بىشكەكتە قازاقستان مەن قىرعىزستان پرەزيدەنتتەرىنىڭ كەلىسسوزدەرى باستالدى
ايتا كەتەرلىگى، الا-ارچا مەملەكەتتىك رەزيدەنسياسىنا كەلگەن قاسىم-جومارت توقايەۆتى سوورونباي جەەنبەكوۆ قارسى الدى.
قازاقستان پرەزيدەنتىنىڭ ساپارىنا وراي قۇرمەتتى قاراۋىل ساپ تۇزەپ، پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى. قۇرمەتتى قاراۋىل باستىعى راپورت بەردى. مەملەكەتتەر باسشىلارى قۇرمەتتى قاراۋىلدىڭ قاتارىن ارالاپ شىقتى. وسىدان كەيىن پرەزيدەنتتەر ءبىر-بىرىنە دەلەگاتسيا مۇشەلەرىن تانىستىردى.
سالتاناتتى شارا اياقتالعان سوڭ قاسىم-جومارت توقايەۆ پەن سوورونباي جەەنبەكوۆ كەلىسسوز زالىنا ءوتتى.
ءدال قازىرگى ۋاقىتتا قازاقستان مەن قىرعىزستان پرەزيدەنتتەرىنىڭ قاتىسۋىمەن شاعىن قۇرامداعى كەلىسسوزدەر بولىپ جاتىر. ودان كەيىن ەكى ەل دەلەگاتسيالارىنىڭ قاتىسۋىمەن قازاقستان رەسپۋبليكاسى مەن قىرعىز رەسپۋبليكاسى جوعارى مەملەكەتارالىق كەڭەسىنىڭ كەزەكتى بەسىنشى وتىرىسى وتەدى. اتالعان كەلىسسوزدەر بارىسىندا بارلىق سالانى قامتيتىن ماسەلەلەردىڭ كەڭ اۋقىمى جان-جاقتى تالقىعا تۇسەدى. قورىتىندىسىندا مەملەكەت باسشىلارى بۇقارالىق اقپارات قۇرالدارىنا بىرلەسكەن مالىمدەمە جاسايدى دەپ كۇتىلۋدە.
ايتا كەتەيىك، كەزدەسۋ ناتيجەسىندە ءبىرقاتار قۇجاتتارعا قول قويىلادى دەپ جوسپارلانۋدا.
بۇدان بۇرىن حابارلانعانداي، بۇگىن قاسىم-جومارت توقايەۆ مەملەكەتتىك ساپارمەن بىشكەككە كەلدى.
ساپار اياسىندا قازاقستان پرەزيدەنتى مەن قىرعىزستان پرەزيدەنتى «اتا-بەيىت» ۇلتتىق تاريحي- مەموريالدىق كەشەنىنە باردى.
قازاقستان قىرعىزستاننىڭ ەڭ باستى ساۋدا-ەكونوميكالىق جانە ينۆەستيتسيالىق سەرىكتەستەرىنىڭ ءبىرى بولىپ سانالادى. 2018 -جىلى ءوزارا ساۋدا كولەمى 13,1 پايىزعا ءوسىپ، 865,3 ميلليون دوللارعا جەتتى. سونىمەن قاتار، وتكەن جىلمەن سالىستىرعاندا 2019 -جىلعى ءبىرىنشى جارتىجىلدىقتا ەكى ەل اراسىنداعى تاۋار اينالىمى 13,2 پايىزعا تومەندەپ 389,4 ميلليون دوللاردى قۇرادى. بۇل رەتتە قازاقستاننان قىرعىزستانعا ەكسپورتى وسى كەزەڭدە 269,2 ميلليون ا ق ش دوللار بولعانىن اتاپ وتكەن ءجون.
اۆتور: رۋسلان عابباسوۆ
