ءبىلىم ءمينيسترى مۇعالىمدەر جالاقىسى قالاي وسەتىنىن ايتىپ بەردى
بۇل تۋرالى بۇگىن ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تامىز كونفەرەنسياسىندا بەرگەن تاپسىرماسى اياسىنا الداعى 4 جىل ىشىندە مۇعالىمدەردىڭ جالاقىسى 2 ەسەگە ارتادى. بۇل كەلەسى جىلدان باستاپ مۇعالىمدەردىڭ جالاقىسى 25 پايىزعا كوبەيەدى دەگەن ءسوز. ارينە، وسى ماسەلە بويىنشا پەداگوگتاردىڭ ىشىندە ءبىراز ۇرەي دە بار. «جالاقىنى كوتەرگەندە بازالىق لاۋازىمدىق جالاقىنى الىپ، سونى عانا كوتەرە سالادى ەكەن» دەگەن سياقتى ويلار ايتىلۋدا. سوندىقتان بۇل ماسەلە پرەزيدەنتتىڭ بىزگە بەرگەن تاپسىرماسىنىڭ اياسىندا جالپى مۇعالىمنىڭ جالاقىسىنا قاتىستى بولادى دەپ ايتقىم كەلەدى جانە قاڭتار ايىنان باستاپ بۇل جۇمىس جۇرگىزىلەدى»، - دەدى ق ر پارلامەنتى ءماجىلىسىنىڭ جالپى وتىرىسىندا «پەداگوگ مارتەبەسى تۋرالى» زاڭ جوباسىن تانىستىرعان مينيستر.
ونىڭ اتاپ وتۋىنشە، زاڭ جوباسىندا سىنىپ جەتەكشىلىگى مەن داپتەر تەكسەرگەنى ءۇشىن پەداگوگتەرگە 2 ەسە مولشەردە قوسىمشا اقى تولەۋ كوزدەلگەن. بۇل نورما ەلىمىز بويىنشا 182 مىڭ سىنىپ جەتەكشىسىنە جانە داپتەر تەكسەرگەنى ءۇشىن ۇستەمەاقى الاتىن 165 مىڭ مۇعالىمگە قاتىستى.
«سونداي-اق بارلىق پەداگوگتار ءۇشىن دەمالىس كەزەڭىن 56 كۇنگە دەيىن ۇلعايتۋ قاراستىرىلادى. بۇل نورما بۇگىنگى كۇنى 110 مىڭ ارىپتەسىمىزگە قاتىستى. بۇگىندە ولار 42 كۇن عانا دەمالاتىن بولسا، ەندى 56 كۇن ەڭبەك دەمالىس الادى»، - دەدى ول.
ا. ايماعامبەتوۆتىڭ اتاپ وتۋىنشە، تالىمگەرلىك ءۇشىن پەداگوگتەرگە جىل بويى 17 مىڭ تەڭگە قوسىمشا اقى بەرۋ دە ۇسىنىلىپ وتىر.
«ماگيستر اتاعى بار ۇستازدار سانى بويىنشا ءبىز باسقا مەملەكەتتەرمەن سالىستىرعاندا وكىنىشكە وراي سوڭعى قاتاردا كەلە جاتىرمىز. سوندىقتان بۇل ماسەلەنى دە قولعا الىپ وتىرمىز. ەگەر ماگيستر اتاعى بار پەداگوگ مەكتەپكە كەلىپ جۇمىس ىستەيتىن بولسا، ولارعا 10 ا ە ك مولشەرىندە قوسىمشا اقى تولەۋ كوزدەلەدى»، - دەدى مينيستر.
اۆتور: مارلان جيەمباي
