قازاقستان ۋكراينامەن اراداعى ساۋدا ىسىنە الاڭداۋشىلىق ءبىلدىردى

نۇر-سۇلتان. قازاقپارات - ۋكرايناعا قازاقستاننان جەتكىزىلەتىن پودشيپنيك پەن مينەرالدى تىڭايتقىش بويىنشا جەرگىلىكتى بيلىك دەمپينگكە قارسى تەرگەۋ جانە ارنايى قورعاۋ شارالارىن قابىلداۋى مۇمكىن.

قازاقستان وسىعان وراي الاڭداۋشىلىق ءبىلدىردى، دەپ حابارلايدى قازاقپارات.

ق ر ساۋدا جانە ينتەگراتسيا ۆيتسە-ءمينيسترى جانەل كۋشۋكوۆا ۋكراينانىڭ ەكونوميكا، ساۋدا جانە اۋىل شارۋاشىلىعى ءمينيسترىنىڭ ورىنباسارى - ساۋدا وكىلى تاراس كاچكانىڭ جەتەكشىلىگىمەن كەلگەن ۋكراينا دەلەگاتسياسىمەن ساۋدا شارالارى ماسەلەلەرى بويىنشا كەزدەستى.

«كەزدەسۋدە جانەل كۋشۋكوۆا ۋكراينانىڭ قازاقستاندىق پودشيپنيكتەرى مەن مينەرالدى تىڭايتقىشتاردى ءوندىرۋشى كاسىپورىندارعا قاتىستى قورعاۋ شارالارىن قابىلداۋى مۇمكىندىگى جونىندە الاڭداۋشىلىق ءبىلدىردى.

قازىرگى ۋاقىتتا ۋكراينا تاراپى قازاقستان جاساپ جەتكىزەتىن پودشيپنيكتەرگە دەمپينگكە قارسى تەرگەپ-تەكسەرۋ جانە مينەرالدى تىڭايتقىشتارعا قاتىستى ارنايى قورعاۋ تەرگەپ-تەكسەرۋ جۇرگىزۋدە»، دەلىنگەن حابارلامادا.

«قازاقستان تاراپى ۋكراينا بيلىگى جۇرگىزىپ جاتقان قورعاۋ تەرگەپ-تەكسەرۋلەرىنە الاڭداۋشىلىق بىلدىرەدى. ۋكراينا نارىعى قازاقستاندىق تەربەرمەلى مويىنتىرەكتەر مەن مينەرالدى تىڭايتقىشتاردى وندىرۋشىلەر ءۇشىن ءداستۇرلى بولىپ تابىلادى جانە ولاردى قازاقستاننان جەتكىزۋگە قاتىستى كەدەرگىلەردى بەلگىلەۋ قازاقستاندىق وندىرۋشىلەردىڭ ەكونوميكالىق جاعدايىن ايتارلىقتاي قيىنداتۋى مۇمكىن»، - دەدى جانەل كۋشۋكوۆا.

ءوز كەزەگىندە، ۋكراينا تاراپى ەۋرازيالىق ەكونوميكالىق كوميسسيا جۇرگىزەتىن دەمپينگكە قارسى تەرگەپ-تەكسەرۋلەر تۋرالى جانە ە ا ە و ەلدەرى ۋكراينادان شىققان تاۋارلارعا قاتىستى قولداناتىن ساۋدا شارالارى تۋرالى ماسەلەلەردى كوتەردى.

كەزدەسۋ اياسىندا تاراپتار 2020-جىلعى 8-11- ماۋسىمدا نۇر-سۇلتان قالاسىندا وتەتىن د س ۇ- نىڭ الداعى 12- مينيسترلىك كونفەرەنتسياسىنىڭ كەيبىر ماسەلەلەرى بويىنشا پىكىر الماستى، وندا ۋكراينا تاراپى بيزنەسپەن بىرلەسىپ د س ۇ كۇن تارتىبىندە تۇرعان وزەكتى ماسەلەلەردى قاراۋعا قاتىسۋدى جوسپارلاپ وتىر.

تاراپتار بۇدان باسقا ەكىجاقتى ۇكىمەتارالىق كوميسسيا وتكىزۋ مۇمكىندىگىن، سونداي-اق ەكىجاقتى ساۋدانى ودان ءارى دامىتۋ ماسەلەلەرىن تالقىلادى.

ايتا كەتەرلىگى، قازاقستاندا تەربەرمەلى مويىنتىرەكتەردى «ە پ ك ستەپنوگورسك» ا ق عانا وندىرەدى. كاسىپورىن بىلتىر ۋكراينا تەمىر جولدارىنا پودشيپنيكتەر جەتكىزۋگە تەندەر ۇتىپ الدى. ۋكرايناعا تەربەرمەلى مويىنتىرەكتەردىڭ ورتاشا جىلدىق يمپورتى 2,1 مىڭ توننا. ال، قازاقستاندا مينەرالدى تىڭايتقىشتاردى ءوندىرۋشى ەكى كاسىپورىن بار: «قازفوسفات» ج ش س جانە «قازازوت» ا ق. ەكى كاسىپورىن دا جىلىنا ورتا ەسەپپەن ۋكراينا نارىعىنا 113 مىڭ توننا مينەرالدىق تىڭايتقىش جەتكىزەدى.