تۇركيامەن اسكەري كەلىسىم قازاقستاننىڭ مۇمكىندىكتەرىن كەڭەيتەدى - تيمۋر داندىبايەۆ

نۇر-سۇلتان. قازاقپارات – ق ر پارلامەنتى ءماجىلىسىنىڭ جالپى وتىرىسىندا «قازاقستان ۇكىمەتى مەن تۇركيا ۇكىمەتى اراسىنداعى اسكەري ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

كەلىسىمگە 2018-جىلعى قىركۇيەكتە انكارادا قول قويىلدى.

«تۇركيا قازاقستاننىڭ ماڭىزدى ءارى نەگىزگى ستراتەگيالىق سەرىكتەستەرىنىڭ ءبىرى بولىپ سانالادى. وسى ۋاقىتقا دەيىن ەكى مەملەكەت اراسىنداعى اسكەري سالاداعى ىنتىماقتاستىق 1993-جىلعى 8- تامىزداعى اسكەري ءبىلىم سالاسىنداعى، سونداي-اق 1994-جىلعى 23- اقپانداعى اسكەري عىلىم، تەحنيكا جانە ءبىلىم سالاسىنداعى ىنتىماقتاستىق تۋرالى كەلىسىمدەر نەگىزىندە جۇزەگە اسىرىلىپ كەلەدى. جوعارىدا اتالعان حالىقارالىق شارتتاردىڭ كەيبىر ەرەجەلەرى ەكى مەملەكەتتىڭ قولدانىستاعى زاڭناماسىنا سايكەس كەلمەۋى جانە ولاردا ءىس-شارالاردى وتكىزۋ بويىنشا قارجىلىق شىعىستارمەن قامتاماسىز ەتۋ ءتارتىبىنىڭ بولماۋىنا بايلانىستى اسكەري ىنتىماقتاستىق سالاسىندا جاڭا كەلىسىم جاساۋ تۋرالى شەشىم قابىلدانعان بولاتىن»، - دەدى ق ر قورعانىس ءمينيسترىنىڭ ورىنباسارى تيمۋر داندىبايەۆ.

ونىڭ سوزىنە قاراعاندا، قاراستىرىلىپ وتىرعان كەلىسىمنىڭ ماقساتى تاراپتار اراسىنداعى تەڭ قۇقىقتىق پەن ءوزارا تيىمدىلىك قاعيداتتار نەگىزىندە اسكەري ىنتىماقتاستىقتى دامىتۋعا نەگىزدەلگەن.

«كەلىسىم اسكەري دايارلىق پەن وقىتۋدى قوسا العاندا، بۇدان بۇرىن قامتىلماعان بىرلەسكەن وقۋ-جاتتىعۋلاردى وتكىزۋ، اۋە كەڭىستىگى ارقىلى اسكەري مۇلىكتىڭ ءترانزيتى، مەديتسينالىق كومەك كورسەتۋ، زاڭ قۇزىرەتتىلىگى، سونداي-اق باسقا دا ماسەلەلەردى كوزدەيدى. وسى قۇجاتتى ىسكە اسىرۋ بويىنشا شارالار تاراپتارمەن بىرلەسىپ ازىرلەگەن جىلدىق ىنتىماقتاستىق جوسپارىنا سايكەس جۇزەگە اسىرىلاتىن بولادى. كەلىسىمدى ىسكە اسىرۋ قازاقستاننىڭ اسكەري سالاداعى مۇمكىندىكتەرىن كەڭەيتۋدى قامتاماسىز ەتەدى جانە ەكى مەملەكەت اراسىنداعى اسكەري ىنتىماقتاستىقتىڭ دامۋىنا وڭ اسەر ەتەتىن بولادى»، - دەدى ت. داندىبايەۆ.