ۆەنگريا پۋتين كەتكەننەن كەيىن ناتونىڭ ۋكراينا بويىنشا مالىمدەمەسىن قولدادى
ۆەنگريانىڭ سىرتقى ىستەر ءمينيسترى پەتەر سيارتو «ۇسىنىستارىمىز سوڭعى ساتتە ەسكەرىلدى»، سول سەبەپتى بۋداپەشت ناتو ەلشىلەرىنىڭ ورتاق مالىمدەمەسىن قولدادى دەدى.
ۆەنگرياعا رەسەي پرەزيدەنتى ۆلاديمير پۋتيننىڭ ساپارى باستالعان كەزدە بۋداپەشت بۇل قۇجاتتا «ۆەنگر قاۋىمداستىعىنىڭ مۇددەسى ەسكەرىلمەگەن» دەپ ۆەتو قويعان ەدى. ۆەنگريا «ۋكراينا باتىسىندا تۇراتىن 150 مىڭ ەتنيكالىق ۆەنگردىڭ مۇددەسىن قۇربان ەتۋگە دايىن ەمەس» دەپ مالىمدەگەن.
ۋكراينادا بيىل ءتىل تۋرالى جاڭا زاڭ قابىلدانعاننان كەيىن بۋداپەشت پەن كيەۆ اراسىنداعى قارىم-قاتىناس ۋشىققان. بۇل زاڭ بارلىق بيلىك ورگاندارى مەن قوعامدىق ورىندارعا مەملەكەتتىك ءتىل - ۋكراين ءتىلىن قولدانۋدى مىندەتتەيدى. ءبىراق بۇل ەرەجەنىڭ جەكە قاۋىمداستىقتارعا قاتىسى جوق.
ۆەنگريا جاڭا زاڭ زاكارپاتەدە تۇراتىن ۆەنگر قاۋىمداستىعىنىڭ قۇقىعىنا نۇقسان كەلتىرۋى مۇمكىن دەپ قاۋىپتەنگەن. بۋداپەشتىڭ پىكىرىنشە، بۇل ەۋرووداقتىڭ نەگىزگى پرينتسيپتەرى مەن ۋكراينانىڭ ەۋروپامەن جاساسقان قاۋىمداستىق تۋرالى كەلىسىمىنە قايشى. ال كيەۆ «ۋكراينا از ۇلتتاردىڭ قۇقىقتارىنىڭ قورعالاتىنىنا تولىق كەپىل بولا الادى جانە «ءتىل تۋرالى» زاڭ ولاردىڭ ۋكراين قوعامىندا ءرولىن ارتتىرۋعا مۇمكىندىك بەرەدى» دەدى.
«ازاتتىق»
