تاماشا ويىن-ساۋىق وتاۋىنىڭ اكتەرى قارتتار ءۇيىن پانالاپ جۇرگەنى راس پا؟
سەبەبى، قازاقتا اكە- شەشەسىن قارتتار ۇيىنە تاپسىرۋ دەگەن جوق، - دەيدى قۋات «نايمان» حاميتوۆ.
كۇنى كەشە قازاقستاندىق كينويندۋستريانىڭ قورجىنى تاعى ءبىر تىڭ تۋىندىمەن تولىقتى. «منوگودەدنىي» دەپ اتالاتىن كارتينادا قارتتار ءۇيىن مەكەندەگەن ەگدە جاستاعىلاردىڭ كۇيبەڭ تىرلىگى سۋرەتتەلەدى، دەپ حابارلايدى Shownews.kz.
كومەديا جانرىنداعى اتالعان كينولەنتادا باستى رولدەردىڭ ءبىرىن سومداعان - قادىربەك دەمەسىن. ازۋلى اكتەر وزىنە جۇكتەلگەن وبرازعا ەنۋ ءۇشىن، تاعدىر تالكەگىنە تۇسكەن قاريالاردىڭ جاي-كۇيىمەن جاقىنىراق تانىسىپ قايتىپتى.
«ءوزىم تۇراتىن جاقتا «قارتتار ءۇيى» بار. اراسىندا تانىس ادامدار بار. ارالاسىپ، كەزدەسۋ جاساپ تۇرامىز. سوندا ءبىراز سۇحباتتاسامىز، اڭگىمەلەسەمىز. ەندى ءبىز اكتەر بولعاننان كەيىن ەسكەرتىپ ايتپايمىز. سىرتتاي باقىلاپ وتىرامىز. ىشكى جان-دۇنيەسى قالاي بولادى؟ ءبارىبىر ماعان مىنا جەر ۇنايدى دەگەنىمەن، ءبىراق ىشىندە ۋراگان سوعىپ جاتادى. ىزدەيدى، ومىردە جالعىزدىق قيىن بولادى. مىڭ جەردەن ول جەردى ماقتاسىن، پسيحولوگيالىق جاعىنان ءبارىبىر قيىن. سونى اشۋعا تىرىستىق»، - دەيدى ايگىلى «تاماشا» ويىن-ساۋىق وتاۋىنىڭ اكتەرى قادىربەك دەمەسىن.
جۇرەك تەبىرەنتەر كومەديانى تاسپاعا تارتقان - جەڭىسحان مومىشەۆ. رەجيسسەر جاڭا جوباسى ارقىلى نارتاۋەلكەلگە بەل بۋعانىن ايتادى.
«ءبىرىنشى بولىپ باستاپ جاتقاننان كەيىن، ءبارى جەڭىسحان نە ىستەپ جاتىر دەپ ويلاپ جاتىر. نەگە مۇنى ءتۇسىرىپ جاتىر دەپ. ويتكەنى، تازا كومەديا بولسا بىلەسىز. الدىندا «بيزنەس پو- كازاحسكيدى» ءتۇسىردىم. مەن تۇسىرە الاتىنىمدى دالەلدەدىم. ال، الەۋمەتتىك تاقىرىپتى قوسىپ، وي قوسۋ - ول باسقا كينو»، - دەيدى كارتينانىڭ رەجيسسەرى جەڭىسحان مومىشەۆ.
ال، قوعامداعى تۇيتكىلدى ماسەلەنى ۇلكەن ەكران ارقىلى ءدۇيىم جۇرتقا ۇسىنعان ۇجىمنىڭ ەڭبەگىن تۇساۋكەسەرگە كەلگەن كورەرمەندەر جوعارى باعالاعان.
«فيلمنىڭ سوڭىندا ستاتيستيكا شىقتى عوي. قازاق ازاماتتارى ءۇشىن وتە اۋىر ستاتيستيكا. سەبەبى، قازاقتا اكە- شەشەسىن قارتتار ۇيىنە تاپسىرۋ دەگەن جوق. سوندىقتان، بۇل كينو قازىرگى جاستار ءۇشىن، ءبىز ءۇشىن وتە ۇلكەن ساباق دەپ ەسەپتەيمىن»، - دەيدى قۋات «نايمان» حاميتوۆ.
«قازىرگى ومىردە ونداي جايتتار كوپ كەزدەسىپ جاتىر عوي. سوعان قارسى جەڭىسحان باۋىرىمىز وتە كەرەمەت تۇسىرگەن. ويلاندىراتىن كينو دەسەك بولادى»، - دەيدى كاسىپقوي بوكسشى جانقوش تۇراروۆ.
