمىن»، - دەدى ايگەرىم ەرساينوۆا.

ەسكە سالا كەتسەك، ق ر اقپارات جانە قوعامدىق دامۋ ءمينيسترى داۋرەن ابايەۆ بۇعان دەيىن شەتەلدەگى قانداستاردىڭ ءوز ءتىلىن ۇمىتپاي، وقۋىنا مۇمكىندىك جاساۋ ءۇشىن «قاستەرلى قالام» جوباسى جولعا قويىلعانىن ايتقان بولاتىن.

اۆتور: ايان بەكەن ۇلى