تابيعاتتى قورعاۋشى ينسپەكتورلاردىڭ قۇزىرەتى كەڭەيدى
بۇل تۋرالى ق ر ەكولوگيا، گەولوگيا جانە تابيعي رەسۋرستار ۆيتسە-ءمينيسترى ەرلان نىسانبايەۆ مالىمدەدى، دەپ حابارلايدى قازاقپارات ءتىلشىسى.
جاڭا وزگەرىستەر «ق ر كەيبىر زاڭنامالىق اكتىلەرىنە اگروونەركاسىپتىك كەشەندى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىندا كورسەتىلگەن.
«ءبىزدىڭ مەملەكەتتىك ينسپەكتورلارعا شابۋىل جاسالعانى تۋرالى سوڭعى وقيعالاردان كەيىن ينسپەكتورلاردىڭ ءومىرى مەن دەنساۋلىعىن قورعاۋ ءۇشىن شارا قابىلداۋعا تۋرا كەلدى. ول ءۇشىن ينسپەكتورلاردىڭ نەمەسە جاقىندارىنىڭ ومىرىنە قاستاندىق نەمەسە زورلىق- زومبىلىق ءۇشىن جاۋاپكەرشىلىكتى كۇشەيتۋ جۇمىستارى جۇرگىزىلىپ جاتىر»، - دەدى ۆيتسە-مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، مەملەكەتتىك ينسپەكتورلاردىڭ قىزمەتتىك اۆتوكولىكتەرىنە ارنايى داۋىس زورايتقىش قۇرالى مەن ارنايى دابىلدار ورناتىلادى.
«2012 -جىلدىڭ 24 -مامىرىنداعى ۇكىمەتتىڭ №670 -قاۋلىسىمەن رەتتەلەتىن قىزمەتتىك قارۋ مەن ارنايى قۇرالداردى قولدانۋ ءتارتىبىن دە قايتا قاراپ جاتىرمىز. وندا ينسپەكتور وزىنە وق اتىلعان جاعدايدا عانا قارۋ قولدانۋعا قۇقىلى. زاڭ ارقىلى ورمان كودەكسىنە، «ايرىقشا قورعالاتىن تابيعي اۋماقتار تۋرالى» جانە «جانۋارلار الەمىن قورعاۋ، پايدالانۋ تۋرالى» زاڭدارعا ۆەدومستۆوعا ۋاكىلەتتى ورگان مەن ونىڭ اۋماقتىق بولىمشەلەرىن قاداعالاۋ فۋنكتسياسى جونىندە وكىلەتتىك بەرۋ تۋرالى تۇزەتۋلەر ەنگىزىلدى»، - دەدى ەرلان نىسانبايەۆ.
قاداعالاۋ فۋنكسياسىنىڭ بولۋى ينسپەكتورلارعا جەكە جانە زاڭدى تۇلعالاردىڭ زاڭعا قايشى ارەكەتىنە جەدەل جاۋاپ قاتۋعا (توقتاتۋ، قۇجات تەكسەرۋ، ۇستاۋ، اۋلاۋ قۇرالدارىن، قارۋ-جاراقتى تاركىلەۋ) جەدەل شارا قابىلداۋعا مۇمكىندىك بەرەدى. ودان بولەك، اۋلانعان اڭ- قۇس پەن بالىق تا تاركىلەنەدى. بۇل شارالار جەكە تۇلعالارعا دا، زاڭدى تۇلعالارعا دا قاتىستى.
اۆتور: ايجان سەرىكجان قىزى
