جاڭادان اشىلاتىن «اباي» اكادەمياسى نەمەن اينالىسادى
«مەملەكەت باسشىسىنىڭ كەلىسىمىنە سايكەس، «اباي» اكادەمياسىن اشۋ جونىندەگى ناقتى تاپسىرماعا وراي ءبىز دايىندىق جۇمىستارىن اياقتاۋعا كوشتىك. جالپى، اباي تانۋ ماسەلەسىمەن وسى ۋاقىتقا دەيىندە قۇزىرلى عىلىمي مەكەمەلەر اينالىسۋدا. ماسەلەن، م. اۋەزوۆ اتىنداعى ادەبيەت جانە ونەر ينستيتۋتىنىڭ تۇتاس ءبىر ءبولىمى ارناۋلى تاقىرىپتا جۇمىس اتقارىپ جاتىر. ەندى ءبىزدىڭ ۋنيۆەرسيەتتىڭ جانىندا قۇرىلاتىن ينستيتۋت تا وسىنداي يگىلىكتى ىسكە وزىندىك ۇلەسىن قوسپاقشى»، - دەدى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ.
ونىڭ ايتۋىنشا، ينستيتۋتتىڭ ميسسياسى - اباي مۇراسىن جان- جاقتى تانىتۋ ماقساتىندا ءپان ارالىق زەرتتەۋلەر جۇرگىزۋ، اباي تانۋ باعىتىندا جەتەكشى عىلىمي يستيتۋت بولۋ، مونوگرافيالار، عىلىمي جيناقتار، وقۋ اداىستەمەلىلىك جانە جاڭا تەحنولوگياعا نەگىزدەلگەن قۇرالدار ازىرلەۋ. باستى ماقساتى - اباي مۇراسى جانە قازاق قوعامى اياسىندا ۇلتتىڭ ادەبيەتى مەن تاريحىن، رۋحاني- مادەني مۇرالاردى، اقىل- وي تۇجىرىمدامالاردى وتاندىق، تۇركىلىك، الەمدىك ساناتتا زەردەلەيتىن عىلىمي الەۋەتتى ورتالىق قۇرۋ.
«نەگىزگى مىندەتتەرى - ابايتانۋعا قاتىستى سان قىرلى اسپەكتىلەرگە زەرتتەۋلەر ۇيىمداستىرۋ، اباي تۇلعاسى مەن مۇراسىن جاڭا قىرىنان تانىتىپ، دۇنيەءجۇزى كەڭىستىگىنە تانىستىرۋ، اباي جانە قازاق قوعامى جوباسى اياسىندا ۇلت ادەبيەتى مەن تاريحى جانە مادەنيەتى دەرەكتەرىن جيناقتاۋ جۇيەلەۋ، سارالاۋ، زەردەلەۋ»، - دەدى ەرلان سىدىقوۆ.
رەكتوردىڭ ايتۋىنشا، «اباي» اكادەمياسى قازاقستاننىڭ شەتەلدەگى ەلشىلىكتەرى جانىنان اشىلعان اباي ورتالىقتارىنا وقۋ قۇرالدارىن ازىرلەۋ، ەلەكتروندىق وقۋلىقتار دايارلاۋ، ۇتقىر قوسىمشالار جاساۋ جانە ادىستەمەلىك كومەكتەر كورسەتۋ جۇمىستارىن اتقارادى. ينستيتۋت اياعىنان تۇرعاننان كەيىن حالىقارالىق بايلانىستاردى كۇشتەيتەدى. وسى ۋاقىتقا دەيىن تاريحتا بار گەتە ينستيتۋتى، لەرمونتوۆ ورتالىعى، پۋشكين ينستيتۋتى سياقتى الەمدىك دەڭگەيدەگى عىلىمي مەكەمەلەرمەن بايلانىس ورناتادى.
«ينستيتۋت ابايدىڭ 2 تومدىق شىعارمالارىن تەكستولوگيالىق تۇرعىدا قايتا قاراپ، تولىقتىرىپ شىعارادى. ابايدىڭ عىلىمي ءومىربايانىن ازىرلەيدى. «قۇنانباي» تاريحي- ءومىرباياندىق زەرتتەۋى «تاماشا ادامدار ءومىرى» سەرياسىمەن قاڭتار جارىق كورەدى. اكادەميا 2020-2022 -جىلدارى اقىننىڭ ءومىرى مەن شىعارماشىلىعى تۋرالى 16 زەرتتەۋ مەن مونوگرافيا، 7 وقۋ جانە وقۋ قۇرالىن، 7 قولدانبالى تانىمدىق قۇرال شىعارادى. ينستيتۋت جوباسىنىڭ ءۇش جىلدىق بيۋدجەتى 288 ميلليون تەڭگەگە باعالانىپ وتىر. ونىڭ ىشىندە 2020 -جىلعا - 120 ميلليون، 2021 -جىلعا - 88 ميلليون، 2022 -جىلعا - 78 ميلليون تەڭگە. ايتا كەتۋ كەرەك، ينستيتۋتتىق بازالىق قارجىلاندىرۋىن ەۇۋ ءوزى قامتاماسىز ەتەدى. كىتاپتاردى باسىپ شىعارۋعا دەمەۋشىلەر، مەتساناتتار تارتىلماق»، - دەدى ول.
اۆتور مارلان جيەمباي
