قازاقستاندىق دارىگەرلەر ءتىل وبىرىنا العاش رەت ءساتتى وتا جاسادى

الماتى. قازاقپارات - الماتى دارىگەرلەرى ءتىل وبىرىنا شالدىققان ادامعا العاش رەت كۇردەلى وتا ءساتتى جاسادى، دەپ حابارلايدى قازاقپارات ءتىلشىسى.

مامانداردىڭ ايتۋىنشا، مۇنداي دياگنوزدىڭ سالدارىنان كوپ ادامدار سويلەۋ، تاماق ءىشۋ قابىلەتىنەن ايرىلىپ قالادى.

42 جاستاعى الماتى ونكولوگيالىق ورتالىعىنا ءتىل ءتۇبىرى ىسىگىمەن تۇسكەن. وعان دەرەۋ 4 حيميوتەراپيا كۋرسى بەلگىلەندى. الايدا حيميالىق كۋرستاردان سوڭ دا ناۋقاستىڭ جاعدايى ناشارلاي بەرگەن.

دارىگەرلەر ىسىكتى الىپ تاستاۋعا بەل بۋادى. بينوكۋليارلى وپتيكانىڭ كومەگىمەن 7 ساعاتقا سوزىلعان وتا بارىسىندا ۇزىندىعى 20 س م بولاتىن قاتەرلى ىسىك تەرىمەن قوسا الىندى.

ودان بولەك قوسارلاسا ءوسىپ كەتكەندىكتەن مويىننىڭ ماگيسترالدى تامىرلارى، بۇلشىقەتتەرى الىنىپ تاستالدى.

ودان كەيىن دارىگەرلەر اناتوميالىق اقاۋلاردى قالپىنا كەلتىرۋ ءۇشىن پلاستيكالىق وپەراتسيا جاساۋعا ءماجبۇر بولدى.

«پاتسيەنتتىڭ كوكىرەك تۇسىنان تەرى- بۇلشىقەت كەسىلىپ الىنىپ موينىنىڭ ۇڭىرەيىپ قالعان تۇسىنا جامالدى. وتا ءساتتى جاسالدى. قازىر پاتسيەنتتىڭ جاعدايى جاقسى. شىعۋعا دايىندالىپ جاتىر»، - دەدى ونكولوگ ساتتار اپپازوۆ.

دارىگەرلەر جۇيكە تالشىقتارىن ىسىكتەن اجىراتا الدى، سونىڭ ارقاسىندا ناۋقاس تاماقتى وزدىگىنەن جەي الاتىن بولدى. مۇنى وتاندىق دارىگەرلەردىڭ شەبەرلىگى دەسەك ارتىق بولماس.

الماتى قالالىق ونكولوگيالىق ورتالىعىنىڭ باس دارىگەرى نۇرسۇلتان ىزماعامبەتوۆتىڭ ايتۋىنشا، ورتالىقتا جىلىنا 3 مىڭ وتا جاسالادى.

اۆتور: گۇلميرا  عوسمانالي