بۇگىن ازاتتىقتى اڭساعان الاش ارىسىنىڭ تۋعان كۇنى
تۋعان جەرى - تورعاي ۋەزىنىڭ، سارىقوپا وبلىسىنىڭ ءبىرىنشى اۋىلى(قازىرگى قوستاناي وبلىسىنىڭ جانكەلدى اۋدانىنا قاراستى «قىزبەل» اۋىلى). اكەسى - دۋلات ايماعىنا اتى شىققان شەبەر كىسى بولعان، ەر تۇرمان جاساپ، ەتىك، ءماسى تىككەن. شەشەسى - دامەش ويىن تويدىڭ بازارى، ءانشى كىسى بولعان.
ءمىرجاقىپ دۋلات ۇلى - ادەبيەتتىڭ ءار ءتۇرلى جانرىنا قالام تارتقان قالامگەر. العاشقى كىتابى - «ويان، قازاق!» دەگەن اتپەن پەتەربۋرگ قالاسىنداعى جارىق كورگەن ولەڭ جيناعى. ودان كەيىن 1913 -جىلى ورنبوردا «ازامات»، ال 1915 -جىلى «تەرمە» اتتى ولەڭدەر كىتاپتارى باسىلىپ شىعادى. اقىن ولەڭدەرىنىڭ باستى تاقىرىبى-ەل تاعدىرى بولدى. العاشقى كىتابى «ويان، قازاق!» جۇرتشىلىق اراسىندا اۋىزدان- اۋىزعا، قولدان- قولعا تەز تاراپ كەتەدى. قايتا باسىلادى. كىتاپتىڭ نەrىزگى مازمۇنى حالىقتى وياتۋعا، ادىلەتسىزدىكپەن كۇرەسۋگە شاقىرعان ولەڭدەر قۇرادى. سول سەبەپتى دە كىتاپ تۇتقىندالىپ، اۆتورى قۋعىنعا ۇشىرايدى.
ءوزىنىڭ شىعارماشىلىق جولىن ءا دەگەننەن ولەڭنەن باستاعان ءمىرجاقىپ پروزا جانرىنا دا قالام سىلتەيدى. 1910 -جىلى ونىڭ وسى جانرداعى تۋىندىسى «باقىتسىز جامال» رومانى قازان قالاسىندا باسىلىپ شىقتى. بۇل - قازاق ادەبيەتىندەگى تازا كوركەم پروزا ۇلگىسىندە تۋعان تۇڭعىش رومان ەدى. كىتاپ 1914 -جىلى ەكىنشى رەت باسىلدى. بۇل جىلدارى ءمىرجاقىپ ءبىرقاتار ماقالالار مەن فەلەتوندار جازادى
1922 -جىلى تاشكەنتتە ەكى بولىمنەن تۇراتىن «ەسەپ كۇرالى» وقۋلىعىن باستىرادى. «بالقيا» پەساسىن جازادى. م. دۋلات ۇلىنىڭ شىعارمالارى قازاق ەلىنىڭ تاۋەلسىزدىك العان كەزىنەن باستاپ كەڭىنەن جاريالانا باستادى. 1991 -جىلى شىعارمالارىنىڭ ءبىر تومدىق، ال 1996-1997 -جىلدارى ەكى تومدىق جيناقتارى جارىك كوردى. م. دۋلات ۇلى شىعارماشىلىعى جونىندە عىلىمي زەرتتەۋلەر جۇرگىزىلىپ، ءبىرقاتار كىتاپتار مەن ماقالالار جاريالاندى.
