قىتايدىڭ «ميلليونەر» قالالارىنا ساياحات

نۇر-سۇلتان قازاقپارات - دجەكي چان، دجەت لي، دجەك ما، اليبابا، اشى سورپا، ۇلى قورعان جانە ادامعا كەرەك تاۋاردى ءوندىرۋ.

بۇل ۇعىمدار «قىتاي مەملەكەتى» دەگەن اسسوتساتسيانى قۇرايدى. بۇل ەلدە ءبىز مۇلدەم بىلمەيتىن ەكونوميكالىق جانە مادەني ورتالىقتار وتە كوپ ەكەن. قىتاي ەلىندە ساياحاتتاپ وسىنى اڭعاردىق. جىلان كوزگە تۇسپەيتىن، باقانىڭ داۋسى ەستىلمەيتىن، ۇزاق جاۋىننان تاسىمايتىن، قۋاڭشىلىقتا تايازدانبايتىن كولدىڭ بارىن دا بىلدىك.

جينان قالاسى

جينان قالاسىنىڭ بۇلاق كوزى كارستىق قۇبىلىستان پايدا بولعان. قىتايدىڭ شىعىسىنداعى گەوگرافيالىق جانە گيدروگەولوگيالىق ەرەكشەلىكتەردىڭ ءبىرى بوپ ەسەپتەلەدى. جينان جانىندا جاتقان 800 گە جۋىق بۇلاق كوزى تاۋعا تازا بالعىندىق پەن كوز تويماس سۇلۋلىق سىيلاپ كەلەدى.

باوتۋ -  اسپاناستى ەلىنىڭ العاشقى بۇلاق كوزى، وسى جيناندا، شاندۋڭ پروۆينسياسىنىڭ استاناسىندا ورنالاسقان. ول ءبىر وزەننەن، ءبىر كولدەن (دامينحۋ)، ءۇش بۇلاقتان (باوتۋ، قارا قابىلان، بەس ايداھار)، ءتورت ساياباقتان (باوتۋ بۇلاعى، حۋانچەن، بەس ايداھار وزەنى، دامينحۋ) قۇرالعان. بۇلاق كوزى الدىمەن وزەنگە قۇيىپ، كەيىن كولگە قوسىلادى. ولار مينفۋ اتتى كونە شاھارمەن ادەمى ۇيلەسىم تاۋىپ جاتىر. بۇل تابيعاتتىڭ كوركەم كورىنىسىنە يە بوپ جاتقان اۋدان 3,1 شارشى كيلومەتردى قۇرايدى. 

دامينحۋ كولى وسى پروۆينسيانىڭ جاۋھارى اتالىپ كەتكەن. تسزينان قالاسىنىڭ سولتۇستىك- شىعىسىندا جاتقان بۇل كول سۋن جانە تان اۋلەتى كەزىندە كوركەم پەيزاجىمەن الەمگە تانىلدى. 

«جىلان كوزگە تۇسپەيتىن، باقانىڭ داۋسى ەستىلمەيتىن، ۇزاق جاۋىننان تاسىمايتىن، قۋاڭشىلىقتا تايازدانبايتىن».

وسى ءتورت قاسيەتىمەن ەرەكشەلەنىپ تۇر. ساياباق 86 گا اۋداندى قامتىپ جاتىر، كولدە 6 ۇلكەن جانە كىشى ارال بار. كەزقۇيرىق اسپان استىندا ۇشىپ جۇرسە، بالىقتار سۋدا ەركىن ءجۇزىپ جۇرەدى. دامينحۋ كولىندە لوتوس گۇلى ەرتە زاماننان جايقالىپ تۇرادى. 

ليسيا، تەگۋن ورداسى، نانفەن ورداسى مەن بەيتسزى حرامى نۋ اعاشتاردىڭ اراسىندا تاريحي ونەر مەن مادەنيەتتى ساقتاپ جاسىرىنىپ جاتقانداي كورىنىس بەرەدى. 

مىڭ بۋددا تاۋىنىڭ اۋدانى 11,12 شارشى كيلومەتردى قۇرايدى.

2017 -جىلى مەملەكەتتىك ماڭىزى بار كورنەكى مەكەن دارەجەسىنە يە بولعان. چيىن اۋلەتى داۋىرىنەن باستاپ مىڭ بۋددا تاۋى، باوتۋ باستاۋى مەن دامينحۋ كولى تسزينان قالاسىنىڭ «ماقتانىشى» اتانعان.

جىجياڭ پروۆينسياسى

جىجياڭ پروۆينسياسى قىتايدىڭ وڭتۇستىك- شىعىسىندا، يانسزى(چاڭجياڭ) وزەنىنىڭ وڭتۇستىك ساعاسىندا ورنالاسقان، ال شىعىسىن شىعىس كولى شايىپ جاتىر، وڭتۇستىگىندە فۋجيان پروۆينسياسى، باتىسىندا انحۋي، جيانشي پروۆينسيالارىمەن، سولتۇستىگىندە شاڭحايمەن جانە جياڭسۋ پروۆينسياسىمەن شەكتەسەدى. 

شيانتان وزەنىنىڭ ارناسى وسى پروۆينسيادا يىلەدى. «جە» يەروگليفى -  «بۇگىلۋ، ءيىلۋ» ماعىناسىن بەرەدى. پروۆينسيا اتاۋى وسىدان پايدا بولعان -  جىجياڭ. باتىستان شىعىسقا جانە سولتۇستىكتەن وڭتۇستىككە دەيىن شامامەن 450 شاقىرىمدى قۇرايدى.

