قازاقستاندىق داۋلەت تولەۋبايەۆ ا ق ش پرەزيدەنتىندە قوناقتا بولدى
ۆاشينگتون. قازاقپارات - سپورتتىڭ گولف تۇرىندە ا ق ش-تا ەرەكشە جەتىستىكتەرگە جەتكەن قازاقستاندىق داۋلەت تولەۋبايەۆ پرەزيدەنت دونالد ترامپتا قوناقتا بولدى، دەپ حابارلايدى قازاقپارات «حابار 24» ارناسىنا سىلتەمە جاساپ.
ستەنفورد ۋنيۆەرسيتەتىنىڭ گولفشىلار كومانداسىندا ونەر كورسەتەتىن وتانداسىمىز NCAA (ا ق ش پەن كانادانىڭ ج و و-لارى مەن كوللەدجدەرى ەنگەن ۇلتتىق ۋنيۆەرسيتەتتىك سپورت قاۋىمداستىعى) چەمپيونى بولدى.
دونالد ترامپتىڭ گولف الاڭدارىندا وتكىزەتىن ۋاقىتى جونىندە امەريكالىق باسپا سوزدە ءجيى تالقىلانادى. جۋرناليستەردىڭ ەسەبىنە سايكەس، ونىڭ اقش پرەزيدەنتى لاۋازىمىنداعى كۇندەردىڭ 23 پروتسەنتى گولف ويناۋمەن وتكەن. ترامپ اتالمىش سپورت تۇرىنە ارنالعان بەدەلدى جارىستاردىڭ ناتيجەسىن مۇقيات باقىلاپ وتىرادى. بۇل جولى ونى وزدەرىنىڭ مۇلتىكسىز جەڭىسىمەن ستەنفورد ۋنيۆەرسيتەتىنىڭ كومانداسى ءتانتى ەتكەن.
«قۇرامىنا قازاقستاندىق داۋلەت تولەۋبايەۆ ەنگەن كوماندا سوڭعى 12 جىلدا ۇلتتىق ۋنيۆەرسيتەتتىك سپورت قاۋىمداستىعىنىڭ قايتا چەمپيونى بولدى. امەريكالىق تانىمال تەلەارنالار د. تولەۋبايەۆتىڭ تاماشا ويىنىن ءالى دە كورسەتىپ جاتىر»، - دەپ حابارلايدى «حابار 24».
داۋلەتتىڭ ايتۋىنشا، بۇل - بارلىق كوماندا مۇشەلەرىنىڭ جەڭىسى.
«بۇل - امەريكا كوللەدجدەرى اراسىنداعى تۋرنير بولدى. مەن كوماندامىزداعى 5 گولفشىنىڭ ءبىرىمىن. ءتورت كۇندىك ويىننان كەيىن «بىرگە ءبىر» ماتچىنا كوشەمىز. جارتىلاي فينالدا مەنىڭ ويىنىم سوڭعى ماتچ بولدى. ەسەپتى 2:2-گە تەڭەستىرە الدىق. جانە سوڭعى شۇڭقىردا ءوز ماتچىمدا جەڭىسكە جەتتىم. وسىلايشا، فينالدا كومانداما جەڭىس اكەلدىم. بۇل، جالعىز مەنىڭ عانا ناتيجەم ەمەس، ءارقايسىمىز ءوز ماتچتارىمىزدا ۇزدىك بولدىق. ءيا، مەن تەك وعان كومەكتەستىم»، - دەيدى ول.
ونىڭ سپورتتاعى جانە وقۋداعى تاماشا جەتىستىكتەرىنە الەمنىڭ ۇزدىك ۋنيۆەرسيتەتتەرى نازار اۋدارىپ، گارۆارد، پريستون، ديۋك جانە امەريكانىڭ وزگە دە بەدەلدى ۋنيۆەرسيتەتتەرى وزدەرىندە ءبىلىم الۋعا شاقىرعان. ءبىراق ونىڭ تاڭداۋى ستەنفوردقا تۇسكەن.
«قازاقستاندى تانىتىپ جۇرگەنىمە قۋانىشتىمىن. قازىر قازاقستاندا سپورتتىڭ بۇل ءتۇرى دامىپ كەلەدى. ەلىمىز جاس. ال ا ق ش-تا گولفتىڭ پايدا بولعانىنا كوپتەگەن جىلدار بولدى. بىزدە الاڭدار جاقسارتىلۋدا، كوپتەگەن يۋنيور گولفشىلار بار»، - دەيدى ول.
ال داۋلەتتىڭ باپكەرى كونراد رەي ونىڭ ەرەكشە مىنەزىن اتاپ ءوتىپ، بىرنەشە رەت ويىننىڭ شەشۋشى ساتىندە كوماندانى جەڭىسكە جەتكىزگەنىن ايتتى.
«داۋلەت ستەنفورد سىندى الەمدىك دەڭگەيدەگى ۋنيۆەرسيتەتتە جاقسى ءبىلىم الا وتىرىپ، ستۋدەنت- سپورتشىنىڭ ۇزدىك بەينەسىن قالىپتاستىرۋدا. الەمنىڭ وزگە بولىگىن تانىستىرىپ جۇرگەن ونى ءبىزدىڭ قاتارىمىزدان كورۋگە قۋانىشتىمىز. .پرەزيدەنت د. ترامپ شامادان تىس ساياسي قىزمەتىنە قاراماستان، سپورتقا كوڭىل ءبولىپ، كوماندالار مەن جەڭىمپازدارعا قوشەمەت ءبىلدىردى. ول ءوزى گولفشى جانە بۇل - ءبىزدى بىرىكتىرەدى. ءبىز ونىمەن اڭگىمەلەسىپ قانا قويماي، اق ءۇيدى دە ارالاپ شىقتىق»، - دەيدى كونراد رەي.
اۆتور: ميرا تولەندى قىزى
