قازاقستاندىقتار زەينەتاقى جيناعىن باسپانا الۋعا جۇمساي الا ما - ۇكىمەت باسشىسى جاۋاپ بەردى

نۇر-سۇلتان. قازاقپارات - قازاقستاندا زەينەتاقى جيناقتاۋدا سينگاپۋرلىق تاجىريبەنى قولدانۋ مۇمكىندىگى زەردەلەنىپ جاتىر.

بۇل جايىندا ءماجىلىس دەپۋتاتتارىنىڭ ساۋالىنا وراي ق ر پرەمەر-ءمينيسترى اسقار ماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«جيناقتاۋشى زەينەتاقى جۇيەسىنىڭ جاي-كۇيىنە تالداۋ بۇگىنگى كۇنى 5,3 ميلليون جيناقتاۋشىنىڭ 500 مىڭ تەڭگەگە دەيىن، 1,6 ميلليون ادامنىڭ 500 مىڭنان 1 ميلليون تەڭگەگە دەيىن زەينەتاقى جيناعى بار ەكەندىگىن كورسەتىپ وتىر. وسىلايشا، ازاماتتاردىڭ زەينەتاقى جيناعىنىڭ ورتاشا كولەمى 1040800 تەڭگەنى، ونىڭ ىشىندە ەرلەردە 1164700 تەڭگەنى، ايەلدەردە 900400 تەڭگەنى قۇرادى. ۇكىمەت مەملەكەت باسشىسىنىڭ 2019-جىلعى 2- قىركۇيەكتەگى قازاقستان حالقىنا جولداۋىن جۇزەگە اسىرۋ ءۇشىن جۇمىس ىستەيتىن ازاماتتاردىڭ زەينەتاقى جيناعىنىڭ ءبىر بولىگىن باسپانا ساتىپ الۋعا نەمەسە ءبىلىم الۋ ءۇشىن پايدالانۋ ماسەلەسىن زەردەلەپ جاتىر»، - دەپ اتاپ وتەدى اسقار مامين.

ونىڭ اتاپ وتۋىنشە، ول ءۇشىن پرەمەر-ءمينيستردىڭ ورىنباسارى بەردىبەك ساپاربايەۆتىڭ توراعالىعىمەن ۇزاق مەرزىمدى وزەكتى مودەلدەردى قالىپتاستىرۋ نەگىزىندە زەينەتاقى جۇيەسىن ودان ارى جەتىلدىرۋ بويىنشا كەشەندى شارالار ازىرلەۋ جونىندەگى جۇمىس توبى قۇرىلعان. ونىڭ قۇرامىنا پارلامەنت سەناتى مەن ءماجىلىسىنىڭ دەپۋتاتتارى، مۇددەلى مەملەكەتتىك ورگانداردىڭ، قوعامدىق بىرلەستىكتەردىڭ، ۇيىمداردىڭ وكىلدەرى مەن تاۋەلسىز ساراپشىلار كىرەدى. قازىرگى ۋاقىتقا دەيىن جۇمىس توبىنىڭ 4 وتىرىسى ءوتىپ، وندا ءبىرىڭعاي الەۋمەتتىك قور قۇرۋ جانە ءبىر الەۋمەتتىك تولەم ەنگىزۋ جولىمەن الەۋمەتتىك قامتاماسىز ەتۋدىڭ بيۋجەتتەن تىس جۇيەسىن شوعىرلاندىرۋ، زەينەتاقى جۇيەسى تيىمدىلىگىن ارتتىرۋ، سونىمەن قاتار جۇمىس بەرۋشىنىڭ 5 پايىز مىندەتتى زەينەتاقى جارناسىن اۋدارۋ مەرزىمىن 2020-جىلدان 2023-جىلعا شەگەرۋى ماسەلەلەرى قارالدى.

«سونىمەن قاتار جۇمىس توبى قازاقستاندا جيناقتاۋشى قور قالىپتاستىرۋدا سينگاپۋرلىق تاجىريبەنى قولدانۋ مۇمكىندىگىن زەردەلەپ وتىر. بۇعان قوسا، بۇگىندە جۇمىس توبى ناقتى ۇسىنىس ازىرلەگەن جوق جانە ولاردى تالقىلاۋ جالعاسىپ جاتىر»، - دەدى ۇكىمەت باسشىسى.