قاسىم- جومارت توقايەۆتىڭ قىرعىز رەسپۋبليكاسىنا مەملەكەتتىك ساپارى باستالدى
اۋەجايدا قازاقستان مەملەكەت باسشىسىن قىرعىزستان پرەزيدەنتى سوورونباي جەەنبەكوۆ پەن قازاقستاننىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قايرات نۇرپەيىسوۆ كۇتىپ الدى.
پرەزيدەنتتىڭ ساپار باعدارلاماسىنا رەسپۋبليكا باسشىسى سوورونباي جەەنبەكوۆپەن ەكىجاقتى كەلىسسوزدەر جۇرگىزۋ، سونداي- اق قازاقستان رەسپۋبليكاسى مەن قىرعىز رەسپۋبليكاسى جوعارى مەملەكەتارالىق كەڭەسىنىڭ كەزەكتى بەسىنشى وتىرىسىنا قاتىسۋ ەنگەن. جوعارى دەڭگەيدەگى كەزدەسۋ بارىسىندا ساياسي، ساۋدا- ەكونوميكالىق، ينۆەستيتسيالىق جانە مادەني- گۋمانيتارلىق سالاداعى ەكىجاقتى ءوزارا ءىس- قيمىلدىڭ كەڭ اۋقىمدى ماسەلەلەرى قارالاتىن بولادى.
سونىمەن قاتار، 28 - قاراشادا مەملەكەت باسشىسى بىشكەك قالاسىندا وتەتىن ۇجىمدىق قاۋىپسىزدىك شارت ۇيىمى (ۇ ق ش ۇ) قاۋىپسىزدىك كەڭەسىنىڭ سەسسياسىنا قاتىسادى.
ۇيىمعا مۇشە مەملەكەتتەردىڭ باسشىلارى ۇيىم قىزمەتى اياسىندا ءوزارا ءىس- قيمىلدىڭ كەڭ اۋقىمدى ماسەلەلەرىن تالقىلايدى. سونىمەن بىرگە، بيىلعى جىلعى ۇيىم قىزمەتتىنىڭ باسىم باعىتتارىن ىسكە اسىرۋدىڭ قورىتىندىسىن شىعارادى دەپ كۇتىلۋدە.
« مەملەكەت باسشىسى قىرعىزستان پرەزيدەنتىمەن بىرلەسىپ «اتا- بەيىت» ۇلتتىق تاريحي- مەموريالدىق كەشەنى مەن شىڭعىس ايتماتوۆتىڭ مۇراجاي- ۇيىنە بارادى» ، دەپ جازدى پرەزيدەنتتىڭ باسپا ءسوز حاتشىسى بەرىك ءۋالي Facebook تەگى پاراقشاسىندا.
