قىرىمبەك كوشەربايەۆ: قازاقستان پرەزيدەنتى قانداستاردىڭ ماسەلەسىن مۇقيات قاراپ، ناقتى تاپسىرمالار بەردى

نۇر-سۇلتان. قازاقپارات – ق ر مەملەكەتتىك حاتشىسى، «وتانداستار قورى» ك ە ا ق قامقورلىق كەڭەسىنىڭ ءتوراعاسى قىرىمبەك كوشەربايەۆ ەلىمىزدە «وتانداستار» حالىقارالىق فورۋمى وتكىزىلەتىنىن ءمالىم ەتتى، دەپ حابارلايدى قازاقپارات ءتىلشىسى.

«تاۋەلسىزدىك العالى بەرى ەلىمىزگە 1 ميلليونان استام قانداسىمىز كەلىپ، وتانىمىزدىڭ ءبىر- ءبىر ۋىعىنا اينالىپ، مەملەكەتىمىزدىڭ وركەن جايۋىنا ۇلەستەرىن قوسۋدا. ارينە، كوش بولعاسىن جۇرە تۇزەلەر كەمشىلىكتەر بار بولار. سوندىقتان، قازاقستان پرەزيدەنتى قاسىم-جومارت توقايەۆ اتامەكەندى اڭساپ كەلگەن اعايىندار ماسەلەسىن ۇكىمەتكە، پرەزيدەنت اكىمشىلىگىنە تاعى ءبىر مۇقيات قاراپ، قوسىمشا ءىس- شارالار قابىلداۋ تۋرالى ناقتى تاپسىرما بەردى»، - دەدى ول.

مەملەكەتتىك حاتشى بۇگىن دە شەتەلدەگى ەتنيكالىق قازاقتاردى قوداۋ جونىندەگى 2018-2022 -جىلدارعا ارنالعان ءىس- شارالار جوسپارى اياسىندا قازاق دياسپوراسى وكىلدەرى ءۇشىن قازاقستاندىق ج و و- لاردا باكالاۆرياتتىڭ ءبىلىم بەرۋ باعدارلامالارى بويىنشا كۆوتا كولەمى 4 پايىزعا كوتەرىلگەنىن، ءبىلىم الۋشىلاردىڭ 2747 گە جەتكەنىن اتاپ ءوتتى.

«بۇدان باسقا قانداستارىمىزدىڭ باسپانامەن جانە جۇمىسپەن قامتۋ ماسەلەسى 2017-2021 ارنالعان «ەڭبەك» باعدارلاماسى اياسىندا ءوزىنىڭ شەشىمىن تاۋىپ وتىر. سونىمەن بىرگە، قازىرگى ۋاقىتتا شەتەلدەن كەلگەن اعايىندارعا قۇجاتتى رەسىمدەۋدە كورسەتىلەتىن قىزمەتتەردى وڭتايلاندىرۋ، شەتەلدەگى وتانداستاردى مەملەكەتتىك تۇرعىدا قولداۋ تۋرالى زاڭنامالىق تەتىكتەردى ەنگىزۋ جونىندە دە ماڭىزدى شارالار دا قولعا الىنادى»، - دەدى مەملەكەتتىك حاتشى.

قىرىمبەك كوشەربايەۆ سونداي-اق، قازاق دياسپوراسىنىڭ بۇگىنگى جاي-كۇيى دا ءسوز ەتتى.

«ەلىمىزدە قازاق جاستارىنىڭ ءبىلىم جانە عىلىم سالالارىنا ىنتا- ىقىلاسى، ولاردى وزدەرى تۇرىپ جاتقان ەلدەردىڭ ساياسي- الەۋمەتتىك جۇيەسىنە تولىققاندى كىرىگۋىنە بايلانىستى زەرتتەۋلەر دە جۇرگىزىلۋدە. بۇل جۇمىستاردىڭ ءوزىنىڭ وڭ ناتيجەسىن تابارى ءسوزسىز. زامانداس اقىن سابىر ادايدىڭ «ءار قازاق - مەنىڭ جالعىزىم» دەگەن جىر جولدارى قاناتتى سوزگە اينالىپ كەتكەنى اقيقات. دۇنيەنىڭ ءتورت بۇرىشىن مەكەندەگەن قانداستارىمىزدىڭ قاداۋ- قاداۋ ماسەلەلەرىن بۇگىنگى دوڭگەلەك ۇستەلدە شەشىپ تاستامايتىنىمىز انىق. الايدا اتامەكەندى اڭساپ، تاريحي وتانعا ۇكىلى ۇمىتپەن قاراپ وتىرعان قانداستارىمىزعا بۇگىنگى اڭگىمە قاناتىمەن سۋ سەپكەن قارلىعاشتاي كومەك قولىن تيگىزىپ جاتسا - مازمۇندىق جاعىنان شارانىڭ ءوزىن- ءوزى اقتاي العانى دەپ ويلايمىن»، - دەدى ول.

مەملەكەتتىك حاتشى ءسوز سوڭىندا كەلەسى جىلى ەلىمىزدە «وتانداستار» حالىقارالىق فورۋمى وتكىزىلەتىنىن ءمالىم ەتتى.

«ەشقانداي كۇمان بولماسىن - ەلباسى دا، مەملەكەت باسشىسى دا، ۇكىمەت تە ۇلتىمىزدىڭ بولاشاعىنا قىزمەت ەتۋدە. اسىرەسە، حالقىمىزدىڭ اسىل ارمانى مەن ۇكىلى ءۇمىتىن ىسكە اسىراتىن وسكەلەڭ ۇرپاقتىڭ جاعدايى - ءبىزدىڭ ەڭ ۇلكەن نازارىمىزدا. بۇيىرسا، سىزدەردىڭ ۇسىنىس- ەسكەرتپەلەرىڭىزدى ەسكەرە وتىرىپ، ءساۋىر ايىندا نۇر-سۇلتاندا «وتانداستار» حالىقارالىق فورۋمىن وتكىزىپ، ماڭىزدى شەشىمدەر قابىلدانادى دەپ كۇتىلۋدە»، - دەدى ول.

ەسكە سالا كەتسەك، ەلوردادا دۇنيە ءجۇزىنىڭ تۇكپىر-تۇكپىرىنەن كەلگەن قانداستاردىڭ قاتىسۋىمەن «وتانداستار. بولاشاققا باعدار» اتتى حالىقارالىق دوڭگەلەك ۇستەل ءوتىپ جاتىر.

اۆتور: ايان بەكەن ۇلى