حالال تۋريزم يندۋسترياسى جايلى نە بىلەمىز
يسلامي تۋريزم يندۋسترياسىنا قاتىستى تۇزىلگەن رەيتينگتە اسا ءىرى مۇسىلمان ەلى - يندونەزيا كوش باسىنان كورىنگەن. جاكارتا قالاسىندا وتكەن حالال تۋريزم جونىندەگى القالى جيىندا ءسوز العان اتالعان ەلدىڭ ورتالىق بانك پرەزيدەنتىنىڭ ورىنباسارىدودي بۋدي ۋالۋيو كەلەسى 2020 -جىلى الەمدەگى مۇسىلمان تۋريستەر قاراسى 2018 -جىلعى كورسەتكىشكە قاراعاندا 18 ميلليون ادامعا ارتاتىن تىلگە تيەك ەتتى.
مۇسىلمان تۋريستەر ءۇشىن، ءتىپتى، مۇسىلمان ەمەس ەلدەردە دە شاريعات تالاپتارىنا ساي جۇمىس ىستەيتىن مەيمانحانالار مەن مەيرامحانالار كوپتەپ اشىلۋدا. سۇرانىستىڭ ارتۋىنا بايلانىستى. مۇسىلماندارعا ارنالعان قوناق ۇيلەردە قۇبىلانى كورسەتەتىن بەلگىلەر، ءار بولمەدە ناماز وقيتىن، دارەت الاتىن ارنايى ورىندار، قاسيەتتى قۇران دانالارى بار.
ماسەلەن، يندونەزياداعى Airy قوناق ۇيلەر جەلىسىن الايىق. يندونەزيالىقتاردىڭ %60 ى اتالمىش قوناق ۇيلەردى قولاي كورەدى. شاريعات تالاپتارى قاتاڭ ساقتالاتىن قوناق ۇيلەردەگى تاعامدار مەن سۋسىندار حالال سەرتيفيكاتىنا يە، قوناق ءۇي قىزمەتكەرلەرىنىڭ كيىمى شاريعات تالاپتارىنا ساي تىگىلگەن.
بۇدان بولەك، قوناق ۇيگە توقتاعان ەرلى-زايىپتىلاردىڭ رەسمي نەكەدە تىركەۋدە تۇراتىنى مىندەتتى تۇردە تەكسەرىلەدى. 2018 -جىلى مۇسىلمان تۋريزم نارىعى 189 ميلليارد دوللاردى قۇراعان، بۇل كورسەتكىش بولجام بويىنشا 2024 -جىلعا قاراي 274 ميلليارد دوللارعا جەتپەك.
سينگاپۋرلىق CrescentRating تۋريستىك پلاتفورما 130 ەلدى قامتىعان مۇسىلمان تۋريزىمىنىڭ يندەكسىن تۇزگەن بولاتىن. بۇل يندەكستە تاعامنىڭ شاريعات تالاپتارىنا ساي بولۋى، يسلامي تاريحي ءارى مادەني ورىنداردىڭ بولۋى، يسلامي شارالاردى ۇيىمداستىرىلۋى، ساياحاتتاۋعا قولايلىعى، ت. ب. ولشەمدەر قاپەرگە الىنعان ەدى.
islam.kz
