ءدىني ۋاعىزدىڭ قانشالىقتى دۇرىس باعىتتا ەكەنىن ساراپتاپ وتىرۋ قاجەت - بەرىك بەيسەن ۇلى
بەرىك بەيسەن ۇلىنىڭ ايتۋىنشا، ءدىننىڭ سىرتقى سيپاتىنا باسىمدىق بەرىلىپ، ناعىز ىشكى رۋحاني جاعىنا زيانى ءتيدى. يماندىلىق جايلى ايتىلماي، ساقال ءوسىرۋ جايلى ۇگىت- ناسيحات بەلسەندى جۇرگىزىلدى. شىندىعىندا كيىم سياقتى سىرتقى ماسەلەلەر ماڭىزدى ەمەس.
«ۋاعىز» دەگەن جەلەۋمەن حالىقتى «ءدىن ۇستاناتىندار» مەن «ءدىن ۇستانبايتىندارعا» ءبولدى. اسىرەسە جاستار اراسىندا. سالافيزم شەيحتەرى «تەلەديدار حارام» دەپ ءپاتۋا بەردى، الايدا وزدەرى وندا سويلەۋگە قارسى بولمادى. «تەلەديدار كورۋدى، فوتوعا ءتۇسىپ، ءان ايتۋدى حارام» دەدى. سالافيزم ناسيحاتى كەزىندە تويلار قارالى جيىنعا اينالدى. مەيرامدا قۋانۋ، قايعىدا مۇڭايۋ كەرەك. مىنە دۇرىس يسلام وسى»، - دەدى بەرىك بەيسەن ۇلى.
ونىڭ ويىنشا، سالافيزم قوزعالىسىنىڭ قاتەلىگى - ونىڭ ۇندەۋىنىڭ قاتىگەزدىگىندە.
«مۇنىڭ بارىنە سەبەپ - ساۋد ارابياسى كورولدىگى ءمۇفتياتىنىڭ ۇلكەن عالىمدارى كەڭەسىنەن الشاقتاۋى، تاجىريبە مەن ءبىلىمىنىڭ جوقتىعى. ءبىزدىڭ ۇندەۋىمىز ىزگىلىكتى، راقىمدى دىنگە قارسى كەلدىك، ادامدارعا قىسىمشىلىق كەلتىردىك. ساۋد ارابياسى كورولدىگى حالقى الدىندا سالافيزم قوزعالىسى اتىنان كەشىرىم سۇرايمىن». بۇل سالافيزم باعىتىنداعى كورنەكتى تۇلعالاردىڭ ءبىرى شەيح ايد ءال - كارنيدىڭ ءسوزى. بۇدان شىعاتىن ءتۇيىن نە؟ الەمدىك قاۋىپسىزدىككە ۇلكەن قاتەرىن ءتوندىرىپ وتىرعان قوزعالىستىڭ بەلدى باسشىلارىنىڭ ءبىرى اقىرى ءوز قاتەلىگىن مويىندادى. ۋاقىت وتە كەلە مۇسىلمان الەمىنەن كەشىرىم سۇرادى. ءبىراق ەندى كەش. نەگە؟ ويتكەنى بۇل قوزعالىستىڭ قىلمىستىق ارەكەتتەرى قازىر عالامدى كەزىپ ءجۇر. قانشاما ازاماتتار شەيح ايتقانداي، بىلىمدەرىنىڭ تايازدىعىنان وسى اعىمعا ەرىپ، سوقىر سەنىمگە بوي ۇردى. بۇل اسىرەسە جاستارعا ءتان. قانشاما جاستار اعايىن- تۋىستان جەرىدى، اتا- انادان ىرگەسىن اۋلاق سالدى. وعان كىم كىنالى؟ ارينە، ءوزىمىز. جوقتى- باردى، اقتى- قارانى ناقتىلاپ ۋاقىتىندا كورسەتە المادىق»، - دەيدى جۋرناليست.
بەرىك بەيسەن ۇلىنىڭ پىكىرىنشە، ءدىني ۋاعىزدىڭ قانشالىقتى دۇرىس باعىتتا ەكەنىن باعامداپ، ساراپتاپ وتىرۋ قاجەت.
«جالپى بۇل جايتتى قاراپايىم مىسالمەن كەلتىرەر بولساق، جاستاردىڭ دۇرىس ءدىني جولدا كەلە جاتقانىن ايتىپ وتىراتىن كوكىرەگى وياۋ قارت قاجەت. اۋىل اقساقالى كەرەك. اۋىلدان، ورتا مەكتەپتەن تۇلەپ ۇشقان بالا ەس جيار شاقتا قالاعا كەلگەن ساتتە، جوق نارسەنىڭ ورنىن رۋحاني ازىق رەتىندە دىنمەن تولتىرعىسى كەلەدى. ال ءدىننىڭ ءبارى دىڭگەك پە؟! نەگىزى «بالانى جاستان»، دەپ بەكەر ايتپاعان ەل ەدىك قوي. رۋحاني جانى تەرەڭ، جادى مىقتى، وتانشىلدىق رۋحپەن تاربيەلەنگەن بالا نەمەسە وتباسىندا قازاقى تاربيەنى بويىنا تەرەڭ ءسىڭىرىپ وسكەن جاس ەشقاشان اداسپايدى»، - دەيدى ول.
سونىمەن قاتار، بەرىك بەيسەن ۇلى ءدىن ماسەلەسى وتە نازىك ەكەندىگىن، ابايلاماسا، باقىلاماسا بولمايتىنىن اتاپ ءوتتى.
«تاريحتان بەلگىلى، ءدىنارالىق سوعىس تالاي مەملەكەتتىڭ ىرگەسىن شايقالتقان. وتباسىنداعى ءدىنارالىق سان الۋان كوزقاراس تالاي شاڭىراقتى ورتاسىنا تۇسىرگەن. بالا اكەدەن بەزىپ، اتا مەن انا كوز جاسىن كولدەي قىلعان. مۇنىڭ بارلىعى مەملەكەتتىك باقىلاۋدىڭ بولماۋىنان، وتباسىندا ۇلتتىق قۇندىلىقتاردىڭ ولقى سوعۋىنان ورىن الدى. «قاي جەردە قاتەلىك جىبەردىك؟» دەگەن ساۋالعا بەرەر جاۋاپ وسى. قازىر اللاعا شۇكىر، مەملەكەت تاراپىنان باقىلاۋ بار. جاستار دا ءدىني اعىمداردىڭ سان الۋان ساياساتىن، ماسەلەنىڭ اق- قاراسىن اڭعارا باستادى»، - دەپ ءسوزىن تۇيىندەدى ول.
اۆتور: الما مۇقانوۆا