پروۆينسيا اۋدانى -  105 مىڭ شارشى مەتر، بۇل قىتايدىڭ %1.1 بولىگىن قۇرايدى، ياعني ەڭ كىشكەنتاي پروۆينسيا قاتارىنا جاتادى. جىجياڭ -  مەملەكەتتىك جانە جەكە ەكونوميكالىق باستاماسى «جىجياڭدىق ەكونوميكا» ۇعىمىن قالىپتاستىرعان.

2016 -جىلعى ستاتيستيكا بويىنشا ادام باسىنا كىرىس كولەمى وزگەرىسسىز جوعارى بوپ ەسەپتەلگەن قىتايدىڭ ەكونوميكاسى دامىعان پروۆينسياسى. حاڭجوۋ، نينبو، ۆەنجوۋ، شاوشين، حۋجوۋ، جياشين، جينحۋا، چيۋجوۋ، جوۋشان، تايجوۋ، ليشۋي اتتى قالالاردان قۇرالعان.

حاڭجوۋ

حاڭجوۋ -  جىجياڭ پروۆينسياسىنىڭ استاناسى، ساياسي، ەكونوميكالىق، مادەني، قارجىلىق جانە ترانسپورتتىق ورتالىعى. قالا اۋماعى 16600 شارشى كيلومەتردى قۇرايدى، 9 مۋنيتسيپالدى اۋدان، 2 ۋەزد، 2 ۋەزدتى قالا 85 كوشەدەن، 23 اۋىلدان قۇرالعان. 

حالىق سانى -  9 ميلليون 100 مىڭ. 2016 -جىلى حاڭجوۋ قالاسىنىڭ ج ءى ءو- ى 11 ميلليارد يۋاندى قۇراعان. 

قىتايدىڭ كونە قالالارىنىڭ بىرىنە جاتادى، 8-5 مىڭجىلدىقتار بۇرىنعى ارحەولوگيالىق ىزدەر تابىلعان. بەس پاتشالىق (907-978 ج ج. ) پەن سۋن اۋلەتى وڭتۇستىگىنىڭ استاناسى بولعان.

قازىر بۇل قالادا اليبابا، ۆانسيان، ۆاحاحا كومپانيالارىنىڭ شتاب پاتەرى ورنالاسقان.

نينبو

نينبو - پروۆينسيانىڭ ماڭىزدىلىعى بويىنشا ەكىنشى قالاسى، جاعالاۋدا ورنالاسقان، قىتايدىڭ باسەكەگە قابىلەتتى 15 قالاسىنىڭ ءبىرى. يانسزىنىڭ وڭتۇستىك ساعاسىندا جاتقان ەكونوميكالىق ورتالىق زاماناۋي پورتقا يە. 

وعان قوسا، جىجياڭنىڭ مادەني- تاريحي وشاعى دەپ ەسەپتەلەدى. نينبو مادەنيەتى ۆۋ يۋە مادەنيەتىنەن تارايدى. تۇرعىندار ۆۋ تىلىندە سويلەيدى.

تەڭىزگە جولى اشىلعان بۇل قالا قىتايدىڭ ۇلكەن ارناسىنىڭ وڭتۇستىك نۇكتەسىندە. شىعىس پورت تەڭىز جىبەك جولى دەگەن اتاۋعا يە. تانىمال بريتاندىق تەڭىز يندۋسترياسىنىڭ جۋرنالىنىڭ نۇسقاسى بويىنشا «حالىقارالىق كونتەينەر» اتانعان. بۇعان مىنا سۋرەتتەر دالەل بولا الادى. 

شاوسين

شاوسين -  پروۆينسيانىڭ سولتۇستىك بولىگىنىڭ ورتالىعىندا، حاڭجوۋ بۇعازىنىڭ شەتىندە ورنالاسقان، تۋريستىك ورتالىق. شىعىسىندا نينبو، وڭتۇستىگىندە تايجوۋ جانە جينحۋا، باتىسىندا حانجوك، سولتۇستىگىندە تسيانتان وزەنىمەن جانە جياشين قالالارىمەن شەكتەسىپ جاتىر. قىتايدىڭ 2500 -جىلدىق تاريحى بار تاريحي قالاسى ب ۇ ۇ- نىڭ شەشىمىمەن تۋريزم، ورمان شارۋاشىلىعى، جەكە ەكونوميكالىق سەكتور دامۋىمەن، سونىمەن قاتار، كوپىر، شاراپ، كۇرىش، باسپا ءىسىنىڭ وتانى دەپ تانىلعان.

انچان

جىجياڭ پروۆينسياسىنىڭ مادەني- تاريحي ءمانى بار دەپ العاش تانىلعان قالاسى. سولتۇستىك سۋن اۋلەتى كەزىنەن سالىنعان تاريحي قالا سان ءتۇرلى سوعىستىڭ كۋاسى بولعان، قۇلاعان جانە قايتا قالىپقا كەلتىرىلگەن.

قازىر بۇل قالاعا كوپتەگەن تۋريست قالا ورتاسىنداعى ارنانىڭ سۇلۋلىعىن كورۋگە كەلەدى. كونە ورتالىق كوشە سۋ ارناسىنىڭ بويىندا ورنالاسقان. كوشەنىڭ سولتۇستىگى ساۋدا ورىندارىنا ارنالعان. 

سۋ جاعاسىنداعى دۇڭگىرشىكتەر مەن اشىق اسپان استىنداعى ساۋداگەرلەردى كورۋگە كەلگەن تۋريستەر قارسى بەتتەگى تۇرعىن ۇيلەردى دە قىزىقتاي الادى. ەرتەدەن ساقتالعان تاس جولدار، كوشە، كوپىر، دۇكەندەر قۇددى ءبىر سول زامانعا اپارىپ تاستاعانداي بولادى.

Massaget.kz