شەت ەلدەردەگى ەتنيكالىق قازاقتار مەن وتانداستاردى «اتامەكەن» قولدايتىن بولادى

 نۇر- سۇلتان. قازاقپارات - «اتامەكەن» ۇ ك پ مەن «وتانداستار قورى» كوممەرتسيالىق ەمەس اكسيونەرلىك قوعامى اراسىندا ءوزارا تۇسىنىستىك جانە ىنتىماقتاستىق تۋرالى مەموراندۋم جاسالدى.

 كەلىسىمگە «وتانداستار قورى» ك ە ا ق پرەزيدەنتى نۇرتاي ابىقايەۆ پەن پالاتانىڭ باسقارما ءتوراعاسى ابىلاي مىرزاحمەتوۆ قول قويدى، دەپ حابارلايدى قازاقپارات.

ايتا كەتەيىك، «وتانداستار قورى» - شەت ەلدەردە تۇراتىن ەتنيكالىق قازاقتار مەن وتانداستاردى قولداۋ جۇمىسى بويىنشا مەملەكەتتىك ورگاندار جانە ۇكىمەتتىك ەمەس ۇيىمدارمەن ناقتى باعىتتاردى ايقىنداپ، سەرىكتەستىك ورناتاتىن ۇيىم. ال مەموراندۋم «اتامەكەن» ۇ ك پ مەن قوردىڭ ءبىرقاتار باعىتتا تىعىز بايلانىستا جۇمىس اتقارۋى ءۇشىن نەگىز بولىپ تابىلادى. ماسەلەن، «اتامەكەن» وزىندە جيناقتاعان كاسىپكەرلىك تۋرالى ءبىلىم بانكىن پايدالانۋ، بيزنەس قۇرۋ جانە دامىتۋ، پالاتا جۇزەگە اسىراتىن باعدارلامالار بويىنشا وقىتۋ، ينۆەستورلار مەن ستارتاپتاردى ىزدەۋ باعىتىندا قولداۋ جاسايدى.

سونىمەن قاتار ىنتىماقتاستىق اياسىندا «مەنىڭ اتامەكەنىم» جانە بيزنەس سالاسىنداعى شەتەلدىك قازاقتار ۇيىمدارىن الەم بويىنشا ءبىر جەلىگە بىرىكتىرەتىن «اتامەكەن» ىسكەرلىك ءۇيى» جوباسىن ىسكە اسىرۋ ماسەلەلەرى دە قامتىلدى. ەتنيكالىق قازاقتاردىڭ تاريحي وتانىنا كوشۋىن ىنتالاندىرۋدى قاراستىراتىن «تەمىرقازىق» باعدارلاماسىنا دەربەس باسىمدىق بەرىلەدى.

«وتانداستار» قورى مەن «اتامەكەن» ۇ ك پ بىرلەسكەن جۇمىسىنىڭ الداعى باعىتتارى «وتانداستار. بولاشاققا باعدار» اتتى حالىقارالىق دوڭگەلەك ۇستەل اياسىندا وتەتىن «اتامەكەن» ىسكەرلىك ءۇيىنىڭ» پانەلدىك سەسسياسىندا ناقتىلانادى. اتالعان شارا بيىل 28 - قاراشادا نۇر- سۇلتان قالاسىندا وتەدى. جيىنعا 20 ەلدەگى قازاق دياسپوراسىنان 150 دەلەگات قاتىسادى.