20:05, 05 - قاراشا 2019 | GMT +5
ءۇندىستاندا جۇمىرتقا جەپ جارىسقان ەر ادام كوز جۇمدى
نۇر- سۇلتان. قازاقپارات - ءۇندىستان تۇرعىنى سۋبحاش ياداۆ ءبىر مەزەتتە كوپ جۇمىرتقا جەگەننەن قازا تاپتى، دەپ جازادى Daily Mail.
«42 جاستاعى ەر ادام دوسىمەن بازارعا بارىپ، ەكەۋىنىڭ اراسىندا داۋ تۋىنداعان. داۋدى شەشۋ ءۇشىن ولار باستەسىپ، 50 جۇمىرتقا جەپ جارىسپاق بولعان. وسىنشا جۇمىرتقانى تۇگەل تاۋىسقان ادام ەكى مىڭ رۋپي (شامامەن ون مىڭ تەڭگە) الاتىن ەدى» دەپ جازادى باسىلىم.
اۆتوردىڭ ايتۋىنشا، 41 جۇمىرتقاسىن جەپ بولعاننان كەيىن ياداۆ ەسىنەن تانىپ قالعان. ول اۋرۋحاناعا جەتكىزىلگەننەن كەيىن بىرنەشە ساعاتتان سوڭ قازا تاپتى. دارىگەرلەر ونىڭ ارتىق تاماقتانۋدان كوز جۇمعانىن انىقتادى.
